ފަތުރުވެރިކަމުގެ ސިނާޢަތަކީ ދިވެހިރާއްޖޭގެ އިޤްތިޞާދުގެ އެންމެ މުހިއްމު ދާއިރާއެވެ. ފަތުރުވެރިކަމުގެ ސިނާޢަތުގެ ކުރިއެރުން ބިނާވެގެންވަނީ ދިވެހިރާއްޖެއަށް ޒިޔާރަތްކުރާ ފަތުރުވެރިންގެ ނިސްބަތަށެވެ. މިއަހަރު ރާއްޖެއަށް ޒިޔާރަތްކުރަމުން އަންނަ ފަތުރުވެރިންގެ މިންވަރަށް ބަލާއިރު، އެދެވޭފަދަ ކުރިއެރުންތަކެއް ލިބެމުން އަންނަކަމަށް ޓޫރިޒަމް މިނިސްޓަރ މޫސާ ޒަމީރު ވަނީ ވިދާޅުވެފައެވެ.
މިއަހަރު ރާއްޖެއަށް ޒިޔާރަތްކުރާ ފަތުރުވެރިންގެ މިންވަރާ ބެހޭގޮތުން ޓޫރިޒަމް މިނިސްޓަރ މޫސާ ޒަމީރު ވިދާޅުވެފައިވަނީ، ގޮންޖެހުންތައް ހުރިނަމަވެސް، މިއަހަރު ރާއްޖެއަށް ޒިޔާރަތްކުރަމުންދާ ފަތުރުވެރިންގެ އަދަދު އެދެވޭ ގޮތެއްގައި ކުރިއަރަމުން އަންނަކަމަށެވެ. މިނިސްޓަރ ޒަމީރު ވިދާޅުވީ، މިދިޔަ އަހަރުގެ މި މުއްދަތާއި އަޅާބަލާއިރު، މިއަހަރުގެ މިހާހިސާބަށް އާއިރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވެފައިވާކަމަށެވެ.
މިނިސްޓަރ ޒަމީރު ވިދާޅުވީ މިއަހަރުވެސް ފާހަގަކުރެވިގެން ގޮސްފައިވަނީ ޓޫރިޒަމް ސިނާޢަތަށް އެތައް ގޮންޖެހުންތައް ކުރިމަތިވި އަހަރެއްގެ ގޮތުގައިކަމަށެވެ. ރާއްޖޭގެ ފަތުރުވެރިކަމުގެ ސިނާޢަތުގެ މުހިއްމު މާރކެޓްތައްކަމަށްވާ، ފްރާންސް، ޖަރުމަނުވިލާތް ފަދަ ޤައުމުތަކުގައި ޓެރަރިޒަމްގެ ނުރައްކާތެރި ޙަމަލާތަކާއި ކުރިމަތިލާންޖެހުނުއިރު، ހަނގުރާމައިގެ ސަބަބުން މެދުއިރުމަތީގެ ޤައުމުތައް އޮތީ ވަރަށް ކަންބޮޑުވާ ޙާލަތެއްގައިކަމަށް މިނިސްޓަރ ޒަމީރު ފާހަގަކުރެއްވިއެވެ. މީގެ އިތުރުން ރާއްޖޭގެ ފަތުރުވެރިކަމުގެ ސިނާޢަތް ބޮއިކޮޓް ކުރެއްވުމަށް ބައެއް ފަރާތްތަކުން މިއަހަރުވެސް ގިނަ މަސައްކަތްތަކެއް ކޮށްފައިވާކަން މިނިސްޓަރ ވިދާޅުވިއެވެ.
img:http://s1.psmnews.mv/images/660x400/6533.jpg|ރާއްޖޭގެ ރިސޯޓެއް - ފޮޓޯ- ސޮނޭވާ ގުރޫޕް
މިނިސްޓަރ ޒަމީރު ވިދާޅުވީ ގޮންޖެހުންތަކާއެކުވެސް މިއަހަރު ރާއްޖެއަށް ޒިޔާރަތްކުރަމުންދާ ފަތުރުވެރިންގެ އަދަދު އިތުރުވަމުންދާކަމަށެވެ. މިގޮތުން ހުސްވިއަހަރުގެ ޑިސެމްބަރުމަހާއި އަޅާބަލާއިރު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވެފައިވާކަން މިނިސްޓަރ ޒަމީރު ފާހަގަކުރެއްވިއެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިއަހަރުގެ އޮކްޓޯބަރުމަހުގެ ނިއަލަށް ރާއްޖެއަށް އެއް މިލިއަން ފަސްދޮޅަސް ހާހަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. މިއީ ދެހާސް ފަނަރަވަނަ އަހަރުގެ މި މުއްދަތާ އަޅާބަލާއިރު، ތިނެއް ޕޮއިންޓް ހައެއް އިންސައްތައިގެ ކުރިއެރުމެކެވެ.
މިއަހަރުގެ ތެރޭގައި ޔޫރަޕްގެ ޤައުމުތަކުން ރާއްޖެއަށް ޒިޔާރަތްކުރި ފަތުރުވެރިންގެ މިންވަރު ވަރަށް ބޮޑަށް ވަނީ އިތުރުވެފައެވެ. މީގެ އިތުރުން މެދުއިރުމަތީގެ ޤައުމުތަކުންނާއި، އެމެރިކާ އަދި އެފްރިކާގެ ޤައުމުތަކުން ޒިޔާރަތްކުރި ފަތުރުވެރިންގެ އަދަދު މިދިޔަ އަހަރާއި އަޅާބަލާއިރު އިތުރުވެފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ.