ރާއްޖޭގެ އާމާޒަކީ 2035 ވަނަ އަހާރާއި ހަމައަށްދާއިރު ވިހަގޭސް ބޭރުކުރާ މިންވަރު 1.5 މިލިޔަން ޓަނަށް މަދުކުރުން

ސަރުކާރުގެ އާމާޒަކީ 2035 ވަނަ އަހާރާއި ހަމައަށްދާއިރު ޖައްވަށްދޫކުރާ ވިހަގޭހުގެ މިންވަރު 1.5 މިލިޔަން ޓަނަށް މަދުކުރުންކަމަށް ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހިމް ވިދާޅުވެއްޖެވެ.

ވަޒީރު މިހެން ވިދާޅުވީ އދ. އާންމު މަޖިލީހުގެ 80 ވަނަ ސެޝަންގެ ހަވާސާގައި ޕެރިސް އެއްބަސްވުމާއި ގުޅޭގޮތުން އިންތިޒާމުކުރި ހަރަކާތުގައި ވާހަކަ ދައްކަވަމުންނެވެ.

ޕެރިސް އެއްބަސްވުމަކީ 2015 ވަނަ އަހަރު 195 ޤައުމަކުން މޫސުމަށް އަންނަ ބަދަލުތަކާއި ދެކޮޅަށް މަސައްކަތް ކުރުމަށް ސޮއިކޮށް ތަންފީޒުކުރަމުންދާ އެއްބަސްވުމެކެވެ. އެ އެއްބަސްވުމަށް 10 އަހަރު ފުރުމުގެ މުނާސަބާގައި ރާއްޖެއިން "ޑިކޭޑް އޮފް ޕެރިސް އެގްރިމެންޓް: ދަ މޯލްޑިވްސް ކްލައިމެޓް އެކްޝަން އެންޑް ޕާޓްނަރޝިޕް ފޮރ ރެޒިލިއެންސް" ނަމުގައި ކުރިއަށް ގެންދިޔަ ބައްދަލުވުމުގައި ޤައުމުތަކުގެ މަންދޫބުންނާއި ދާއިރާގެ ތަޖުރިބާކާރުން ބައިވެރިވެވަޑައިގެންނެވިއެވެ. މި ބައްދަލުވުމުގެ ބޭނުމަކީ، ޕެރިސް އެގްރިމެންޓުގައި ސޮއިކުރި ފަހުން ރާއްޖެއިން މިހާތަނަށް، ހޯދާފައިވާ ކުރިއެރުންތައް ދައްކުވައިދިނުން ކަމަށް ޚާރިޖީ ވުޒާރާއިން ވިދާޅުވިއެވެ.

މި ބައްދަލުވުމުގައި ވާޙަކަދައްކަވަމުން ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހިމް ވަނީ ދިވެހިރާއްޖޭގެ މޫސުމީ ބަދަލުތަކާއި ދެކޮޅަށް މަސައްކަތް ކުރުމުގެ ސިޔާސަތު މި ވޭތުވެދިޔަ 10 އަހަރު ތެރޭގައި ބަދަލުވެގެން އައިގޮތް ހިއްސާކޮށްދެއްވާފައެވެ.

Proud to host the Maldives’ #UNGA80 side event: Decade of Paris Agreement - Climate Action and Partnerships for Resilience.

As we mark a decade since the adoption of the Paris Agreement, we have worked to translate that ambition into action. From transformative partnerships over… pic.twitter.com/4gQcY3BWwb

