ދިވެހިރާއްޖޭގައި ފަތުރުވެރިކަމާ ގުޅުންހުރި ދަތުރު ރާވައި ހިންގުމުގެ ޚިދުމަތްދޭ ކުންފުނިތަކުގެ 2016 ވަނަ އަހަރުގެ އަހަރީ ރިޕޯޓް، މިހިނގާ ޖެނުއަރީ މަސް ނިމުމުގެ ކުރިން ޓޫރިޒަމް މިނިސްޓްރީއަށް ހުށަހަޅައި ނިންމުމަށް އެ މިނިސްޓްރީން އިލްތިމާސް ކުރައްވައިފިއެވެ.
މިކަމާއި ބެހޭގޮތުން ޓޫރިޒަމް މިނިސްޓްރީން ވިދާޅުވީ، ދިވެހިރާއްޖޭގައި ފަތުރުވެރިކަމާ ގުޅުންހުރި ދަތުރު ރާވައި ހިންގުމާ ބެހޭ ޤަވާއިދުގެ 8 ވަނަ މާއްދާގެ ދަށުން ކޮންމެ އަހަރަކުވެސް ކުންފުނީގެ އަހަރީ ރިޕޯޓެއް ޓޫރިޒަމް މިނިސްޓްރީއަށް ހުށައަޅަންޖެހޭ ކަމަށެވެ. ކަނޑައެޅިފައިވާ މުއްދަތުގައި އަހަރީ ރިޕޯޓްތައް ހުށަނާޅައިފިނަމަ، އެކުންފުންޏަކަށް ދީފައިވާ ހުއްދަ ބާތިލްކުރެވޭނެ ކަމަށްވެސް އެ މިނިސްޓްރީން ވިދާޅުވެއެވެ.
ދިވެހިރާއްޖޭގައި ފަތުރުވެރިކަމާ ގުޅުންހުރި ދަތުރު ރާވައި ހިންގުމުގެ ޚިދުމަތް ދިނުމާއި ބެހޭ ޤަވައިދުގެ 8 ވަނަ މާއްދާގައިވަނީ، ކޮންމެ އަހަރެއްގެ ޖެނުއަރީ މަސް ހުސްވުމުގެ ކުރިން ކުންފުނީގެ އަހަރީ ރިޕޯޓެއް ޓޫރިޒަމް މިނިސްޓްރީއަށް ހުށައަޅަންޖެހޭނޭ ކަމަށެވެ. ޓޫރިޒަމް މިނިސްޓްރީގެ ވެބްސައިޓްގައިވާ ތަފާސްހިސާބުތަކަށް ބަލާއިރު، ޓްރެވަލް އޭޖެންޓުންގެ ގޮތުގައި 299 ކުންފުންޏެއް ހަރަކާތްތެރިވެއެވެ.