ފަސޭޙަކަމާއެކު ވެލެންސިޔާގެ މައްޗަށް ކުރި ހޯދާ އުރީދޫ ދިވެހި ޕްރިމިއަރ ލީގު ތާވަލްގެ އެއްވަނާގައި މާޒިޔާއިން 9 ޕޮއިންޓްގެ ލީޑެއް ނަގައިފިއެވެ.
ރޭ މާޒިޔާއާ ވެލެންސިޔާ ބައްދަލުކުރި މެޗް މާޒިޔާ ކާމިޔާބުކުރީ ފަސް ލަނޑު އެއް ލަނޑުން. މެޗްގައި މާޒިޔާއިން ޖެހި 5 ލަނޑުގެ ތެރެއިން އެއް ލަނޑަކީ ވެލެންސިޔާގެ ޔޫސުފް ރަމީޒްގެ ބޮލުގައި ޖެހިފައި ބައިކޮޅަށް ވަދެފައިވާ ލަނޑެކެވެ. އަނެއް 4 ލަނޑު ކާމިޔާބުކޮށްދިނީ އަލީ އަޝްފާޤްއާ އަސަދުﷲ އަބުދުﷲއެވެ. އަޝްފާޤްއާ އަސަދުﷲ މިއިން ކޮންމެ ކުޅުންތެރިޔަކު ވަނީ ދެ ލަނޑު ޖަހާފައެވެ.
މި މެޗުން މޮޅުވެ މާޒިޔާ ތާވަލްގެ އެއްވަނާގައި އޮތީ 37 ޕޮއިންޓާއެކުއެވެ. ވެލެންސިޔާ އޮތީ ތާވަލްގެ ހަތަރުވަނާގައި 20 ޕޮއިންޓާއެކުއެވެ.
މި މުބާރާތުގައި މިއަދު ހަވީރު ކުޅޭ މެޗްގައި ބައްދަލުކުރާނީ ޔުނައިޓެޑް ވިކްޓްރީއާ ބީޖީ ސްޕޯޓްސް ކްލަބެވެ. މިރޭ ކުޅޭ މެޗްގައި ބައްދަލުކުރާނީ ކްލަބް އީގަލްސްއާ ޓީސީ ސްޕޯޓްސް ކްލަބެވެ.