ކާރިޘާތަކުން ލިބޭ ގެއްލުން ކުޑަކުރުމުގެ ދުވަހުގެ ގޮތުގައި ކޮންމެ އަހަރެއްގެ އޮކްޓޯބަރު މަހުގެ 13 ވަނަ ދުވަސް ފާހަގަކުރަން ފަށާފައި ވަނީ 1989 ވަނަ އަހަރެވެ. މިދުވަސް ފާހަގަކުރުމަށް އދގެ ޢާއްމު މަޖިލީހުން ނިންމީ، ކާރިޘާތަކުގެ ހިރާސްތަކަށް ހޭލުންތެރިކުރުމަށާއި، ކާރިޘާތަކުން ލިބޭ ގެއްލުން ކުޑަކުރުމުގެ އާދަތައް އަށަގެންނެވުމަށް މަސައްކަތް ކުރުމަށް ބާރު އެޅުމުގެ ގޮތުންނެވެ. އެހެންކަމުން ހުރިހާ ޤައުމެއްގައިވެސް، ކާރިޘާތަކުން ލިބޭ ގެއްލުމުން އަރައިގަތުމުގެ މުހިންމުކަން ބަޔާންކޮށް، ކާރިޘާތަކުން ލިބޭ ގެއްލުން ކުޑަކުރުމަށް ދުރާލާ ރައްކާތެރިކަމުގެ ފިޔަވަޅު އަޅާ، އަދި ކާރިޘާތަކަށް ހުރި ހިރާސްތައް ނައްތާލުމަށް ކުރެވިދާނޭ ކަންތައްތަކާމެދު އާއްމުންނާއި މުޖުތަމައުތައް ހޭލުންތެރި ކުރުވުމަށް އެކި ބާވަތުގެ މަސައްކަތް ކުރެއެވެ.
ރާއްޖެއަކީ ޤުދުރަތީ ގޮތުން ނާޒުކު ގޮތަކަށް އުފެދިފައި އޮތް ޤައުމެއް ކަމުގައިވީ ނަމަވެސް، ރާއްޖެ ޤުދުރަތީ ކާރިޘާތަކަށް ލޯ ހުޅުވިގެންދިޔައީ، 2004 ގެ ސުނާމީ ކާރިޘާއާ ގުޅިގެނެވެ. އޭރު ރާއްޖެއަށް ޤުދުރަތީ މިފަދަ ކާރިޘާތަކަކީ ވަރަށް އާ ކަމެކެވެ. މިފަދަ ކާރިޘާއަކަށް ތައްޔާރުވެފައި ނެތުމުން، ސުނާމީގައި ލިބުނު މާއްދީ ގެއްލުންތައް ބޮޑެވެ. އަދި ކުޑަ ޤައުމަކާއި އަޅާ ބަލާއިރު ،މަރުވި މީހުންގެ ނިޞްބަތްވެސް ގިނައެވެ. އޭރު ކާރިޘާއަކަށް ތައްޔާރުވެފައި ތިބި ނަމަ ލިބުނު ގެއްލުން ކުޑަކުރެވޭނެ ކަމަށް ޤަބޫލް ކުރެވެއެވެ.
ސުނާމީގެ ކާރިޘާގެ ހިތްދަތި ތަޖުރިބާއާއެކު ރާއްޖެއިން އަމާޒު ހިފީ، ޤުދުރަތީ ކާރިޘާތަކަށް ސަމާލުވެ، އެފަދަ ކާރިޘާތަކުން ރައްކާތެރިވުމަށް ދުރާލާ ފިޔަވަޅު އެޅުމަށެވެ. އެގޮތުން ކަމާއި ގުޅުން ހުރި އިދާރާތައް އުފައްދަވާ، ޚިދްމަތްދެއްވަން ފެއްޓެވިއެވެ. އެގޮތުން ކާރިޘާތަކުގައި، ކުއްލި ޙާލަތުގައި އެހީތެރިވެދިނުމަށް މޯލްޑިވްސް ރެޑް ކްރެސެންޓް އުފެއްދެވިއެވެ. ރެޑް ކްރެސެންޓުގެ މަސައްކަތް ފުޅާ ކުރެވި، ޤައުމީ ފެންވަރެއްގައި އެޖަމާއަތުން ދަނީ ޚިދްމަތް ފޯރުކޮށްދެމުންނެވެ. އަދި އެކި ބާވަތުގެ ކާރިޘާތައް މެނޭޖްކުރެއްވުމަށްޓަކައި، ނެޝަނަލް ޑިޒާސްޓަރ މެނޭޖްމަންޓް ސެންޓަރެއް އުފައްދަވާ، އެސެންޓަރުން ދަނީ ޤައުމީ ފެންވަރުގެ ސިޔާސަތުތައް ކަނޑައަޅުއްވާ، ޚާއްޞަ އުޞޫލެއްގެ ދަށުން އެކަންކަން ތަންފީޒްކުރައްވަމުންނެވެ. ކާރިޘާތަކުން ލިބޭ ގެއްލުން ކުޑަކުރުމާއި އަދި ކާރިޘާއެއް ކުރިމަތިވާ ހިނދު އެކަމެއް ވިލަރެސް ކުރެއްވުމުގެ ހުރިހައި ޒިންމާއެއްވެސް ނަންގަވަނީ މި ސެންޓަރުންނެވެ.
