ޚަބަރު

ދުނިޔޭގެ އެންމެ އުސް ޕްރީކާސްޓް ތަނބު ތިލަމާލެ ބްރިޖުގައި ޤާއިމްކޮށްފި


  • ޕްރީކާސްޓްގެ އުސް މިނަކީ 8.2 މީޓަރު

  • ފުޅާ މިނަކީ 25.3 މީޓަރު

  • ބަރުދަނަކީ 216.04 މެޓްރިކް ޓަން

ތިލަމާލެ ބުރިޖުގެ އެންމެ އުސް ޕްރީކާސްޓް ތަނބު ޤާއިމުކޮށްފިއެވެ. ތިލަމާލޭ ބްރިޖަކީ ގްރޭޓަރ މާލޭ އޭރިއާގެ ތަރައްޤީއާއި ގުޅިފައިވާ މުހިއްމު މަޝްރޫޢެކެވެ. މިގޮތުން އިޤްތިޞާދީ އަދި އިޖުތިމާޢީ އެތައް ބަދަލަކާއި ގުޅިފައިވާ މިމަޝްރޫޢު ނިމިގެންދިޔުމަކީ މިސަރަޙައްދުގެ ރައްޔިތުންގެ އޮތް ބޮޑު އުއްމީދެކެވެ.

އިންޑިއާ ހައިކޮމިޝަނުން އެކްސްގައި ކޮށްފައިވާ ޕޯސްޓެއްގައި ވަނީ އެގައުމުގެ އެފްކޮންސް ކުންފުނިން ކުރިއަށްގެންދާ މި މަޝްރޫއުގެ ދަށުން، ދުނިޔޭގެ ވެސް އެންމެ އުސް މިފަދަ ޕްރިކާސްޓް ތަނބު ތިލަމާލެ ބްރިޖުގައި ޤާއިމުކޮށްފައިވާކަމަށެވެ.

އެ ޕްރީކާސްޓް ގައި 8.2 މީޓަރުގެ އުސްމިން ހުންނައިރު، 25.3 މީޓަރުގެ ފުޅާމިން ހުންނަ ކަމަށް އެ ކޮމިޝަނުން މައުލޫމާތުދީފައިވެއެވެ. އަދި، 216.04 މެޓްރިކް ޓަނުގެ ބަރުދަން ހުންނަ އެ ޕްރީކާސްޓް ގާއިމުކުރެވުމަކީ އިންޖީނިއަރިން ދާއިރާއަށް ލިބުނު ކުރިއެރުމެއްކަމަށް ކޮމިޝަނުން ވިދާޅުވެއެވެ.

މި ކާމިޔާބީއާއި ގުޅިގެން އިމާރާތްކުރުމާ ގެދޮރުވެރިކަމާ ބިނާރާބެހޭ ވަޒީރު ޑރ. ޢަބްދުﷲ މުއްޠަލިބް އެކްސްގައި ކުރެއްވި ޕޯސްޓެއްގައި ވިދާޅުވީ މި ކާމިޔާބީއާއެކު މަސައްކަތުގެ ދުވެލި އަވަސްވެ، ތާވަލާ އެއްގޮތަށް މަސައްކަތް ނިންމޭނެކަމަށް އުންމީދު ކުރައްވާ ކަމަށެވެ.

އަދި އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު ޖީ. ބަލަސުބްރަމާނިއަމް މި މަޝްރޫއަށް ބަހައްޓަވާ އަހަންމިއްޔަތުކަން ފާހަގަކުރައްވާ ވަޒީރު ވަނީ ސަފީރަށް ޝުކުރު އަދާކުރައްވާފައެވެ.

މި މަޝްރޫއުގެ ޓައިމްލައިންގައިވާ ގޮތުން މާލެއިން ގުޅިފަޅަށް މަސައްކަތްތައް ނިންމުމަށް ތާވަލުކޮށްފައިވަނީ އަންނަ އަހަރުގެ މާރިޗު މަހުގެ ނިޔަލަށެވެ. ގުޅިފަޅުން ތިލަފުއްޓަށް ގުޅާލާ ބްރިޖުގެ މަސައްކަތް ނިންމުމަށް ތާވަލުކޮށްފައިވަނީ އަންނަ އަހަރުގެ ސެޕްޓެމްބަރުގެ ނިޔަލަށެވެ. މިއާއެކު މުޅި މަޝްރޫޢު ނިމޭނެކަމަށް ޓައިމްލައިންގައި ހިމަނާފައިވަނީ 30 ސެޕްޓެމްބަރު 2026 އަށް ކަމަށް އިމާރާތްކުރުމާއި ބިނާރާބެހޭ ވުޒާރާއިން ވިދާޅުވެއެވެ.

މި މަޝްރޫއުގެ ދަށުން ޤާއިމްކުރާ 3 ބުރިޖާއި، ކޯސްވޭ އަދި މަގުތަކުގެ ނެޓްވޯކުގެ ދިގުމިނުގައި 6.7 ކިލޯމީޓަރު ހުންނާނެއެވެ. މީގެއިތުރަށް ގުޅާލާ، ކޮންމެ ރަށަކަށް އަރާ ފޭބުމަށް އިންޓަރޗޭންޖް ޕޮއިންޓްތަކާއި، ޕާކިން ސަރަހައްދުތައްވެސް ހުންނާނެއެވެ.