ތިންވަނަ މޯލްޑިވްސް އިންވެސްޓް ފޯރަމް އިންޑިއާގެ ނިއުދިއްލީގައި ނިމިގެންދިޔައިރު، ރާއްޖޭގެ އިޤްތިޞާދުގެ ކުރިމަގަށް އައު އުންމީދުތަކެއް ވަނީ ލިބިފައެވެ. އެއް ބިލިއަނަށްވުރެ ގިނަ މީހުންގެ އާބާދީއެއް އޮންނަ އަވައްޓެރި އިންޑިއާއިން ރާއްޖޭގެ ވިޔަފާރީގެ ބާޒާރާމެދު ޝައުޤުވެރިވާ ކަމަށް އެޤައުމުން ވަނީ ހާމަކޮށްފައެވެ. މިފަހަރުގެ އިންވެސްޓްމަންޓް ފޯރަމްގައި ބައިވެރިވި ދިވެހި ކުންފުނިތަކުންވެސް ވަނީ ފޯރަމް ކާމިޔާބުކަން ފާހަގަކޮށްފައެވެ.
އިންޑިއާގެ ނިއުދިއްލީގެ ތާޖް ޕެލަސް ހޮޓެލްގައި 3 ވަނަ މޯލްޑިވްސް އިންވެސްޓްމަންޓް ފޯރަމް ނިމިގެންދިޔައިރު، އެންމެ ބޮޑަށް ފާހަގަކުރެވުނު ކަމަކީ، އަވައްޓެރި އިންޑިއާއިން ރާއްޖޭގެ ވިޔަފާރީގެ ބާޒާރާމެދު ހާމަކުރެއްވި ހާމަކުރެއްވުމެވެ. އިންވެސްޓްމަންޓް ފޯރަމް ހުޅުވުމުގެ ރަސްމިއްޔާތުގައި ވާހަކަދައްކަވަމުން، އިންޑިއާގެ ވިޔަފާރިތަކުން މިހާރަށްވުރެ ބޮޑަށް ރާއްޖޭގައި އިންވެސްޓްކުރުމަށް ބޭނުންވާކަން އެޤައުމުގެ އެންމެ ގިނަ ވިޔަފާރިތައް ތަމްސީލްކުރާ ޖަމްޢިއްޔާ، ފެޑަރޭޝަން އޮފް އިންޑިއަން ޗެމްބަރސް އޮފް ކޮމަރސް އެންޑް އިންޑަސްޓްރީޒްގެ ނޭޝަނަލް އެގްޒެކްޓިވް މެމްބަރު ޝްރީ ވިކްރަމަޖިތް ސިންގް ހާމަކުރައްވާފައިވެއެވެ. އަދި ރާއްޖެއާއި އިންޑިއާއާއި ދެޤައުމުގެ ދެމެދުގައި މިހާރު ކުރެވެމުންދާ ވިޔަފާރީގެ އެކިއެކި މުޢާމަލާތްތައް އިތުރަށް ފުޅާކުރުމަކީ އިންޑިއާގެ ވިޔަފާރިތަކުން އެދިއެދި ތިބިކަމެއް ކަމަށް ވިކްރަމަޖިތް ވިދާޅުވިއެވެ.
ދިވެހިރާއްޖޭގެ ނާއިބު ރައީސް ޢަބްދުﷲ ޖިހާދު، އަދި އިކޮނޮމިކް މިނިސްޓަރ މުޙައްމަދު ސަޢީދުގެ އިތުރުން ރާއްޖޭގެ ބޮޑެތި ކުންފުނިތަކަކުން ބައިވެރިވި މި ފޯރަމްގައި ވާހަކަދައްކަވަމުން، އިންޑިއާގެ ސަން ކުންފުނީގެ ޗެއަރމަންކަންވެސް ކުރައްވަމުން ގެންދަވާ ވިކްރަމަޖިތް ވިދާޅުވީ، އިންޑިއާގެ އާބާދީގައި އެއްބިލިއަނަށްވުރެ ގިނަ މީހުން ތިބިއިރު، އިންޑިއާގެ ފަތުރުވެރިން ދިވެހިރާއްޖެއަށް ޒިޔާރަތްކުރުމުގެ ފުރުޞަތު އެބައޮތް ކަމަށެވެ. މިގޮތުން ރާއްޖޭގެ ޓޫރިޒަމް މެދުފަންތީގެ ފަތުރުވެރިންނަށް ފަރުމާކޮށް އިންޑިއާގެ މުހިއްމު ސިޓީތަކުން ދިވެހިރާއްޖެއަށް ދަތުރުތައް ފެށިއްޖެނަމަ، އެކަމުގެ މަންފާ ދެ ޤައުމަށް ލިބިގެންދާނޭކަން ވިކްރަމަޖިތް ފާހަގަކުރެއްވިއެވެ.