img:http://s1.psmnews.mv/images/660x400/14723825273272.jpg|ވިއްސާރައިގެ ސަަބަބުން ތިނަދޫގައި ފެން ބޮޑުވެފައި
ނެޝަނަލް ޑިޒާސްޓަރ ސެންޓަރުގެ މަސައްކަތްތަކާބެހޭ މަޢުލޫމާތު ޕީ.އެސް.އެމާއި ހިއްސާ ކުރައްވަމުން، އެ ސެންޓަރާއި ޙަވާލުވެ ހުންނެވި، ޑިފެންސް މިނިސްޓަރގެ ނައިބު ފާޠިމަތު ތަސްނީމް ވިދާޅުވީ، ކާރިޘާއަކަށް ކުރިޔާލާ އިންޒާރު ދޭ ހިސާބުން ފެށިގެން، ކާރިޘާއަކަށް އިޖާބަ ދިނުމާއި، ކާރިޘާއަށް ތައްޔާރުވުމަށާއި، ކާރިޘާއަކުން އިޔާދަވުމަށް ކުރަންޖެހޭ މަސައްކަތްތަކާއި، އަދި ކުރީގެ ޙާލަތައް ރުޖޫއަވުމަށް، ފަރުދީ، އާއިލީ، މުޖުތަމައު އަދި ޤައުމީ ފެންވަރެއްގައި ތައްޔާރުވާން ޖެހޭކަމަށެވެ. އަދި ގުޅިލާމެހިފައިވާ ނިޒާމެއްގެ ދަށުން ކާރިޘާއެއްގެ ތެރޭގައި މަސައްކަތް ކުރުމަށް، ހުރިހާ ފަރާތްތަކެއް ޤާބިލް ކުރަން ޖެހޭ ކަމަށް ދެކިވަޑައިގެން، މިކަމަށް ތައްޔާރުވަމުން އަންނަކަމަށް ވިދާޅުވި ތަސްނީމް ވިދާޅުވިއެވެ.
ތަސްނީމް ވިދާޅުވީ، ފަހަކަށް އައިސް ފެންބޮޑުވުމުގެ ޙާދިޘާތައްވެސް ކަންބޮޑުވާ މިންވަރަށް އިތުރުވެފައިވާކަމަށެވެ. މެދުނުކެނޑި ބޯކޮށް ވާރޭވެހުމާއި، އުދަ އެރުމުގެ ސަބަބުން ނުރައްކާވާ މިންވަރަށް ފެންބޮޑުވުމުގެ ހާދިޘާތައް ފަހަކަށް އައިސް ކުރިމަތިވަމުންދާކަމަށް އޭނާ ވިދާޅުވިއެވެ. ހަމަ އެއާއެކު ނުރައްކާތެރި އަލިފާނުގެ ޙާދިޘާތަކުން ރައްކާތެރިވުމަށްވެސް ގިނަ މަސައްކަތްތަކެއް ޑިޒާސްޓަރ މެނޭޖްމެންޓް ސެންޓަރުން ކުރައްވަމުން ގެންދަވާކަން ތަސްނީމް ފާހަގަކުރެއްވިއެވެ.
ކޮންމެ ޙާދިސާއެއް ކުރިމަތިވާ ހިނދު، އެލިބޭ ގެއްލުމުން ތަޖުރިބާ ލިބި ،ދެން އެފަދަ ކަމެއް ތަކުރާރު ވިޔަ ނުދިނުމަށް، ރައްކާތެރިކަމުގެ ފިޔަވަޅު އަޅައި ދުރާލާ މަސައްކަތް ކުރުމުން ކާރިޘާތަކުން ލިބޭ މާއްދީ އަދި މާލީ ގެއްލުން ވަރަށް ބޮޑުތަން ކުޑަވެގެންދާނެއެވެ.