"ވިޒިޓް މޯލްޑިވްސް 2027" ކެމްޕެއިން ރަސްމީކޮށް އިފްތިތާޙްކޮށްފި

މިއަންނަ އަހަރު ފާހަގަކުރުމަށް ހަމަޖެހިފައިވާ، ރާއްޖެއަށް ޒިޔާރަތްކުރުމުގެ އަހަރުގެ ކެމްޕެއިން ރަސްމީކޮށް އިފްތިތިތާޙްކޮށްފިއެވެ.

މިއަންނަ އަހަރަކީ "ވިޒިޓް މޯލްޑިވްސް އިޔަރ" ގެ ގޮތުގައި ފާހަގަކުރަން ނިންމާފައިވާކަން އިއުލާންކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަހަރަށް އިއްވެވި ރިޔާސީ ބަޔާނުގައެވެ.

ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި މި ކެމްޕެއިން އިފްތިތާޙްކޮށްދެއްވީ ފަތުރުވެރިކަމާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން އަދި ރަސްމިއްޔާތުގެ ޙާއްސަ މެހެމާން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީގެ ޗެއަރޕާސަން ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙުސައިން ޢަފީފެވެ. މި ރަސްމިއްޔާތުގެ ތެރެއިން ކެމްޕެއިން އިފްތިތާޙް ކުރުމާއެކު ކެމްޕެއިންގެ ރަސްމީ ލޯގޯ، ރަސްމީ ލަވަ އަދި ބްރޭންޑިން ވަނީ އާންމުކޮށްފައެވެ.

މި ރަސްމިއްޔާތުގައި ވާހަކަފުޅުދައްކަވަމުން ފަތުވެރިކަމާ ބެހޭ ވަޒީރު މުހައްމަދު އަމީން ވަނީ މި ކެމްޕެއިނަކީ ހުރިހާ އެންމެންގެ ޝާމިލްވުން އޮންނަ ޤައުމީ ކެމްޕެއިނެއް ކަމަށް ވިދާޅުވެފައެވެ. އެހެން ކަމުން ކޮންމެ ރަށަކާއި ރިސޯޓަކާއި މި ސިނާޢަތުގެ ހުރިހާ ފަރާތްތަކެއްގެ ބައިވެރިވުން ކެމްޕެއިންގެ ތެރެއިން އޮތުމަކީ މުހިންމު ކަމެއް ކަމަށް ވަޒީރު ވިދާޅުވިއެވެ.

ރާއްޖެއަށް ޒިޔާރަތްކުރުމުގެ އަހަރުގެ ކެމްޕެއިންގެ އިތުރަށް، މި ރަސްމިއްޔާތުގެ ތެރެއިން އަންނަ އަހަރު ރާއްޖޭގެ ފަތުރުވެރިކަމުގެ އެވޯޑު ދޭނެ ދައިރާތައްވެސް ވަނީ އިއުލާންކޮށްފައެވެ.

މި އެވޯޑު 2022 ވަނަ އަހަރު ދޭން ފެށީސުރެ އެވޯޑު ދެމުން އައިސްފައިވަނީ ރިސޯޓުތަކާއި ހޮޓަލްތަކާއި ގެސްޓްހައުސް އަދި ސަފާރީ އުޅަނދުތަކައި ފަތުރުވެރިންނަށް ޚިދުމަތްދޭ ތަންތަނަށެވެ. ނަމަވެސް މިއަންނަ އަހަރުން ފެށިން އެވޯޑު ދޭނެ 4 ދައިރާއެއް ވަނީ ކަނޑައަޅާފައެވެ. މި ބަދަލުގެ ބޭނުމަކީ ފަތުރުވެރިކަމުގެ ސިނާޢަތުން ފޯރުކޮށްދޭ ޚިދުމަތްތަކުގެ އިތުރަށް އެ ޚިދުމަތް ފޯރުކޮށްދޭ ފަރާތްތަކާއި ގޮތްތައްވެސް އަގުވަޒަން ކުރުން ކަމަށް ފަތުރުވެރިކަމާއި ބެހޭ ވުޒާރައިން ވިދާޅުވިއެވެ.

ފަތުރުވެރިކަމުގެ އެވޯޑު ދޭނެ ދާއިރާތައް:

1. އިންސާނީ ވަސީލަތް ބިނާ ކުރުމުގެ ދައިރާ: މި ދައިރާއިން ދިނުމަށް ހަމަޖެހިފައިވާ އެވޯޑުތަކުގެ ތެރޭގައި މުވައްޒަފުންގެ ދުޅަހެޔޮކަމުގެ އެވޯޑާއި، މުވައްޒަފުން ބިނާކުރުމުގެ މަސައްކަތުގެ އެވޯޑުގެ އިތުރުން، އަންހެނުން ބާރުވެރިކުރުމުގެ އެވޯޑު ހިމެނެއެވެ.

2. ދެމެހެއްޓެނިވިކަން: މި ދައިރާއިން ދޭ އެވޯޑުތަކުގެ ތެރޭގައި، އިޖްތިމާޢީ ބައިވެރިވުމާއި، ސަޤާފަތާއި ތަރިކައިގެ ޕްރޮމޯޝަންގެ އިތުރުން ތިމާވެށީގެ ދެމެހެއްޓެނިވިކަން ހިމެނެއެވެ.

ފަތުރުވެރިކަމާބެހޭ ވުޒާރާއިން ވިދާޅުވީ މި ދައިރާތަކަށް ކުރިމަތިލުމުގެ ފުރުޞަތު، ރިސޯޓު ގެސްޓް ހައުސްތައް އަދި ހޮޓަލްތަކަށް އޮންނާނެ ކަމަށެވެ.

3. ޒިޔާރަތްކުރާ މީހުންގެ ތަޖުރިބާ: މި ދައިރާއިން ދޭ އެވޯޑުތަކުގެ ތެރޭގައި، ޓްރެވެލް އޭޖެންސީ ޚިދުމަތާއި، އެކޮމޮޑޭޝަން ޚިދުމަތާއި، ޑައިވް އަދި މޫދުގެ ހަރަކާތްތަކުގެ އިތުރުން މުޅިން އަލަށް ދިނުމަށް ހަމަޖެހިފައިވާ ރަށްރަށުގެ އެވޯޑު ހިމެނެއެވެ. ރަށްރަށުގެ އެވޯޑަށް ކުރިމަތިލެވޭނީ ރަށު ކައުންސިލްތަކަށެވެ.

4. ފަރުދީ ފެންވަރެއްގައި ފާހަކޮށްލެވޭ ފަރާތްތައް: މި ދައިރާއިން ދޭ އެވޯޑުތަކުގެ ތެރޭގައި، ޓުއަރ ގައިޑިން، މަންޒިލުގެ ކުރިއެރުމަށް ކުރާ މަސައްކަތްތައް، އީޖާދީ މަސައްކަތްތައް، ހުނަރުތައް ތަރައްޤީކުރުމުގެ އިތުރުން ޚިދުމަތުގެ ފަންވަރާއި، ފަތުރުވެރިކަމުގެ ވާހަކަތައް ހިއްސާކުރުމުގެ އައު ލީޑަރުންގެ އެވޯޑު ހިމެނެއެވެ.

މި އެވޯޑަށް ކުރިމަތިލުމުގެ ފުރުޞަތު އަންނަ އަހަރުގެ ފުރަތަމަ ކުއާޓަރުގައި ހުޅުވާލާނެ ކަމަށް ފަތުރުވެރިކަމާއި ބެހޭ ވުޒާރައިން ވަނީ ވިދާޅުވެފައެވެ.