ދިވެހިރާއްޖޭގެ ފަތުރުވެރިކަމުގެ ސިނާޢަތުގެ ތާރީޚަށް ބަލާއިރު ފަހަކަށް އައިސް އެންމެބޮޑަށް ކުރިއެރުން ލިބުނު އެއް މާކެޓަކީ ޗައިނާ މާރކެޓެވެ. ދެހާސް ބާރަވަނަ އަހަރުން ފެށިގެން މިއަދާ ހަމަޔަށް ޗައިނާ މާކެޓް ފާހަގަކުރެވިފައިވަނީ އެއް ޤައުމަކުން ރާއްޖެއަށް އެންމެ ގިނަ ޢަދަދަކަށް ފަތުރުވެރިން ޒިޔާރަތްކުރާ މާރކެޓްގެ ގޮތުގައެވެ.
މީގެ ހަތަރުވަރަކަށް އަހަރުކުރިއަށްބަލާއިރު، ޖުމްލަ ގޮތެއްގައި މަހެއްގެ މައްޗަށް ޗައިނާއިން ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ ޢަދަދު އުޅެނީ، ފަސްހާހާ ހަ ހާހާއި ދެމެދުގައެވެ. ނަމަވެސް ދެހާސް ބާރަވަނަ އަހަރަށްފަހު ޗައިނާ މާކެޓުން ދިވެހިރާއްޖެއަށް ޒިޔާރަތްކުރާ ފަތުރުވެރިންގެ އަދަދަށް ވަނީ ބޮޑު ބަދަލެއް އައިސްފައެވެ.
ޗައިނާގައި ދިވެހިރާއްޖޭގެ ފަތުރުވެރިކަމުގެ ސިނާއަތް އިސްތިހާރުކުރުމަށް ކުރެވުނު ކެމްޕެއިންތަކަށްފަހު ދެހާސް ބާރަވަނަ އަހަރު ނިމުނުއިރު ޖުމްލަ ގޮތެއްގައި ކޮންމެ މަހަކު ޗައިނާއިން ރާއްޖެއަށް ފަނަރަ ހާހަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. އެއަށްފަހު މިވީ ހަތަރު އަހަރު ދުވަހުގެ ތެރޭގައި މަހަކަށްވުރެ މަހެއް ޗައިނާއިން ދިވެހިރާއްޖެއަށް ޒިޔާރަތްކުރި ފަތުރުވެރިންގެ މިންވަރުދިޔައީ ރެކޯޑް މިންވަރަކަށް އިތުރުވަމުންކަން ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ.
img:http://s4.psmnews.mv/images/660x400/14777219431915.jpg|ރާއްޖޭގެ ރިސޯޓެއް / ފޮޓޯ: ފޯ ސީޒަން
މި ތަފާސް ހިސާބުތަކަށް ބަލާއިރު، ދެހާސް ފަނަރަވަނަ އަހަރާއި ހަމައިން ޗައިނާއިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އަހަރުން އަހަރަށް ބަލާއިރު ވަނީ ދަށަށް ދާން ފަށާފައެވެ. ޗައިނާ މާކެޓް ދަށަށްދިއުމާއި ބެހޭގޮތުން ޕީއެސްއެމްއިން ދެންނެވި ސުވާލަކަށް ޖަވާބުދެއްވަމުން ޓޫރިޒަމް މިނިސްޓަރ މޫސާ ޒަމީރު ވިދާޅުވީ، ޗައިނާއިން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު އިތުރުކުރެއްވުމަށް ސަރުކާރުން ވަރަށްބޮޑަށް މަސައްކަތް ކުރައްވަމުންދާކަމަށެވެ.
ޗައިނާގެ ކޮންސަލްޓަންސީ ފާމަކާއި ގުޅިގެން މިހާރުވެސް މަސައްކަތް ކުރައްވަމުންދާއިރު، މޯލްޑިވިއަން މެދުވެރިކޮށް ޗައިނާ މާކެޓުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރު ކުރެއްވުމަށް މަސައްކަތް ކުރައްވަމުން ގެންދަވާކަމަށް މިނިސްޓަރ ވިދާޅުވިއެވެ.
" ޗައިނާ މާކެޓަކީ ހަޤީޤަތުގަ ރިޕީޓަރުން އަންނަ މާކެޓެއްނޫން. އެކަމް ޗައިނާއިން އެހާގިނަ ޓޫރިސްޓުން އަންނާތީވެ، އެޤައުމުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އެބަޖެހޭ އެއްހަމައެގަ ހިފަހައްޓަން. ޗައިނާގެ ކޮންސަލްޓަންސީ ފާމަކާ އެބަ މަސައްކަތްކުރަން މިހާރުހުރި ނެގެޓިވް ގްރޯތް ރަނގަޅުކުރަން. ޗައިނާ މާކެޓް އެހެން އޮތްކަމުގައި ވީނަމަވެސް އެހެންމާކެޓްތައް އެބަ ދޭ ރަނގަޅުވަމުން. މިސާލަކަށް އިންޑިއާ އަދި މެދުއިރުމައްޗަށް ބަލައިފިނަމަ އަޅުގަނޑުމެން އުއްމީދު މިކުރަނީ އަންނަ އަހަރު ތިރީސް ފަހެއް އިންސައްތައިގެ ކުރިއެރުމެއް އަންނާނޭކަމަށް. ސަބަބަކީ ސައުދީ އެއަރ ކަހަލަ އެއަރލައިންތަކުގެ އުދުހުންތައް ރާއްޖެއަށް ފެށުން." މިނިސްޓަރ ވިދާޅުވިއެވެ.
img:http://s2.psmnews.mv/images/660x400/14749886649893.jpg|ޓޫރިޒަމް މިނިސްޓަރ މޫސާ ޒަމީރު- ފޮޓޯ: ޢަލީ ނަޞީރު، ޕީއެސްއެމް
ޗައިނާއިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ކުޑަކޮށް ދަށްވިނަމަވެސް އެހެން މާކެޓްތަކުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން އަންނަކަމަށް ޓޫރިޒަމް މިނިސްޓަރ ޒަމީރު ވަނީ ފާހަގަކުރައްވާފައެވެ. އެހެންކަމުން ޗައިނާ މާކެޓް ރަނގަޅު ކުރެއްވުމަށް ކުރައްވާ މަސައްކަތްތަކާއިއެކު ކުރިއަށްއޮތްތަނުގައި ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނޭކަމަށް މިނިސްޓަރ ވަނީ ފާހަގަކުރައްވާފައެވެ.
ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިއަހަރުގެ އޮކްޓޯބަރު މަހުގެ ނިއަލަށް ދިވެހިރާއްޖެއަށް ވަނީ އެއްމިލިއަން ފަސްދޮޅަސް ދެހާހަށްވުރެ ގިނަ ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު، ހަތަރެއް އިންސައްތައިގެ އިތުރުވުމެއްކަން ފާހަގަކޮށްލެވެއެވެ.