ކުޅިވަރު

ލިވަޕޫލް - ރާއްޖެ އެއްބަސްވުން: ކުޅިވަރުގެ އައު ޒަމާނަކަށް


ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސަރުކާރާ ހަވާލުވެވަޑައިގަތީ ރާއްޖޭގެ ފަތުރުވެރިކަން ފުޅާކުރައްވައި، އެހެން ހަރުފަތަކަށް ގެންދަވާނެކަމުގެ ވައުދުފުޅާއެކުއެވެ. އެގޮތުން ސްޕޯޓްސް ޓޫރިޒަމް ރާއްޖެއަށް ތާއާރަފުކޮށް ބޭރުގެ ބޮޑިތި ބްރޭންޑްތައް ރާއްޖެ ގެނައުމަކީ އެމިނަކުފާނުގެ ވިސްނުންފުޅެކެވެ.

އިނގިރޭސިވިލާތުގެ އެންމެ ކާމިޔާބު އެއް ކުލަބު ކަމަށްވާ ލިވަޕޫލާއެކު ރާއްޖެއިން ވެފައިވާ އެއްބަސްވުމަކީ މީގެ ފެށުމެކެވެ. މީގެ ކުރިން ރާއްޖޭގެ ރީތިކަން އިސްތިހާރު ކުރުމަށް ދުނިޔޭގެ ހައިބަތު ބޮޑު ކުލަބަކާއެކު މިހާ ފުޅާ ދާއިރާއެއްގައި މަސައްކަތް ކޮށްފައެއް ނުވެއެވެ.

ރައީސުލްޖުމްހޫރިއްޔާ އިނގިރޭސި ވިލާތަށް ކުރެއްވި ޒިޔާރަތުގައި އެޤައުމުގެ މަޝްހޫރު ފުޓްބޯޅަ ކްލަބް ލިވަޕޫލާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) ގުޅިގެން، ދިވެހިރާއްޖޭގެ ފަތުރުވެރިކަން އިސްތިހާރު ކުރުމަށް ކުރިއަށްގެންދާ ކޯ-ބްރޭންޑިންގ ކެމްޕޭން ފެށުމުގެ ހަރަކާތުގައި އަމިއްލަ ފުޅަށް ބައިވެރިވެވަޑައިގަތުމަކީ އެ މަނިކުފާނު މިކަމަށް ދެއްވާ އަހަންމިއްޔަތު ހާމަވެގެންދާ ހެއްކެކެވެ.

މި ކެމްޕެއިންގެ ދަށުން، ވިޒިޓް މޯލްޑިވްސް ބްރޭންޑް ވާސިލުވާ މިންވަރު އިތުރުކުރުމާއި ރާއްޖެ އަންނަ ފަތުރުވެރިންގެ ޢަދަދު އިތުރުކުރުމާއި ރާއްޖެއަށް މުހިންމު އިޤްތިޞާދީ މަންފާތައް ހޯދޭނޭ މަގުފަހިވާނެއެވެ. މީގެ އިތުރުން ފަތުރުވެރިކަމުގެ ދާއިރާގެ ތެރެއިން ރާއްޖެއަށް ކުޅިވަރުގެ ރޮނގުން ހޯދިދާނެ އެތަކެއް މަންފާއެއް އެބަހުއްޓެވެ.

ކުޅިވަރު ވަޒީރު އަބްދުﷲ ރާފިއު ވެސް ބައިވެރިވެވަޑައިގަންނަވާ މި ދަތުރުފުޅުގައި ކުޅިވަރުގެ އެކި ތަމްރީންތައް ހެދުމަށް ބޭނުން ތަފާތު އެކި ވަސީލަތްތަކުގެ މައުލޫމާތު މިހާތަނަށް ވަނީ ހޯއްދަވާފައެވެ.

ވަޒީރު އަބްދުﷲ ރާފިއު މަގާމާ ހަވާލުވެވަޑައިގެން އެންމެ ފުރަތަމަ ވެސް ކުރެއްވެވި މުހިންމު އެއްކަމަކީ ކުޅިވަރުގެ ދިގުރާސްތާ ޕްލޭނެއް އެކުލަވާލެއްވުމެވެ. މި ޕްލޭން އެކުލަވާލެއްވުމުގައި ބޭރުގެ ތަޖުރިބާކާރުންގެ އެހީތެރިކަން ހޯއްދެވެއިވެ. އަދި ހަމަ އެހެންމެ އެތުލީޓުން ކުރިއެރުވުމަށް މި ޕްލޭންގައި ހިމެނޭ އެންމެމުހިންމު އެއް ކަމަކަށް ވާނީ ރާއްޖޭގައި ހައިޕާފޯމެންސް ސެންޓަރުތަކެއް ގާއިމު ކުރުމެވެ. މިއީ ރައީސް ޑރ.މުޢިއްޒުގެ ރިޔާސީ ވައުދުފުޅެކެވެ.

