2000 ވަނަ އަހަރުގެ ފެބްރުއަރީ މަހުގެ 11 ވަނަ ދުވަހު ރީޖަނަލް ފެންވަރުގައި ގއ. އަދި ގ.ދ އަތޮޅުގެ ރަށްޔިތުންނަށް ޚިދުމަތްދެއްވަން ފެއްޓެވި އޭރުގެ ރީޖަނަލް ހޮސްޕިޓަލް އަދި މިހާރު ޑޮކްޓަރ ޢަބްދުއްސަމަދު މެމޯރިއަލް ހޮސްޕިޓަލަކީ މިހާރު 50 އެނދުގެ ޖާގައިގެ ހޮސްޕިޓަލެކެވެ.
3 މެޑިކަލް އޮފިސަރުންނާއި އަންހެނުންގެ ޚާއްޞަ ޑޮކްޓަރަކާއެކު ޚިދުމަތް ފެށި މި ހޮސްޕިޓަލުގައި މިހާރު ހޭނައްތާ ޑޮކްޓަރަކާއި އަންހެނުންގެ ބަލިތަކަށް ޚާއްޞަ ދެ ޑޮކްޓަރުންނާއި ކުޑަ ކުދިންގެ ބަލިތަކަށް ޚާއްޞަ ދެ ޑޮކްޓަރުންނާއި ހަމުގެ ބަލިތަކަށް ޚާއްސަ ޑޮކްޓަރަކާއެކު ޖުމްލަ 20 ޑޮކްޓަރުން ޚިދުމަތްދެމުންދެއެވެ.
ޢަބްދުއްޞަމަދު މެމޯރިއަލް ހޮސްޕިޓަލުގެ ޚިދުމަތްތައް އެއްދުވަހުން އަނެއްދުވަހަށް ފުޅާވަމުން އައިސް މިއަދު މި ހޮސްޕިޓަލުން ދެއްވާ ޚިދުމަތްތަކުގެ ސަބަބުން މާލެ، ނައިސް އެ ޚިދުމަތް އަތޮޅުގައި ތިބެގެން ލިބެން ހުރިކަން ފާހަގަކޮށްލެވެއެވެ.
މިގޮތުން މިހާރު މި ހޮސްޕިޓަލުން ޑައިލަސިސްގެ ޚިދުމަތާއި، އައިސޮލޭޝަން ވޯޑެއްގެ ޚިދުމަތާއި ކުޑަކުދިންގެ އައިސީޔޫގެ ޚިދުމަތް ފޯރުކޮށްދެމުން ދާއިރު، މިއަހަރުގެ ތެރޭގައި ތެލެސީމިޔާ ޓެސްޓްގެ ޚިދުމަތާއި ތައިރޮއިޑް ޓެސްޓް ހެދުމުގެ އިތުރަށް މޯޗަރީގެ ޚިދުމަތްވެސް ވަނީ ފަށްޓަވާފައެވެ. ހަމައެހެންމެ ކުރިންވެސް ދަތުގެ ފަރުވާގެ ޚިދުމަތްދިންކަމުގައިވިޔަސް، އެކަމަށް ބޭނުންވާ އާލާތްތަކާއެކު މިހާރު ވަނީ އެ ޚިދުމަތްވެސް ކުރިއަށްވުރެ ފުރިހަމައަށް، ފުޅާކުރައްވާފައި ކަމަށް އަބްދުއްސަމަދު މެމޯރިއަލް ހޮސްޕިޓަލުގެ ޑެޕިޔުޓީ ޑިރެކްޓަރ މުޙައްމަދު ޙުސައިން ވިދާޅުވިއެވެ.
ޑައިލަސިސްގެ ޚިދުމަތް ފެއްޓެވުމާއެކު މާލޭގައި މި ޚިދުމަތް ހޯދަން ގޮސް ތިބި މީހުން ރަށަށް ބަދަލުވެ، އެ ހޮސްޕިޓަލުން ޚިދުމަތް ހޯދާކަން ޑެޕިޔުޓީ ޑިރެކްޓަރ ފާހަގަކުރެއްވިއެވެ. އެ ހޮސްޕިޓަލުން ވަނީ ތިން ބުރީގެ އިމާރާތެއްގެ ބިންގާވެސް ވޭތުވެދިޔަ އަހަރުގެ ތެރޭގައި އަޅާފައެވެ. މި އިމާރާތުގެ މަސައްކަތް އަންނަ އަހަރުގެ ތެރޭ ފެށޭނެކަމަށް ބެލެވޭއިރު، އިތުރު ތިއޭޓަރަކާއި ލޭބަރ ރޫމްއަކާއި ޕްރައިވެޓް ރޫމްތައް ހެދުމަށް ވަނީ ހަމަޖެހިފައެވެ.