ފޯރަމްގައި ވާހަކަދައްކަވަމުން ވިކްރަމަޖިތް ވިދާޅުވީ ދިވެހިރާއްޖޭގެ ސިނާޢަތަކީ ހަމައެކަނި މަތީފަންތީގެ ފަރާތްތަކަށް ޚާއްޞަ ތަނެއްކަމަށް އޮންނަ އޮތުން ބަދަލުކުރަން ޖެހޭކަމަށެވެ. މިގޮތުން ދިވެހިރާއްޖޭގެ ފަތުރުވެރިކަމުގެ ސިނާޢަތަކީ މެދުފަންތީގެ ފަރާތްތަކަށްވެސް އެކަށީގެންވާ ތަނެއްކަމަށް ބަދަލުކުރެވިއްޖެނަމަ، އެއްބިލިއަނަށްވުރެ ބޮޑު އާބާދީއެއް އޮންނަ އިންޑިއާގެ ގިނަ ރައްޔިތުން ދިވެހިރާއްޖެއަށް ޒިޔާރަތްކުރާނޭ ކަމަށް ވިކްރަމަޖިތް ވިދާޅުވިއެވެ.
މީގެ އިތުރުން މި ފޯރަމްގައި ވާހަކަދައްކަވަމުން، ދިވެހިރާއްޖޭގައި އިންވެސްޓްކުރެވިދާނޭ ދާއިރާތަކުގެ މަޢުލޫމާތު އިންޑިއާގެ ވިޔަފާރިތަކަށް ބޭނުންވާ ކަމަށް ވިކްރަމަޖިތް ވިދާޅުވިއެވެ. ދިވެހިރާއްޖޭގައި އިންވެސްޓް ކުރެވިދާނޭ ދާއިރާތައް ހުރިއިރުވެސް އެކަމުގެ މައުލޫމާތު އިންޑިއާގެ ވިޔަފާރިތަކަށް އެނގިފައިނުވާކަން ވިކްރަމަޖިތް ފާހަގަކުރެއްވިއެވެ.
ރާއްޖޭގައި ހުރި އިންވެސްޓްކުރުމުގެ ފުރުޞަތުތައް އިންވެސްޓަރުންނަށް އެނގިފައިނުވާކަން މިފަހަރުގެ އިންވެސްޓްމަންޓް ފޯރަމުންވެސް ފަހަގަވެގެން ދިޔަކަން މިނިސްޓަރ އޮފް އިކޮނިމިކް ޑިވެލޮޕްމަންޓް މުޙައްމަދު ސަޢީދުވެސް ފާހަގަކުރެއްވިއެވެ. އަދި ނިއުދިއްލީގައި ބޭއްވުނު އިންވެސްޓްމަންޓް ފޯރަމުންވެސް ފާހަގަކުރެވިގެންދިޔަ އެންމެ މުހިއްމު ނުކުތާއަކީ މިފަދަ ފޯރަމްތައް ބޭއްވުން އިތުރުކުރުން މުހިއްމުކަން ކަމަށް މިނިސްޓަރ ވިދާޅުވިއެވެ.
3 ވަނަ މޯލްޑިވްސް އިންވެސްޓްމަންޓް ކާމިޔާބުކަމާއެކު ނިންމަވާލައްވާފައިވާއިރު، މީގެ 4 ވަނަ ފޯރަމް ބޭއްވެވުމަށް ހަމަޖެހިފައިވަނީ އަންނަ އަހަރު ޤަތަރުގެ ވެރިރަށް ދޯހާގައެވެ. މެދުއިރުމަތީގެ ވިޔަފާރިވެރިންނަށް އަމާޒުކޮށް ބޭއްވިގެންދާ މި ފޯރަމްގައިވެސް ދިވެހިރާއްޖޭގައި އިންވެސްޓް ކުރެވިދާނޭ ދާއިރާތަކުގެ މަޢުލޫމާތު ވަރަށް ފުޅާދާއިރާއެއްގައި ފޯރުކޮށްދެވިގެންދާނޭ ކަމަށް އިކޮނޮމިކް މިނިސްޓްރީން ވިދާޅުވެއެވެ.