މިއަދު ރާއްޖޭގެ ކުޅިވަރު އެތުލީޓުންނަށް އެންމެ މުހިންމު ވާނީ ބައިނަލްއަގުވާމީ މައިދާނުގައި ކާމިޔާބު ހޯދަން ކުރާ މަސައްކަތަށްޓަކައި، ހައިޕާފޯމެންސް ސެންޓަރުތަކެވެ. ވަޒީރު ވިދާޅުވާގޮތުންނަމަ "ޕޯޑިއަމް ފިނިޝިން" ދެވެނީ ހައިޕާފޯމެންސް ސެންޓަރުތަކުގައި ދެވެހި އެތުލީޓުން ތަމްރީނު ހޯދައިގެންނެވެ.

ރައީސުލްޖުމްހޫރިއްޔާ އަމިއްލަފުޅަށް މިކުގައި ބައިވެވަޑައިގަތުމަކީ ކުޅިވަރުގައި މިގައުމުން ކާމިޔާބު ހޯދާތަން ދެކެވަޑައިގަތުމަށް އެމަނިކުފާނު ބޭނުންވާ މިންވަރު ދޭހަކޮށްދޭ ކަމެކެވެ. މިހުވަފެން ދެކިގެން ނޫންގޮތަކަށް މެޑެލް ހޯދުމަކީ ފައްސޭހަކަމެއް ނޫންކަން އެކި އެތިލީޓުން މިއަދު ވެސް ދަނީ ސާބިތުކޮށްދެމުންނެވެ.

ރައީސުލްޖުމްހޫރިއްޔާ އިނގިރޭސިވިލާތައް ކުރެއްވި ދަތުރުފުޅުގައި ލިވަޕޫލް އެކަޑަމީގެ އިސް އޮފިޝަލުންނާ ބައްދަލު ކުރެއްވިއެވެ. އަދި ރާއްޖޭގެ ފަތުރުވެރިކަން އިސްތިހާރުކުރުމަށާއި ރާއްޖެއާއި ލިވަޕޫލް ކްލަބާ ދެމެދު އޮތް ޕާޓްނާޝިޕް އިތުރަށް ހަރުދަނާކުރުމަށް ޖޮއިންޓް މާކެޓިން އިނީޝިއޭޓިވްސްގެ އެކިއެކި ހަރަކާތްތައް ހިންގުމާ ގުޅޭ މަޝްވަރާތައް ކުރިއަށް ގެންދެވިއެވެ.

ލިވަޕޫލަކީ މުއްސަނދި ތާރީޚެއް އޮތް ގަދީމީ އިނގިރޭސި ކުލަބެކެވެ. އެފެންވަރުގެ ކުލަބެއްގެ އެކަޑަމީއެއް ރާއްޖޭގައި ގާއިމުކުރުމުގެ މަޝްވާރާތަކުގެ ފެށުމަށް މިދަތުރު ވުމަކީ ދިވެހި ފުޓްބޯޅަ ކުރިއެރުވުމަށާއި ފުޓްބޯޅައިގެ ދާއިރާއިން ކުރިއަށްދިއުމުގެ ހުވަފެން ދެކެމުން އަންނަ ކުދިންނަށް އާވި ވަރަށްބޮޑު އުންމީދެކެވެ.

ރާއްޖޭގައި ލިވަޕޫލުގެ އެކަޑަމީއެއް ގާއިމުކޮށް، ސްޕޯޓްސް ޓޫރިޒަމް ހަރުދަނާ ކުރުމާއި ޑެސްޓިނޭޝަން ބްރޭޑިން އިތުރުކުރުން ފަދަ ހަރަކާތްތައް ވެސް މި ކެމްޕޭންގައި ހިންގާނެކަމަށް އެމްއެމްޕީއާރްސީ ވަނީ މައުލޫމާތުދެއްވާފައެވެ. އެމްއެމްޕީއާރްސީން ވިދާޅުވިގޮތުގައި މި ކެމްޕޭނުގެ ސަބަބުން ރާއްޖެއަށް އިތުރަށް 100،000 އަށްވުރެ ގިނަ ފަތުރުވެރިން އަންނާނެއެވެ. 2.5 މިލިޔަން ޑޮލަރު އިންވެސްޓްކުރާ މި ކެމްޕެއިނުން 200 މިލިޔަން ޑޮލަރުގެ އާމްދަނީއެއް ލިބޭނެ ކަމަށް ވެސް ލަފާ ކުރެވެއެވެ.

ލިވަޕޫލް އެފްސީގެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރު"ގެ ގޮތުގައި ދިވެހިރާއްޖެ ހަމަޖެއްސީ ރާއްޖޭގެ ޓޫރިޒަމް ބްރޭންޑް ވާސިލުވާ މިންވަރު އިތުރުކޮށް، ރާއްޖެއަށް ޒިޔާރަތްކުރުމަށް އިތުރު ފަތުރުވެރިންނަށް ހިތްވަރު ދިނުމުގެ ގޮތުން، ތިން އަހަރާއި ހަ މަސް ދުވަހަށް ކުރިއަށް ގެންދާ ކެމްޕޭނެއްގެ ދަށުންނެވެ.

