ރާއްޖެއިން ބައި ޓަނުގެ މިޔަރު މަސް ވަގަށް ބޭރުކުރަން އުޅުނު މައްސަލަ ތަޙުޤީގު ކުރަން ފަށައިފި

ބައި ޓަނުގެ މިޔަރު މަސް ރާއްޖެއިން ވަގަށް ބޭރުކުރަން އުޅުނު މައްސަލަ ތަޙްޤީގު ކުރަން ފަށައިފިއެވެ.

ކަސްޓަމްސްއިން ވިދާޅުވީ މިދިޔަ އަހަރުގެ ނޮވްމެބަރު މަހުގެ 7 ވަނަ ދުވަހު ކަސްޓަމްސްއިން ބަލައި ފާސްކުރި މުދާ ޝިޕްމަންޓެއްގެ ތެރެއިން މިޔަރު މަހާއި މަޑިމަސް ހުރި 45 ފޮށިގަނޑު ފެނިފައިވާ ކަމަށާއި، އެތަކެތީގެ ބަރުދަނުގައި 582 ކިލޯ ހުރިކަމަށެވެ. އަދި މައްސަލަ ތަޙްޤީގުކުރަމުންދާކަމަށެވެ. އަދި މިޝިޕްމަންޓް ކަސްޓަމްސްއަށް ޑިކްލެއަރ ކޮށްފައިވަނީ "ދަ ކްރިސްޓަލް ކޮމްޕެނީ ޕްރައިވެޓް ލިމިޓެޑް" ނަމަކަށް ކިޔާ ކުންފުންޏަކުންކަމަށް ކަސްޓަމްސްއިން ވިދާޅުވެއެވެ.

މިމައްސަލައާ ގުޅިގެން ކަސްޓަމްސްއާއި ކަމާއިބެހޭ އެހެން އިދާރާތަކުން ބަލަންޖެހޭ ބެލުންތައް ބެލުމަށްފަހު ފުރިހަމަކުރަންޖެހޭ އިޖުރާއަތުތައް ފުރިހަމަކުރުމަށްފަހު މިދިޔަ މަހުގެ 22 ވަނަ ދުވަހު އެތަކެތި ނައްތާލާފައިވާކަމަށް ކަސްޓަމްސްއިން ވިދާޅުވެއެވެ.

ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކޮންޓްރޯލް ކުރުމުގެ ގާނޫނުގެ ދަށުން، މިޔަރަކީ ރާއްޖެއިން ބޭރުކުރުން މަނާތަކެތީގެ ތެރޭގައި ހިމެނޭ އެއްޗެކެެވެ. މިޔަރާއި މަޑީގެ ބާވަތްތަކަކީ ރާއްޖޭގެ މަސްވެރިކަމުގެ އާއްމު ގަވާއިދުގެ ދަށުން ހިފުމާއި ބޭނުން ކުރުމާއި ރާއްޖެއިން ބޭރަށް އެކްސްޕޯޓް ކުރުންވެސް މަނާ ބާވަތްތަކެވެ.