3 ވަނަ މޯލްޑިވްސް އިންވެސްޓްމަންޓް ފޯރަމް މާދަމާ ރަސްމީކޮށް ފެށުމަށް ތައްޔާރުވަމުންދާއިރު، މިފަހަރުގެ އިންވެސްޓްމަންޓް ފޯރަމާއިމެދު ކުރެވޭ އުއްމީދު ބޮޑުކަމަށް އިކޮނޮމިކް މިނިސްޓަރ މުހައްމަދު ސަޢީދު ވިދާޅުވެއްޖެއެވެ.
ދިއްލީގެ އަޝޯކް ހޮޓަލުގައި ހުންނަވާ ނޫސްވެރިންނާ ވާހަކަދައްކަވަމުން މިނިސްޓަރ ސައީދު ވިދާޅުވީ، މަދާމާ ފަށާ މޯލްޑިވްސް އިންވެސްޓްމަންޓް ފޯރަމްގެ 3 ވަނަ ފޯރަމްގައި އެކިއެކި ދާއިރާތަކުން ގިނަ ޤައުމުތަކެއްގެ ވިޔަފާރިތަކުން ބައިވެރިވާނޭ ކަމަށެވެ. މިނިސްޓަރ ވިދާޅުވީ، ވަކި ދާއިރާއަކަށް ރާއްޖޭގެ އިޤްތިޞާދު ބަރޯސާވެފައި އޮންނަ އޮތުން ބަދަލުކުރައްވާ އިޤްތިޞާދުގައި އެކިއެކި ދާއިރާތަކުގެ ހިއްސާ އިތުރު ކުރެއްވުމަކީ ރައީސް ޔާމީންގެ ސަރުކާރުން ވަރަށްބޮޑު އަހަމިއްޔަތު ކަމެއް ދެއްވާކަމެއް ކަމަށެވެ. ސަޢީދު ވިދާޅުވީ މި ފަހަރުގެ ފޯރަމްގައިވެސް އެކި ދާއިރާތަކުން އިންވެސްޓަރުންނަށް ރާއްޖޭގައި އިންވެސްޓް ކުރެއްވުމަށް ހުރި ފުރުސަތުތައް އެ ފަރާތްތަކާއި އެކު ހިއްސާ ކުރައްވާނެ ކަމަށެވެ. މިގޮތުން މި ފޯރަމްގައި އިންޑިއާގެ އިތުރުން ޔޫރަޕް އަދި އޭޝިއާގެ ގިނަ ޤައުމުތަކެއްގެ ވިޔަފާރިތަކުން ބައިވެރިވާކަން މިނިސްޓަރ ފާހަގަކުރެއްވިއެވެ.
ރާއްޖޭގެ އިޤްތިޞާދު އިތުރަށް ތަރައްޤީ ކުރެވެން އަންނަކީ އިޤްތިސާދުގައި ޓޫރިޒަމް ސިނާއަތާއިއެކު އިތުރު ސިނާއަތްތައް ތަރައްޤީ ކުރައްވައިގެން ކަމަށެވެ. އަދި މި މަސައްކަތްތަކަކީ ރާއްޖޭގެ އިޤްތިޞާދު ދެގުނަ ކުރެއްވުމަށް ކުރައްވަމުން ގެންދަވާ މަސައްކަތްތަކެއް ކަމަށާއި، އެކަމުގެ ފައިދާ ދިވެހި ހުރިހާ ރައްޔިތުންނަށް ކުރާނެ ކަމަށް ވަޒީރު ވިދާޅުވިއެވެ. ރާއްޖޭގެ 200 އަށްވުރެ ގިނަ ވިޔަފާރިއާއެކު ކުރިއަށްދާ މި އަހަރުގެ އިންވެސްޓްމަންޓް ފޯރަމްގެ ރަސްމީބައި މާދަމާ ފައްޓާއިރު މިރޭ އޮންނާނީ ގާލާ ޑިނަރއެވެ. މި ފަރިއްކޮޅުގައި ރާއްޖެ އާއި އިންޑިޔާގެ ބޮޑެތި ވިޔަފާރި ކުންފުނިތަކުގެ އެންމެ އިސްވެރިން ބައިވެރިވާނެއެވެ. މާދަމާ ފަށާ އިންވެސްޓްމަންޓް ފޯރަމް ޝަރަފުވެރި ކޮށްދެއްވާނީ ރާއްޖޭގެ ނާއިބު ރައީސް އަބްދު ﷲ ޖިހާދުއެވެ.