ލޯންޗު ބަންޑުންޖަހާލި ހާދިސާ: އެޑްމިޓްކޮށްގެން ފަރުވާދިން މީހާވެސް ދޫކޮށްލައިފި

ރ.އުނގޫފާރުން ފުރައިގެން 15 މީހުންނާއެކު ށ.މިލަންދޫއަށް ދަތުރުކުރަނިކޮށް ލޯންޗެއް ބަންޑުން ޖަހާލި ހާދިސާގައި އެޑްމިޓްކޮށްގެން ފަރުވާދެމުންދިޔަ މީހާވެސް ދޫކޮށްލައިފިއެވެ.

ފުލުހުންގެ ޚިދުމަތުން ވިދާޅުވީ އުނގޫފާރުން ފުރައިގެން މިލަންދޫއަށް ދަތުރުކުރި ލޯންޗެއް ށ.މާކަނޑުދޫ ކައިރިން ބަންޑުން ޖަހާލާފައިވާ ކަމުގެ މަޢުލޫމާތު ފުލުހުންނަށް ރިޕޯޓްކޮށްފައިވާކަމަށެވެ. މިލަންދުއާ 7 މޭލު ދުރުން އެލޯންޗު ބަންޑުން ޖަހާލީ މިއަދު އިރުއޮސުނު ވަގުތުއެވެ.

މިއަދު މެންދުރު 14:30ގައި އުނގޫފާރުން ފުރި މިލޯންޗުން 6 އަންހެނުންނާއި، 4 ފިރިހެނުންނާއި، ފަސްކުޑަކުދިން ދަތުރުކުރިކަމަށް ފުލުހުން ވިދާޅުވިއެވެ. މިއެންމެންވެސް ށ.މިލަންދޫ ހޮސްޕިޓަލަށް ގެންގޮސްފައިވާކަމަށް ފުލުހުން ވިދާޅުވެއެވެ.

މިލަންދޫ ކައުންސިލްގެ ރައީސް ޕީއެސްއެމް ނިއުސްއަށް މަޢުލޫމާތު ދެއްވަމުން ވިދާޅުވީ ހުރިހާ އެންމެންވެސް ސިއްޙީ މަރުކަޒަށް ގެންގޮސް ފަރުވާދިންކަމަށެވެ. އަދި އެކަކު އެޑްމިޓްކޮށްގެން ފަރުވާދިންކަމަށާއި އެމީހާވެސް މިހާރު ދޫކޮށްލާފައިވާކަމަށެވެ. އޭނާ ވިދާޅުވީ ބަންޑުން ޖަހާލި ލޯންޗްވެސް މިހާރު މިލަންދޫއަށް ގެންގޮސްފައިވާކަމަށެވެ.

ބަންޑުން ޖަހާލާފައިވަނީ އުނގޫފާރުން އާއިލާއެއްގެ މީހުން ގޮވައިގެން ދަތުރު ކުރި ލޯންޗެކެވެ.