ވޯލްޑް ބޮޑީބޯޑިން ޗެމްޕިއަންޝިޕުގައި ވާދަކުރާ ޤައުމީ ބޮޑީބޯޑިން ޓީމަށް ވެސް ދިވެހިންގެ ސަޕޯޓާއި ލޯބި ލިބުމަށް އެދޭކަމަށް ބޮޑީބޯޑިން އެސޯސިއޭޝަން އޮފް މޯލްޑިވްސް (ބީބީއޭއެމް) ގެ ޖެނެރަލް ސެކްރެޓަރީ ހަސަން ރަޝީދު (ރަޝް) ބުނެފިއެވެ.
ޓީމާއެކު މުބާރާތަށް ފުރުމުގެ ކުރިން "ޕީއެސްއެމް ނިއުސް" އާ ވާހަކަދައްކަވަމުން ރަޝީދު ވަނީ، މިއީ ޓީމެއްގެ ގޮތުގައި ޤައުމީ ބޮޑީބޯޑިން ޓީމުން ބައިނަލްއަގްވާމީ ފުރަތަމަ މުބާރާތްކަން ފާހަގަކުރައްވައި، މި މުބާރާތަށް ދަނީ ރާއްޖޭގައި ތިބި އެންމެ ސީނިއަރ ބޮޑީބޯޑަރުން ކަމަށާއި، ލީގުގައި އެންމެ ރަނގަޅު ނަތީޖާ ނެރެފައިވާ އެތުލީޓުންކަން ފާހަގަކުރައްވާފައެވެ.
އަދި މުބާރާތުގައި ވާދަކުރާ އެހެން ޤައުމުތަކުގެ އެތުލީޓުންނަކީ، ރާއްޖޭގައި ބޭއްވި ވޯލްޑް ސީރީޒް ބޮޑީބޯޑިން އިވެންޓުތަކުގައި ބައިވެރިވެފައިވާ އެތުލީޓުންކަމަށް ވުމުން، ރާއްޖޭގެ އެތުލީޓުންގެ މެދުގައި ވަރަށް ބޮޑު ޔަގީންކަމެއް އޮތްކަން ޙަސަން ރަޝީދު ވިދާޅުވިއެވެ.
ފާއިތުވީ މަހެއްހައި ދުވަހުގެ ތެރޭގައި "އެންޑިއުރެންސް ބިލްޑިންގް" އަދި ފިޓްނަސް ދެމެހެއްޓުމުގެ ގިނަ ތަމްރީނުތަކެއް ޓީމުގެ ފަސް އެތުލީޓުން ކޮށްފައިވާކަމަށާއި ވަރަށް ރަނގަޅަށް މުބާރާތަށް ތައްޔާރުވެވުނުކަމަށް ގަބޫލުކުރާތީ، މި މުބާރާތުގައި ރަނގަޅު ކާމިޔާބީއަކާ ހަމައަށް ވާސިލްވެވޭނެކަމުގެ ބޮޑު އުއްމީދެއް އޮތްކަމަށް ވެސް އޭނާ ވިދާޅުވިއެވެ.
އެހެންކަމުން، ވީހާވެސް ގިނަ ބައެއްގެ ސަޕޯޓަށް އެދޭކަމަށާއި ކާމިޔާބީ ހޯދަން ބުރަ މަސައްކަތްތަކެއް ކުރާނެކަމަށް ޙަސަން ރަޝީދު ވިދާޅުވިއެވެ.
"ވީހާވެސް ގިނަބަޔަކު އަޅުގަނޑުމެންނަށް ސަޕޯޓު ކޮށްދިނުން އަޅުގަނޑުމެންގެ އެދުމަކީ. ދެން ރަނގަޅު ކާމިޔާބީއެއް މިންވަރުކުރެއްވުން އަޅުގަނޑުގެ ދުޢާ އަކީ". ޓީމުން ދިވެހިންގެ ސަޕޯޓަށް އެދޭކަން ހާމަކޮށް ޙަސަން ރަޝީދު ވިދާޅުވިއެވެ.
އިންޓަނޭޝަނަލް ބޮޑީބޯޑިން ކޮމިޓީ (އައިބީސީ) ގެ ވޯލްޑް ޓުއަރގެ ފުރަތަމަ އިވެންޓުގައި ވާދަކުރުމަށް ރާއްޖޭގެ ޤައުމީ ބޮޑީބޯޑިން ޓީމުން ފުރާފައިވާއިރު، ބީބީއޭއެމް އިން މި މުބާރާތަށް ނެގި ސްކޮޑުގައި ހިމެނެނީ ގައުމީ ބޮޑީބޯޑިން ޓީމުގައި ހިމެނޭ އަލީ ހުޝްރުވާން (ކުޑަ އައްޔަ)، އާމިން އުމަރު މޫސާ، މުހައްމަދު ކައިފް އަދި އަޝްރަފް ހަސަންގެ އިތުރުން އެންމެ ފަހުގެ ބޮޑީބޯޑިން ލީގުގެ ޖޫނިއާ ލީގު ޗެމްޕިއަން، އިޔަން އަހުމަދުއެވެ. މީގެތެރެއިން ކައިފް، ކޮނޑު ހުޅަށް ލިބުނު އަނިޔާއަކާ ގުޅިގެން ވަނީ ސްކޮޑުން ވަކިވެފައެވެ.
އިޔަން އަކީ މި މުބާރާތުގައި ރާއްޖެއިން ވާދަކުރާ ޓީމުގައި ހިމެނޭ ޖޫނިއަރ ޓީމުގެ ހަމައެކަނި އެތުލީޓެވެ.
މޮރޮކޯގައި ކުރިއަށްދާ ވޯލްޑް ބޮޑީބޯޑިން ޗެމްޕިއަންޝިޕް އޮންނާނީ މިމަހުގެ 31 އިން އަންނަމަހުގެ 12 ވަނަ ދުވަހުގެ ނިޔަލަށެވެ.
އައިބީސީ ވޯލްޑް ޓުއަރ އިވެންޓެއްކަމަށްވާ ވޯލްޑް ބޮޑީބޯޑިން ޗެމްޕިއަންޝިޕަކީ ރޯޔަލް މޮރޮކަން ސާރފިން ފެޑެރޭޝަން (އެފްއާރްއެމްއެސް) އިން އިންތިޒާމުކޮށްގެން ބާއްވާ ކުރިއަށްގެންދާ މުބާރާތެކެވެ.
މިމުބާރާތް ކުރިއަށްދާނީ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ މިންގަނޑުތަކާ އެއްގޮތަށެވެ.
ވޯލްޑް ބޮޑީބޯޑިން ޗެމްޕިއަންޝިޕަކީ އައިބީސީ ވޯލްޑް ޓުއަރގެ މުހިންމު މުބާރާތަކަށްވާއިރު، މިމުބާރާތުގެ ސަބަބުން ރާއްޖޭގެ އެތުލީޓުންނަށް ބައިނަލްއަގުވާމީ ތަޖުރިބާތަކެއް ލިބި، ރޭންކް މައްޗަށް ޖައްސާލުމުގެ ފުރުސަތު ފަހިވާނެއެވެ.