ޔޫރަޕްގެ އިތުރުން މުޅި ދުނިޔެއަށް ވެސް މި ކެމްޕޭންގެ ސަބަބުން ރާއްޖޭގެ ޓޫރިޒަމް ޕްރޮމޯޓްވާނެއެވެ. ލިވަޕޫލު އެފްސީ، އެވަޓަންއާ ދެކޮޅަށް ކުޅުނު މެޗުގައި ވެސް ވަނީ ރާއްޖެ އިސްތިހާރުކޮށްފައެވެ. ދަނޑުގެ ލެޑް ޕެނަލްތަކުގެ އިތުރުން ލިވަޕޫލްގެ ސޯޝަލްމީޑިއާ ޕްލެޓްފޯމުތަކުގައި ވެސް ރާއްޖެ ޕްރޮމޯޓްކުރިއެވެ.

އެމްއެމްޕީއާރުސީން ވިދާޅުވިގޮތުގައި، އިނގިރޭސި ޕްރިމިއާ ލީގުގެ ހޯމް މެޗުތަކުގައި އެލްއީޑީ ނިޝާން ފެންނާނެއެވެ. ސްޓޭޑިއަމްގެ އެކި ސަރަހައްދުތަކުގައި ރާއްޖޭގެ ޓޫރިޒަމް ބްރޭންޑިން ޖަހައި ލިވަޕޫލްގެ ރަސްމީ ޕަބްލިކޭޝަންތަކުގައި ވެސް ރާއްޖެ ޕްރޮމޯޓު ކުރާނެއެވެ. އަދި ޔޫރަޕްގެ އެކި ހިސާބުތަކުގައި މުހިންމު މާކެޓުތަކުގެ ފަތުރުވެރިންނަށް އަމާޒުކޮށްފައިވާ ބިލްބޯޑުތަކުން ރާއްޖެ ދައްކާލަން ހަމަޖެހިފައިވެއެވެ.

އެލްއެފްސީގެ ގްލޯބަލް އޯޑިއަންސްގައި 205 މިލިޔަން ފޮލޯވަރުންނާއި ކޮންމެ ސީޒަނަކަށް 211 މިލިޔަނަށް ވުރެ ބޮޑު ޓީވީ އޯޑިއަންސަކާއި 53 މިލިޔަން ސޯޝަލް އަދި ޑިޖިޓަލް ފޮލޯވަރުން ހިމެނެއެވެ. މި ހުރިހާ ހަރަކާތެއްގެ ތެރެއިން މުޅި ދުނިޔޭގެ ލޯ ހުއްޓޭނީ އެންމެ ގިނަބަޔަކު ބަލާ އެންމެ ބޮޑު ލީގުގެ ތެރެއިން ރާއްޖޭގެ ރީތަކަމާ ދިމާއަށެވެ.

އެމްއެމްޕީއާރްސީން ފެށި މަސައްކަތުގެ ދަށުން މިދިޔަ މަހު އިންޑިއާގެ މަޝްހޫރު ކްރިކެޓް ޓީމު، މުމްބާއީ އިންޑިއަންސްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށްވެސް އެ ރާއްޖެ ވަނީ ހުސްވިމަހު ހަމަޖައްސާފައެވެ.

ދުނިޔޭގައި ދެވަނައަށް އެންމެ ގިނައިން މީހުން ބަލާ ކުޅިވަރަކީ ކްރިކެޓެވެ. މި ޕާޓްނާޝިޕްގެ ސަބަބުން އިންޑިއާއާއި މުޅި ދުނިޔޭގައިވެސް ދިވެހިރާއްޖޭގެ ބްރޭންޑް ހަރުދަނާވާނެކަމަށް އެމްއެމްޕީއާރުސީން ވިދާޅުވިއެވެ. މި ޕާޓްނަޝިޕާ ގުޅޭގޮތުން އެމްއެމްޕީއާރުސީގެ ސީއީއޯ އަދި އެމްޑީ އިބްރާހީމް ޝިއުރީ މީގެ ކުރިން ވިދާޅުވީ، ކްރިކެޓަކީ މުޅި ދުނިޔޭގެ އެތައް ގައުމެއްގެ އެތައް މިލިޔަން ބައެއްގެ ހިތްތަކުގައި ޚާއްސަ ޖާގައެއް އޮތް ކުޅިވަރެއްކަމަށެވެ. އަދި އިންޑިއާގެ އެންމެ ފާހަގަކޮށްލެވޭ ކްރިކެޓް ޓީމާ ގުޅުމުގެ ސަބަބުން އިންޑިއާ ފަތުރުވެރިން ޗުއްޓީ ހޭދަކުރުމަށް އިސްކަންދޭ މަންޒިލެއްގެ ގޮތުގައި ދިވެހިރާއްޖެ ވާނެކަމަށްވެސް އޭނާ ފާހަގަކުރެއްވިއެވެ.

މި ހުރީހާ ސަބަބުތަކާއެކު ފަތުރުވެރިކަމުގެ ދާއިރާގެ އެހީތެރިކަމާއެކު ރާއްޖެ މިދަނީ ކުޅިވަރު އާ ޒަމާނަކަށެވެ.