ފަޑިޕްގެ ދަށުން ދޫކުރާ ލޯނަށް އެދުމުގެ ފުރުޞަތު ހުޅުވާލައިފި

އިންޓަރނޭޝަނަލް ފަންޑް ފޮރ އެގްރިކަލްޗަރަލް ޑިވެލޮޕްމަންޓް- އިފާޑްގެ ލޯނު އެހީގައި ފިޝަރީޒް އެންޑް އެގްރިކަލްޗަރ މިނިސްޓްރީން ގެންދަވަނީ ފިޝަރީޒް އެންޑް އެގްރިކަލްޗަރަލް ޑައިވަރސިފިކޭޝަން ޕްރޮގްރާމެއް ހިންގަވަމުންނެވެ. މި ޕްރޮގްރާމްގެ މައިގަނޑު ބޭނުންތަކުގެ ތެރޭގައި މަސްވެރިކަމާއި ދަނޑުވެރިކަމަކީ، ޒުވާނުން ޝައުޤުވެރިވާ ސިނާޢަތަކަށް ހެއްދެވުމަށް ސަރުކާރުން ކަނޑައަޅުއްވާފައިވާ އަމާޒު ޙާޞިލްކުރެއްވުން ހިމެނެއެވެ. މިކަމަށްޓަކައި، މަސްވެރިކަމާއި ދަނޑުވެރިކަމުގެ އުފެއްދުންތައް މާރކެޓްކުރައްވައި، ވިޔަފާރީގެ އާ ފުރުޞަތުތައް ކޯޕަރޭޓިވް ސޮސައިޓީތައް މެދުވެރިކޮށް ރައްޔިތުންނަށް ފޯރުކޮށްދެއްވައި، މިކަމަށް ޒުވާނުން އަހުލުވެރިކުރުވުމަށް ގެންދަވަނީ މަސައްކަތްކުރައްވަމުންނެވެ.

މިގޮތުން މަސްވެރިކަމާއި ދަނޑުވެރިކަމުގައި ޙަރަކާތްތެރިވާ ކޯޕަރޭޓިވް ސޮސައިޓީ އަދި މަސްވެރިކަމާއި ދަނޑުވެރިކަމުގެ ވެލިޔު އެޑަޑް ބާވަތްތައް ތައްޔާރުކުރާ ފަރާތްތަކަށް ހުޅުވާލި ލޯނުގެ ފުރުޞަތަކީ މިޕްރޮގްރާމްގެ ދަށުން ހުޅުއްވާލެއްވި ފުރުޞަތެކެވެ. މި ލޯނަށް އެދުމުގެ ސުންގަޑިއަކީ އަންނަ މަހުގެ 22 ވަނަ ދުވަހެވެ. 

img:http://s3.psmnews.mv/images/660x400/7810.jpg|ދިވެހި އުފެއްދުންތަކެއް / ފޮޓޯ: ޕީއެސްއެމް

މި ފިޔަވަހީގެ ދަށުން ލޯނު ދޫކުރެއްވުމަށް ހަމަޖެހިފައިވަނީ މި ޕްރޮގްރާމްގެ ބައިވެރިންގެ ގޮތުގައި މަސައްކަތްކުރަމުން އަންނަ ކޯޕަރޭޓިވް ސޮސައިޓީތަކާއި އެ ސޮސައިޓީތަކަށް ނިސްބަތްވާ މެންބަރުންނާއި އެ ސޮސައިޓީތަކަށް މަސްވެރިކަމާއި ދަނޑުވެރިކަމުގެ ބާވަތްތައް ސަޕްލައިކުރާ ފަރާތްތަކަށް ކަމަށް ފިޝަރީޒް އެންޑް އެގްރިކަލްޗަރ މިނިސްޓްރީން ވިދާޅުވެއެވެ. މީގެ އިތުރުން މި ކޯޕަރޭޓިވް ސޮސައިޓީތައް ޤާއިމްކޮށްފައިވާ އަތޮޅެއްގައި ދަނޑުވެރިކަމުގެ މަސައްކަތުގައި ޝާމިލްވެ އުޅޭ ނުވަތަ މަހުގެ ތަފާތު އުފެއްދުންތައް ތައްޔާރުކުރުމުގައި ޙަރަކާތްތެރިވާ ފަރާތްތަކަށްވެސް ވަނީ މި ލޯނަށް އެދުމުގެ ފުރުޞަތު ވަނީ ހުޅުއްވާލައްވާފައެވެ.

މިފަހަރު ލޯނުގެ ގޮތުގައި މިނިސްޓްރީ އޮފް ފިޝަރީޒް އެންޑް އެގްރިކަލްޗަރުން ދޫކުރައްވާ އެންމެ ބޮޑު އަދަދަކީ ހަތަރު ސަތޭކަ ހާސް ރުފިޔާއެވެ. އަދި އެންމެ ކުޑަ އަދަދަކީ ސަތޭކަ ހާސް ރުފިޔާއެވެ. މި ލޯނުތައް އަނބުރާ އަދާކުރުމުގެ އެންމެ ދިގު މުއްދަތަކީ ފަސް އަހަރެވެ.  ލޯނުތަކުގެ އިންޓްރަސްޓް ރޭޓަކީ ހަ ޕަސެންޓެވެ. މު މުއްދަތު ގުނާނީ ގިނަވެގެން ހަ މަސްދުވަހުގެ ގްރޭސް ޕީރިއަޑަކަށްފަހު ކަމަށާއި އަދި ގްރޭސް ޕީރިއަޑްގައި ހޭދަވާ ދުވަސްތަކަށް ދައްކަންޖެހޭނީ ހަމައެކަނި އިންޓްރަސްޓަށްވާ ފައިސާކަމަށް އެމިނިސްޓްރީން ވިދާޅުވެއެވެ.

img:http://s3.psmnews.mv/images/660x400/6564.jpg|ނައިފަރު ކޯޕަރޭޓިވް ސޮސައިޓީގެ އުފެއްދުންތަކެއް / ފޮޓޯ: ނައިފަރު ކޯޕަރޭޓިވް ސޮސައިޓީ

ފަޑިޕް ޕްރޮގްރާމާ ގުޅިގެން މަސައްކަތްކުރަމުން އަންނަ ކޯޕަރޭޓިވް ސޮސައިޓީތަކުން މިހާރުވެސް އަންނަނީ މަހުގެ ތަފާތު ވެލިއު އެޑަޑް އުފެއްދުންތައް ރާއްޖޭގެ ބާޒާރަށް ނެރެމުންނެވެ. ވެލިއުޗެއިން ކޯޕަރޭޓިވް އަދި ކުންފުނިތައް މެދުވެރިކޮށް، ކުދި ވިޔަފާރިއާއި މެދުފަންތީގެ ވިޔަފާރީގައި ދަނޑުވެރިންނާއި މަހުގެ އުފެއްދުންތައް ތައްޔާރުކުރާ ފަރާތްތަކުގެ އުފެއްދުންތަކަށް ވެލިއު އެޑްކުރުމާއި މާރކެޓް ހޯދައިދީ ދެމެހެއްޓެނިވި ގޮތެއްގައި އެފަރާތްތަކަށް އާމްދަނީ ލިބޭނެގޮތް މަގުފަހިކޮށްދިނުމުގެ މަޤްޞަދުގައި ސަރުކާރުން ހިންގަވަމުންގެންދަވާ މި ޕްރޮގްރާމްގެ ދަށުން ރާއްޖޭގައި މިހާރު 8 ކޯޕަރޭޓިވް ސޮސައިޓީ ޙަރަކާތްތެރިވެއެވެ.