އިކޮނިމިކް މިނިސްޓްރީން ގެންދަވަނީ އެ މިނިސްޓްރީން ދެއްވާ ޚިދުމަތްތައް ވީހާވެސް ފަސޭހަކަމާއެކު ޢާންމުންނާ ހަމައަށް ފޯރުކޮށްދެއްވުމަށް ގިނަމަސައްކަތްތަކެއް ކުރައްވަމުންނެވެ.
މިގޮތުން ރާއްޖޭގެ އެކި ކަންކޮޅުތަކުގައި ތިބި ރައްޔިތުންނަށް ވީހާވެސް ފަސޭހަކޮށް އެމިނިސްޓްރީގެ ޚިދުމަތްތައް ފޯރުކޮށްދިނުމަށްޓަކައި، އެ މިނިސްޓްރީން ދެއްވާ ގިނަ ޚިދުމަތްތައް ބިޒްނަސް ސަރވިސް އެޖެންޓުން މެދުވެރިކުރައްވައި ދެއްވުމަށް 9 ފަރާތަކަށް ކަމާބެހޭ ލިޔުން އެމިނިސްޓްރީން ވަނީ ހަވާލުކުރައްވާފައެވެ.
ބިޒްނަސް ސަރވިސް އެޖެންޓުންނަށް ކަމާބެހޭ ލިޔުން ދެއްވުމުގެ ރަސްމިއްޔާތުގައި އިކޮނޮމިކް މިނިސްޓަރ މުޙައްމަދު ސަޢީދު ވަނީ ރާއްޖޭގެ ރަށްތައް އުފެދިފައިވާ ގޮތަށް ބަލާއިރު، ރާއްޖޭގެ އެކި ސަރަޙައްދުތަކުގައި ތިބި ރައްޔިތުންނަށް ޚިދުމަތް ދެއްވުމުގައި ހުރި ދަތިތަކަށް ބައްލައްވައި މިފަދަ އެޖެންޓުން މެދުވެރިކޮށް ޚިދުމަތް ދެއްވަން ފެއްޓެވުމުން، ރަށްރަށުގައި ތިބި ރައްޔިތުންނަށް ވަރަށް ބޮޑެތި ފަސޭހަތަކެއް ލިބިގެންދާނެކަމަށް ވިދާޅުވެފައެވެ. އަދި މިއީ ފެށުމެއްކަމަށާއި މި ފެށުން ޕާރޓްނަރޝިޕްގެ ގޮތުގައި މަސައްކަތްކުރާނަމަ ވަރަށް ބޮޑަށް ފުޅާވެގެންދާނެކަމަށްވެސް މިނިސްޓަރ ވިދާޅުވިއެވެ.
މިއީ އެމިނިސްޓްރީން ދެއްވާ ޚިދުމަތްތަކުގައި ޕްރައިވެޓް ސެކްޓަރގެ ދައުރު ހިމަނުއްވައި ޢާންމުންނަށް ޚިދުމަތް ދެއްވުމަށް ކުރައްވާ މަސައްކަތެއްކަމަށްވެސް މިނިސްޓަރ ވިދާޅުވިއެވެ.
img:http://s3.psmnews.mv/images/660x400/14719580122283.jpg|އިކޮނޮމިކް މިނިސްޓަރ މުޙައްމަދު ސައީދު - ފޮޓޯ: ވަޙީދު، ޕީއެސްއެމް
''އަޅުގަނޑުމެން މި ޚިދުމަތް ތިބޭފުޅުންނަށް މި ދެނީ އެޚިދުމަތްތައް އައުޓްސޯސްކުރުމަށްޓަކައި. އަޅުގަނޑު ދެކޭގޮތުގައި މިއީ ފެށުމެއް. މި ފެށުމުގެ ޕާޓްނަރޝިޕްގެ ގޮތުގައި މަސައްކަތްކުރާނަމަ ވަރަށް ބޮޑަށް މީތި ފުޅާވެގެންދާނެ. ކުރަން މި އުޅޭ މަސައްކަތަކީ ޕްރައިވެޓް ސެކްޓަރ އެންގޭޖްކޮށް ރައްޔިތުނަށް ދޭ ޚިދުމަތްތައް އިތުރުކުރުން. މިދާއިރާއިން މީހުން ތަމްރީނުކުރުމުގެ މަސައްކަތްތައްވެސް އެބަ ކުރަން އަޅުގަނޑުމެން.'' އިކޮނޮމިކް މިނިސްޓަރ ސައީދު ވިދާޅުވިއެވެ.
