މާލެ ސަރަޙައްދުގައި ތަރައްޤީކުރާ ހޮސްޕިޓަލުތަކާއެކު އިންޤިލާބީ ބަދަލެއް ގެނުވާނެ

މާލެ ސަރަޙައްދުގައި ކުރިއަށް ގެންދިޔުމަށް ނިންމާފައިވާ ޞިއްޙީ ދާއިރާގެ ބިޔަ މަޝްރޫޢުތަކުގެ މަސައްކަތްތައް ބާރުދުވެލީގައި ކުރިއަށް ގެންދިއުމަށް ތައްޔާރުވަމުންދާ ކަމަށް ސިއްޙަތާއި، އާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ޤީލާ ވަނީ، މާލެ ސަރަޙައްދުގައި ކުރިއަށް ގެންދިޔުމަށް ނިންމާފައިވާ މަޝްރޫޢުތަކުގެ ތަފްސީލުތައް ހިއްސާކުރައްވާފައެވެ.

ވަޒީރު ޤީލާ ޢަލީ ވިދާޅުވީ މާލެ، ވިލިމާލެ އަދި ހުޅުމާލެ ހިމެނޭހެން މާލެ ސަރަޙައްދުގައި ބޮޑެތި ހޮސްޕިޓަލުތަކެއް ތަރައްޤީކުރުމަށް ނިންމާފައިވާ ކަމަށެވެ. އޭގެ ތެރޭގައި ވިލިމާލޭގައި 100 އެނދުގެ ޓާރޝަރީ ހޮސްޕިޓަލް ހިމެނޭކަން ފާހަގަކުރައްވާ ވަޒީރު ވިދާޅުވީ، މި މަޝްރޫޢު ކުރިއަށް ގެންދަނީ ޗައިނާ ސަރުކާރުގެ ހިލޭ އެހީތެރި ކަމާއެކުގައި ކަމަށެވެ. ހުޅުމާލެ ދެވަނަ ފިޔަވަހީގައި ތަރައްޤީ ކުރުމަށް ހަމަޖެހިފައިވާ ޑައިގްނޯސްޓިކް ސެންޓަރ ފޯ އޮންކޮލޮޖީ ސަރވިސަސް ނުވަތަ ކެންސަރު ބަލި ދެނެގަތުމަށް ޚާއްޞަ މަރުކަޒުގެ މަސައްކަތުގެ އެއްބަސްވުމުގައި ކުރިއަށް އޮތް ދެ ހަފުތާގެ ތެރޭގައި ސޮއިކުރެވޭނެ ކަމަށް ވަޒީރު ވިދާޅުވިއެވެ.

ވަޒީރު ޤީލާ ވިދާޅުވީ، ހުޅުމާލެ ދެވަނަ ފިޔަވަހީގައި ތަރައްޤީ ކުރުމަށް ހަމަޖެހިފައިވާ 500 އެނދުގެ މަލްޓި-ސްޕެޝަލިޓީ ހޮސްޕިޓަލުގެ ޢަމަލީ މަސައްކަތް ކުރިއަށް ގެންދާނެ އެންމެ އެކަށޭނަ ގޮތްތަކާ ގުޅޭގޮތުން މަަޝްވަރާ ކުރަމުންދާ ކަމަށެވެ. އަދި ހުޅުމާލެ ފުރަތަމަ ފިޔަވަހީގައި ތަަރައްޤީކުރާ 250 އެނދުގެ މަލްޓި-ސްޕެޝަލިޓީ ހޮސްޕިޓަލް މަޝްރޫޢުވެސް ކުރިއަށް ގެންދިއުމަށް ބޭނުންވާ ފަންނީ މަޝްވަރާތައް ހިނގަމުންދާކަމަށް ވަޒީރު ވިދާޅުވިއެވެ.

" ބޭންކް އޮފް މޯލްޑިވްސް (ބީއެމްއެލް)ގެ ފައިނޭންސްގެ ދަށުން ނޭޝަނަލް ޑިސެބިލިޓީ ސަރވިސް އެންޑް ތެރަޕީ ސެންޓަރ ތަރައްޤީ ކުރުމުގެ މަސައްކަތް މިހާރު ދަނީ ބާރަށް ކުރިއަށް. 100 އެނދުގެ ތެލެސީމިއާ އެންޑް ހެމަޓޮލޮޖީ ހޮސްޕިޓަލް (ހުޅުމާލެ ފޭސް 2): ތެލެސީމިއާ އަދި ލޭގެ ބަލިތަކަށް ޚާއްޞަ މި ހޮސްޕިޓަލް ޤާއިމުކުރުމުގެ މަޝްވަރާތައް ވެސް ދަނީ ކުރިއަށް." ސިއްޙަތާއި، އާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ ވިދާޅުވިއެވެ.

ވަޒީރު ޤީލާ ފާހަގަކުރެއްވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް މި މަޝްރޫޢުތައް ނިމި ޚިދުމަތް ދޭން ފެށުމުން، ރާއްޖޭގެ ޞިއްޙީ ނިޒާމަށް އިންޤިލާބީ ބޮޑު ބަދަލެއް އަންނާނެއެވެ. އަދި ބޮޑެތި ބަލިތަކަށް ފަރުވާ ހޯދުމަށް ރާއްޖެއިން ބޭރަށް ދާންޖެހޭ ޖެހުން ނިމުމަކަށް އައިސް، އަމިއްލަ ޤައުމުގައި ތިބެގެން ބައިނަލްއަޤްވާމީ ފެންވަރުގެ އެންމެ ޒަމާނީ ޞިއްޙީ ފަރުވާ ރައްޔިތުންނަށް ލިބިގެންދާނެއެވެ. މީގެ ސަބަބުން ބޭސްފަރުވާއަށް ރައްޔިތުންނާއި ދައުލަތުން ކުރަންޖެހޭ ބޮޑެތި ޚަރަދުތައް ސަލާމަތްވެ، އެތައް ޢާއިލާއަކަށް މާލީ އަދި ނަފްސާނީ ގޮތުން ބޮޑު ލުޔަކާއި ހިތްހަމަޖެހުމެއް ލިބިގެންދާނެ ކަމަށްވެސް ވަޒީރު ވިދާޅުވިއެވެ.