ވެލާނާ އިންޓަރނޭޝަނަލް އެއަރޕޯޓަކީ ދިވެހިރާއްޖޭގެ އިޤްތިޞާދީ މައި ދޮރާއްޓެވެ. ރާއްޖޭގެ އިޤްތިޞާދީ އުފެއްދުންތެރިކަމާއި ކުރިއެރުން ބިނާވެގެންވަނީ، ވެލާނާ އިންޓަރނޭޝަނަލް އެއަރޕޯޓަށް އަންނަ ކުރިއެރުމުގެ މައްޗަށްކަމަށް އިޤްތިޞާދީ މާހިރުން ފާހަގަކުރައްވައެވެ. އެއަރޕޯޓް ތަރައްޤީގެ މަޝްރޫޢުއާއެކު އެންމެ ފާހަގަކޮށްލެވެނީ ރާއްޖޭގެ އިޤްތިޞާދުގެ މައި ތަނބުކަމަށްވާ، ޓޫރިޒަމް ދާއިރާއަށް އަންނާނޭ ކުރިއެރުމެވެ.
ރައީސުލް ޖުމްޙޫރިއްޔާ ޢަބުދުﷲ ޔާމިން ޢަބްދުލްޤައްޔޫމު ވެރިކަމަށް ވަޑައިގަތުމަށްފަހު، ރާއްޖޭގެ އިޤްތިޞާދު ތަރައްޤީކުރެއްވުމަށްޓަކައި އިޤްތިޞާދީގޮތުން މުހިއްމު މަޝްރޫޢުތަކެއް ވަނީ ފަށްޓަވާފައެވެ. މިގޮތުން ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމުގެ މަޝްރޫޢުއަކީ އެންމެ ފާހަގަކޮށްލެވޭ މަޝްރޫޢެވެ.
އެއަރޕޯޓް ތަރައްޤީކުރުމުގެ މަޝްރޫއުގެ ދަށުން، އެންމެ ފާހަގަކޮށްލެވެނީ، އަލަށް ތަރައްޤީކުރުމަށް ހަމަޖެހިފައިވާ 300 މިލިއަން ޑޮލަރުގެ އިންޓަރނޭޝަނަލް ޓާމިނަލާއި، 370 މިލިއަނަށްވުރެ ގިނަ ޑޮލަރު ހޭދަކޮށްގެން ތަރައްޤީކުރުމަށް ނިންމާފައިވާ އާ ރަންވޭއެވެ.
ސަރުކާރުން ވަނީ ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމަށް 1 ބިލިއަން ޑޮލަރު ޚަރަދުކުރެއްވުމަށް ނިންމަވާފައެވެ. އެއަރޕޯޓް ތަރައްޤީކުރުމުގެ މަޝްރޫޢު ނިމުމުން، އެއަރޕޯޓުންދޭ ޚިދުމަތްތައް މިހާރަށްވުރެ އެތައް ގުނައެއް ފުޅާވެގެންދާނޭކަމަށް ސަރުކާރުން ވަނީ ވިދާޅުވެފައެވެ. އަލަށް ތަރައްޤީކުރެއްވުމަށް ނިންމާފައިވާ އާ ރަންވޭއަށް އެންމެބޮޑެތި މަތިންދާބޯޓްފަހަރަށް ޖެއްސޭއިރު، އަލަށް ތަރައްޤީކުރައްވާ އިންޓަރނޭޝަނަލް ޓާމިނަލުން އަހަރަކު ހަތް މިލިއަނަށްވުރެ ގިނަ ފަސެންޖަރުންނަށް ހިދުމަތްދެވޭނެއެވެ.
މިކަމުގެ ސަބަބުން ރާއްޖެއަށް ދަތުރުކުރާ ބައިނަލްއަޤްވާމީ އެއަރލައިންތަކުގެ ކެޕޭސިޓީ އިތުރުކުރުމަށް މަގުފަހިވެގެންދާނެއެވެ. އަދި ރާއްޖެއަށް އުދުހުންތައް ބާއްވަމުން އަންނަ އެއަރލައިންތަކުގެ އޮޕަރޭޝަންތަކަށް އިތުރު ކުރިއެރުންތައް ލިބޭނެއެވެ.
ސަރުކާރުން ވިދާޅުވާގޮތުގައި އެއަރޕޯޓް ތަރައްޤީކޮށް ނިމުމުން ރާއްޖޭގެ ފަތުރުވެރިކަމުގެ ސިނާޢަތަށް ބޮޑެތި ކުރިއެރުންތަކެއް ލިބިގެންދާނެއެވެ. ޓޫރިޒަމް މިނިސްޓަރު މޫސާ ޒަމީރު ވިދާޅުވެފައިވަނީ، އެއަރޕޯޓް ތަރައްޤީކުރެއްވުމުގެ މައިގަނޑު ސަބަބަކީ ރާއްޖެއަށް އިތުރު ޓޫރިސްޓުން ގެނައުމުގެ ޤާބިލްކަން އޮތުންކަމަށެވެ. އެއަރޕޯޓް ތަރައްޤީކޮށް ނިމުމުން އަހަރަކު ހަތް މިލިއަން ޓޫރިސްޓުން ރާއްޖެ ގެނައުމުގެ ޤާބިލްކަން ލިބިގެންދާނެކަމަށެވެ. އަދި މިކަމުގެ ސަބަބުން ޓޫރިޒަމް ދާއިރާއިން ރާއްޖޭގެ އިޤްތިޞާދަށް ޢާމްދަނީގެ ގޮތުގައި މިހާރު ވަންނަ ދެ ބިލިއަން ޑޮލަރު އަށް ބިލިއަން ޑޮލަރަށް އިތުރުވެގެންދާނެއެވެ.
އަދުގެ ސަރުކާރުން ނިންމަވާފައިވަނީ މި ދައުރު ނިމުމުގެ ކުރިން ފަންސާސް ރިސޯޓް މާކެޓަށް ނެރުއްވުމެވެ. މިއަމާޒަށް ވާސިލްވުމަށްޓަކައި ސަރުކާރުން ދަނީ ކޮންމެ އަހަރަކު މަދުވެގެން 11 ރިސޯޓް މާކެޓަށް ނެރުއްވަމުންނެވެ. މިދިޔަ އަހަރު މުޅިން އަލަށް 11 ރިސޯޓް ހުޅުވާފައިވާއިރު، މިއަހަރު ވިހި ރިސޯޓް ހުޅުވިގެންދާނޭކަމަށް ސަރުކާރުން ވަނީ ވިދާޅުވެފައެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫއުގެ ދަށުން އާ ރަންވޭގެ ބިންހިއްކުމުގެ މަސައްކަތް ފަށާފައިވާއިރު، ރިސޯޓްތައް ހިއްސާވާ ޖަމިއްޔާ، މޯލްޑިވްސް އެސޯސިއޭޝަން ފޯ ޓޫރިޒަމް އިންޑަރސްޓްރީ މަޓީން ވަނީ، ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމަށް ރައީސް ޔާމިނު ކުރައްވަމުންގެންދަވާ މަސައްކަތްޕުޅުތަކަށް ތައުރީފްކުރައްވާފައެވެ.