— Thoriq Ibrahim (@Thoriqibrahim) September 23, 2025

ވަޒީރު ވިދާޅުވީ މިއަހަރުގެ ފެބްރުއަރީމަހު 3 ވަނަ ނޭޝަނަލީ ޑިޓާމައިންޑް ކޮންޓްރިބިއުޝަން ހުށަހަޅާފައިވާކަމަށާއި މި ޕްލޭނަކީ، ޤައުމުތަކުން ޖައްވަށް ދޫކުރާ ވިހަ ގޭސްތައް މަދުކުރުމުގެ ސިޔާސަތާއި އަމާޒުތައް ހިމަނައިގެން ކޮންމެ ފަސް އަހަރަކުން ތައްޔާރުކުރާ ޕްލޭނެއްކަމަށެވެ. މިއަހަރު ރާއްޖެއިން ހުށަހަޅި ޕްލޭނުގައި ޖައްވަށް ދޫކުރާ ކާބަންގެ މިންވަރު 2035 ވަނަ އަހަރާއި ހަމައަށް ދާއިރު 1.52 މިލިޔަން ޓަނަށް މަދުކުރަން އަމާޒު ހިފާފައިވާކަމަށް ތިމާވެއްޓާއި ބެހޭ ވާޒީރު ވިދާޅުވިއެވެ. އަދި މިކަން ކުރާނީ ވިލުންތެރި ހަކަތައިގެ ދައިރާއާއި ދަތުރުފަތުރުގެ ދާއިރާއާއި ކުނި ނައްތާލުމުގެ ދާއިރާ އިތުރަށް ވަރުގަދަކޮށްގެން ކަމަށްވެސް ވަޒީރު ވިދާޅުވިއެވެ.

މި ބައްދަލުވުމުގެ ތެރެއިން ހާއްސަ ޕެނަލް ޑިސްކަޝަނެއްވެސް ކުރިއަށް ގެންގޮސްފައިވެއެވެ. މި ޕެނަލުގައި ޤައުމުތަކާއި ތިމާވެށީގެ މައްސަލަތަކުގައި މަސައްކަތް ކުރާ ބައިނަލްއަޤްވާމީ ޖަމާޢަތްތަކުގެ މަންދޫބުން ބައިވެރިވިއެވެ. އެފަރާތްތަކުން ވަނީ ދެމެހެއްޓެނިވި ގުޅުމެއްގެ ތެރެއިން، ޤައުމީ ފެންވަރުގައި މޫސުމަށް އަންނަ ބަދަލުތަކަށް އިޖާބާ ދިނުމަށް ކުރެވޭނެ ކަންކަމާޢި ގުޅޭގޮތުން މަޝްވަރާކޮށްފައެވެ.

My message at the #UNGA80 Maldives Side Event entitled Decade of Paris Agreement: Maldives Climate Action and Partnerships for Resilience was this:

The lessons of the past ten years are clear: ambition without implementation achieves little. For the Maldives, this means calling… pic.twitter.com/EuBGdacHcu

— Abdulla Khaleel (@abkhaleel) September 24, 2025

ރާއްޖެއިން ބޭއްވި މި ބައްދަލުވުމުގައި ޚާރިޖީ ވަޒީރު އަބްދުﷲ ޚަލީލް ވިދާޅުވީ، ޤައުމުތަކުގެ ގުޅުމަކީ މޫސުމަށް އަންނަ ބަދަލުތަކާއި ދެކޮޅަށް ކުރެވޭ މަސައްކަތުގައި ރާއްޖެއަށް އެންމެ މުހިންމު އެއް އަސާސްކަމަށެވެ. އަދި ރާއްޖެއިން މިހާރު ހުށަހަޅާފައިވާ އެންޑީސީ ޕްލޭނު ބިނާވަނީ މާލީ ގޮތުންނާއި ޓެކްނޮލޮޖީގެ ގޮތުން ޤާބިލީއްޔަތުކަން އިތުރު ކުރުމަށް ކުރެވޭ މަސައްކަތްތަކަށްކަމަށް ވަޒީރު ވިދާލުވިއެވެ. ވަޒީރު ޚަލީލް ވަނީ ކުރިއަށް އޮތް 10 އަހަރު ޕެރިސް އެގްރިމެންޓް ތަންފީޒުކުރުން އިތުރަށް ފުޅާކޮށް ކުރިއެރުވުމަށް ގޮވާލައްވާފައެވެ.