"އިންޓަރޕޯލް ޕްރޮގްރާމުން ދަސްވި ކަންކަމުން ފުލުހުންގެ ޤާބިލުކަން އިތުރުކުރެވޭނެ"

އިންޓަރޕޯލްގެ ކެޕޭސިޓީ ބިލްޑިންގ ފްލެގްޝިޕް ޕްރޮގްރާމުގައި ދަސްވި ކަންކަން ފުލުހުންގެ ޤާބިލުކަން އިތުރުކުރުމުގައި ބޭނުންކުރުމަށް ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް އަޙުމަދު ޢަބްދުއްރަޙްމާން އިލްތިމާސްކުރައްވައިފިއެވެ.

އަޙުމަދު ޢަބްދުއްރަޙްމާން މިހެން ވިދާޅުވީ އިންޓަރޕޯލްގެ ކެޕޭސިޓީ ބިލްޑިންގ އެންޑް ޓްރެއިނިންގ ޑިރެކްޓަރޭޓްގެ ފްލެގްޝިޕް ޕްރޮގްރާމެއް ކަމަށްވާ "އިންސްޓްރަކްޓަރ ޑިވެލޮޕްމަންޓް ކޯސް" ނިންމުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ އައްޑޫ ސިޓީ ކެމްޕަހުގައި ބޭއްވި މި ރަސްމިއްޔާތުގައި ވާހަކަދައްކަވަމުން އޭސީޕީ އަޙުމަދު ޢަބްދުއްރަޙްމާން ވިދާޅުވީ، މިއީ ވަރަށް މުހިންމު ތަމްރީނު ޕްރޮގްރާމެއް ކަމަށާއި، މި ޕްރޮގްރާމުން ދަސްވި ކަންކަން މުޅި އުމުރަށް، ޚާއްސަކޮށް ފުލުހުންގެ ޤާބިލުކަން އިތުރުކުރުމުގައި ބޭނުންކުރާނެ ކަމަށް އުންމީދުކުރައްވާ ކަމަށެވެ.

"އަބަދުވެސް އުނގަންނައިދިނުމާއި، ބާރުވެރިކުރުވުމާއި، އާ މަޢުލޫމާތުތައް އެހެން މީހުންނަށް ދަސްކޮށްދިނުމަކީ ފުލުހުންގެ ހައިސިއްޔަތުން އަޅުގަނޑުމެންގެ ވާޖިބެއް. އަދި ތިޔަބޭފުޅުން ވެގެންދާނީ މިކަން ހާސިލުކުރުމުގައި މުހިންމު ދައުރެއް އަދާކުރާނެ ބަޔަކަށް،" އޭސީޕީ އަޙުމަދު ޢަބްދުއްރަޙްމާން ވިދާޅުވިއެވެ.

މީގެ އިތުރުން، އިތުރު އޮފިސަރުން ތަމްރީނުކޮށް، އެހެން އޮފިސަރުންނަށްވެސް އިތުބާރު ހޯދައިދީ، ކުރިމަގުގައި ތަމްރީނުތަކުގެ ލީޑަރުންނަށް ވުމުގެ ފުރުސަތު ފަހިކޮށްދިނުމަށްވެސް އޭސީޕީ އަޙުމަދު ޢަބްދުއްރަޙްމާންގެ ވާހަކައިގައި އެދިވަޑައިގެންނެވިއެވެ.

އެފްރިކާ، ޔޫރަޕް އަދި މެދުއިރުމަތި ފަދަ ދުނިޔޭގެ އެކި ކަންކޮޅުތަކުން މި ތަމްރީނަށް އައިސްފައިވާ އޮފިސަރުންނާ މުހާތަބުކުރައްވާ އޭސީޕީ ވިދާޅުވީ، ރާއްޖޭގެ ޤުދުރަތީ ރީތިކަމާއި، ދިވެހިންގެ މެހެމާންދާރީއާއި ސަގާފަތް ބޭރު ދުނިޔެއަށް ފޯރުކޮށްދިނުމަކީ މުހިންމު ކަމެއް ކަމަށެވެ. އަދި އޮފިސަރުން އެނބުރި އެބޭފުޅުންގެ މުޖުތަމަޢުތަކަށް ދާއިރު، ރާއްޖެ ތަމްސީލުކުރާ މަންދޫބުންނަށް ވާނެ ކަމަށް އުންމީދުކުރައްވާ ކަމަށް ވިދާޅުވެ، ބައިވެރިންގެ ކުރިމަގަށް ކާމިޔާބީއަށް އެދިވަޑައިގެންނެވިއެވެ.

އޭސީޕީ އަޙްމަދު ޢަބްދުއްރަޙްމާން ވިދާޅުވީ، މިއީ އެ ކޮލެޖުގެ ފެށުން ކަމަށާއި، އަބަދުވެސް މަސައްކަތްކުރަނީ ކަންކަން ރަނގަޅުކޮށް، ސަރަހައްދީ ފެންވަރުގައި ފާހަގަކޮށްލެވޭ އެންމެ ކުރިއަރާފައިވާ ތަމްރީނު މަރުކަޒުތަކުގެ ތެރޭގައި ހިމެނުމަށް ކަމަށެވެ. އަދި މި ޕްރޮގްރާމް ރާއްޖޭގައި ބޭއްވުމުގެ ފުރުސަތު ދެއްވި ކަމަށްޓަކައި އިންޓަރޕޯލް އަދި އެންސީބީއަށް ވަނީ ޝުކުރު އަދާކުރައްވާފައެވެ.

އިންޓަރޕޯލްގެ އެކި ޒޯންތައް ތަމްސީލުވާ ގޮތަށް 13 ގައުމަކުން ޖުމުލަ 23 އޮފިސަރުންނާއެކު މި ޕްރޮގްރާމް ކުރިއަށް ގެންގޮސްފައިވަނީ މިދިޔަ މަހުގެ 27ވަނަ ދުވަހުން ފެށިގެން މިމަހުގެ 1ވަނަ ދުވަހާ ހަމައަށެވެ. މި ޕްރޮގްރާމުގެ ތެރެއިން، އިންސްޓްރަކްޝަނަލް ސިސްޓަމް ޑިޒައިން މޮޑެލްތައް ބޭނުންކޮށްގެން އަމިއްލަ ލެސަން ޕްލޭންތައް ތައްޔާރުކުރުމާއި، ޕަބްލިކް ސްޕީކިންގ އަދި ޕްރެޒެންޓޭޝަން ހުނަރުތައް ތަރައްގީކުރުމާއި، ބައިވެރިން ޝައުގުވެރިކުރުވުމުގެ އުކުޅުތަކުގެ އިތުރުން ފެންވަރު ވަޒަންކުރުމުގެ ހުނަރުތައް އުނގަންނައިދީފައިވެއެވެ.