ދުބާއީގައި އޮތް މުބާރާތަކުން ރާއްޖޭގެ ނާއިކަށް 2 ރަން މެޑަލް

ރާއްޖޭގެ ޔޫސުފް ނާއިކް ވަޖީހު އޭއައިއެސް އެތުލެޓިކްސް އިން ދުބާއީގައި ބޭއްވި ޖަމްޕް ފެސްޓިވަލްގައި ބައިވެރިވެ ދެ ރަން މެޑަލް ހޯދައިފިއެވެ.

ހައިޖަމްޕް އަދި ލޯންގް ޖަމްޕް އިވެންޓްގެ އެއްވަނަ ހޯދާ ދެ ރަން މެޑަލް ހޯދި ނާއިކް ވަނީ މި މުބާރާތުގައި ވަރަށް ފުރިހަމަ ކާމިޔާބީއެއް ހޯދާފައެވެ.

ޔޫއޭއީގެ މަޝްހޫރު ޓްރެކް އެންޑް ފީލްޑް ކުލަބު، އޭއައިއެސް އިން އިންތިޒާމުކުރި މިމުބާރާތުގައި ނާއިކް ވަނީ އޭނާގެ ޕާސަނަލް ބެސްޓް އައު ކޮށްފައެވެ.

ހައި ޖަމްޕްގެ ގައުމީ ރެކޯޑްވެސް އޮންނަ ނައިކް ވަނީ 1.92 މީޓަރަށް ފުންމައިގެން އޭނާގެ ކުރީގެ ރިކޯޑު އައުކޮށްފައެވެ. އޭނާ އަތުގައި ގައުމީ ރިކޯޑް އޮންނަނީ 1.88 މީޓަރަށް ފުންމައިގެންނެވެ.

ޔޫއޭއީގައި ކޯޗު ކޭޓް އަންސޮންގެ ބެލުމުގެ ދަށުން ނާއިކް ވަނީ އެއްމަސް ދުވަހުގެ ހައި ޖަމްޕް ޓްރޭނިން ޕްރޮގްރާމެއްވެސް ފުރިހަމަކޮށްފައެވެ.