މިއީ ވިޔަފާރިއާބެހޭ ޚިދުމަތްތައް ޢާންމު ރައްޔިތުންނަށް ވީހާވެސް ފަސޭހައިން ލިބޭނެ އިންތިޒާމު ހަމަޖެއްސެވުމުގެ ގޮތުން ނިންމެވި ނިންމެވުމެއްކަމަށް އެމިނިސްޓްރީން ވިދާޅުވެއެވެ. ޕްރައިވެޓް ސެކްޓަރާ ޙަވާލުކުރައްވައިގެން އިކޮނޮމިކް މިނިސްޓްރީން ޚިދުމަތްތަކެއް ދެއްވޭނެ އިންތިޒާމް ހަމަޖެއްސެވި ނަމަވެސް، އެފަދަ ޚިދުމަތްތައް އެ މިނިސްޓްރީންވެސް ދެއްވަމުން ގެންދަވާނެއެވެ.
މައިގަނޑު ގޮތެއްގައި 14 ބާވަތެއްގެ ޚިދުމަތެއް ޕްރައިވެޓް ސެކްޓަރ މެދުވެރިކުރައްވައި ދެއްވުމަށް ހަމަޖެހިފައިވާއިރު އޭގެތެރޭގައި 4 ބާވަތުގެ ވިޔަފާރިއާއި ރެޖިސްޓްރީ އަދި އެކިކަހަލަ ޕާރމިޓްތައް އަދި ލައިސަންސްތަކަށް އެދުމުގެ ޚިދުމަތް އެޖެންޓުން މެދުވެރިކޮށް ޢާންމުންނަށް ލިބިގެންދާނެއެވެ.
img:http://s3.psmnews.mv/images/660x400/14719580617251.jpg|ރެޖިސްޓަރ އޮފް ކޮމްޕެނީސް މަރިޔަމް ވިސާމް- ފޮޓޯ: ވަޙީދު، ޕީއެސްއެމް
ރެޖިސްޓަރ އޮފް ކޮމްޕެނީސް މަރިޔަމް ވިސާމް ވިދާޅުވީ މާލޭގެ އިތުރުން ރާއްޖޭގެ އެކިކަންކޮޅުތަކުގައި އެކި ޚިދުމަތްތައް ދެއްވުމަށް ވަރަށްބޮޑު އަހަންމިއްޔަތެއް ދެއްވާކަމަށެވެ. މިގޮތުން މިހާތަނަށް އާބާދީގެ ދެހާހުން މަތީގެ ރަށްރަށަށް އަމާޒުކުރައްވައިގެން މި މަސައްކަތް ކުރިއަށް ގެންދާއިރު ޅ. އަތޮޅު އެކީ ކަވަރކުރެވިފައިވާ ކަމަށާއި މިމަހުގެ ތެރޭގައި ހ.އ އަތޮޅު އެކީ ކަވަރކުރުމަށް މަސައްކަތް ކުރައްވަމުން ގެންދަވާކަމަށެވެ.
''އެގޮތުން ޅ. އަތޮޅުގެ ލިޔެކިޔުންތައް މިހާރު އެކްސްޗޭންޖް ނުކުރާނެ އީމެއިލް މެދުވެރިކޮށް. އޭގެ ބަދަލުގައި އަމިއްލަ ފަރުދުންނަށް ވިޔަފާރި ރަޖިސްޓަރ ފަދަ ތަކެތި ބިޒްނަސް ޕޯޓަލް މެދުވެރިކޮށް މަޢުލޫމާތު ޙިއްޞާކުރާނީ. އޭގެ ނަތީޖާއެއްގެ ގޮތުން ގިނަވަގުތުތަކެއް މަޑުކުރަން ނުޖެހި ވީހާވެސް އަވަހަށް ޚިދުމަތް ލިބިގެންދާނެ. އަދި މިމަހުގެ ތެރޭގައި ހއ. އެކީ އެކައްޗަކަށް ކަވަރ ކުރަން މަސައްކަތްކުރަމުން މިދަނީ. '' ރެޖިސްޓަރ އޮފް ކޮމްޕެނީސް މަރިޔަމް ވިސާމް ވިދާޅުވިއެވެ.
މީގެ އިތުރުން ރާއްޖޭގެ 18 ސަރަޙައްދެއް ކުރިއަށް އޮތްތަނުގައި ކަވަރކުރެއްވުމަށް މަސައްކަތްތަކެއް ކުރައްވަމުން ގެންދަވާކަމަށްވެސް ވިސާމް ވިދާޅުވިއެވެ.