ފައިން ޓެކްސީގެ ޚިދުމަތް ހޯދާ ކަސްޓަމަރުންނަށް، އުރީދޫ އެމްފައިސާ މެދުވެރިވެރިކޮށް ފައިސާ ދެއްކޭނެގޮތް ހަމަޖައްސައިފިއެވެ.
އުރީދޫ އެމްފައިސާގެ ޚިދުމަތަކީ، ފޯނުގައި އެޚިދުމަތަށް ރަޖިސްޓްރާކުރާ އެކައުންޓަށް ފައިސާ ޖަމާކޮށް މޮބައިލް ފޯން މެދުވެރިކޮށް އެކި ވިޔަފާރީގެ މުޢާމަލާތްތަކަށް ފައިސާ ދެއްކޭ ނިޒާމެކެވެ.މި ޚިދުމަތާއެކު، ފައިން ޓެކްސީގެ ޚިދުމަތް ބޭނުންކުރާ ހުރިހާ ފަރާތްތަކަށްވެސް މޯބައިލް ފޯނު މެދުވެރިކޮށް ރައްކާތެރިކަމާއި، ފަސޭހަކަމާއެކު ވަގުތުން ފައިސާ ދެއްކޭނެ އިންތިޒާމު ހަމަޖެހިފައިވާކަމަށް އުރީދޫގެ ހެޑް އޮފް ސޭލްސް، ހުސައިން ނިޔާޒު ވިދާޅުވިއެވެ. ނިޔާޒު ވިދާޅުވީ މިޚިދުމަތާއިއެކު އާންމުންނަށް އިތުރު ފަސޭހަކަމެއް ލިބި، ފައިސާ މާރުކުރަން ކާރުގައި މަޑުކުރަންނުޖެހުން ފަދަ ލުއި ފަސޭހަތައް ލިބިގެންދާނެ ކަމަށެވެ.
''އުރީދޫ ޑިޖިޓަލް މޯލްޑިވްސް ތަޞައްވުރާއި ގުޅިގެން ދާގޮތުން މޮބައިލް ފޯނު މެދުވެރިކޮށް ރައްކާތެރިކަމާއި ފަސޭހަކަމާއި އެކު ޓެކްސީ ދަތުރުތަކަށް އެމްފައިސާ މެދުވެރިކޮށް ފައިސާ ދެއްކޭނެ އިންތިޒާމު ހަމަޖެހިގެން ދިޔުމަކީ އަޅުގަނޑުމެން ނުހަނު އުފާކުރާކަމެއް. އުރީދޫއިން ހިއްސާކުރާ އާންމު ދިރިއުޅުން ފަސޭހަ ކުރުމުގެ ތަސައްވުރާއި އެކު މި ގުޅުމުގެ ސަބަބުން އަޅުގަނޑުމެންގެ ކަސްޓަމަރުންގެ ދިރިއުޅުމަށް އިތުރު ފުރިހަމަކަމެއް ލިބިގެންދާނެކަމަށް އަޅުގަނޑުމެން ޔަޤީންކުރަން، އަދި ކުރިއަށް އޮތްތާނގައި ހުޅުމާލެއަށް މި ޚިދުމަތް ތަޢާރަފްކުރާނަން'' ނިޔާޒު ވިދާޅުވިއެވެ.
ފައިން ޓެކްސީ ސެންޓަރުގެ ވެރިޔާ އަޙުމަދު ޝިހާދު ވިދާޅުވީ އެޓެކްސީ ސެންޓަރުގެ ޓެކްސީތަކުން މިޚިދުމަތް ދިނުމަށް ތައްޔާރުވެފައިވާކަމަށެވެ. އުރީދޫގެ އެމް ފައިސާގެ ޚިދުމަތް ހޯދާ ފަރާތްތަކަށް އެޚިދުމަތް މެދުވެރިކޮށް މިއަދުން ފެށިގެން ޓެކްސީއަށް ފައިސާދެއްކޭނެކަމަށާއި، މިޚިދުމަތުގެ ސަބަބުން ޓެކްސީ ކުރާ ފަރާތްތަކަށާއި ދަތުރުކުރާ ފަރާތްތަކަށް ބޮޑު ފަސޭހައެއް ލިބިގެންދާނެކަމަށް ޝިހާދު ވިދާޅުވިއެވެ.
''މި ޕާޓްނާރޝިޕްގެ ދަށުން ޓެކްސީ ތަކަށް ޑިޖިޓަލީ ފައިސާ ދެއްކޭނެ އިންތިޒާމު ހަމަޖެހިގެންދާނެ. މި ޚިދުމަތް ދެވޭ އެންމެ ފުރަތަމަ ޓެކްސީ ސެންޓަރަކަށް ފައިން ޓެކްސީވުމަކީ އަޅުގަނޑުމެން ނުހަނު ފަޚުރުވެރިވާކަމެއް'' ޝިހާދު ވިދާޅުވިއެވެ.
މިއަދު ފައިން ޓެކްސީއާއެކު މިޚިދުމަތް ތަޢާރަފްކުރިނަމަވެސް ކުރިއަށް އޮތްތަނުގައި އިތުރު ޓެކްސީ ސެންޓަރުތަކާއެކު މިޚިދުމަތް ދިނުމަށް މަޝްވަރާކުރަމުން އަންނަކަމަށް އުރީދޫން ބުނެއެވެ. ޚިދުމަތް ފުޅާކުރުމަށް ހުޅުމާލޭގެ ޓެކްސީތަކުގައިވެސް މި ޚިދުމަތް ދޭން މިހާރު ތައްޔާރުވަމުން އަންނަކަމަށް އުރީދޫ މޯލްޑިވްސުން ބުނެއެވެ.މިޚިދުމަތާއެކު އުރީދޫ އެމްފައިސާ މެދުވެރިކޮށް ޓެކްސީއަށް ފައިސާދައްކާ ފަރާތްތަކަށް މަހަކު އެއްހާސް އެމްބީއާއި ހަމައަށް ހިލޭ ޑޭޓާ ލިބޭ ޕްރޮމޯޝަނެއްވެސް ވަނީ ފަށާފައެވެ. އުރީދޫން އެމް ފައިސާ ތަޢާރަފްކޮށްފައިވަނީ 2016 ވަނަ އަހަރުގެ ޖުލައި މަހުގައެވެ.މި ޚިދުމަތުގެ ދަށުން މޮބައިލްގައި ރަޖިސްޓްރީކުރާ އެކައުންޓް މެދުވެރިކޮށް، މޮބައިލް ފޯނު ބޭނުންކޮށްގެން ފައިސާ ފޮނުވުމާއި، ޕްރީޕެއިޑް އެކައުންޓް ރީޗާރޖްކުރުމާއި، ވިޔަފާރި ކުރުމުގެ އިތުރުން ބިލްވެސް ދެއްކޭނެއެވެ.