މޯލްޑިވިއަންގެ ފްލައިޓްތައް މާލެއިން، ސީދާ ސްރީލަންކާގެ ކޮލަމްބޯ އެއަރޕޯޓަށް ދަތުރުކުރުމުގެ ހުއްދަ ސްރީލަންކާ ސަރުކާރުން ދެއްވައިފިއެވެ.
މިކަން ހާމަކުރައްވާފައިވަނީ މިނިސްޓަރ އޮފް ޓުރިޒަމް މޫސާ ޒަމީރު މިހާރު ސްރީލަންކާއަށް ކުރައްވަމުންދާ ދަތުރުފުޅުގައި އެޤައުމުގެ މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން ނިމަލް ސިރިޕާލަ ޑިސިލްވާއާ އެކު ބޭއްވެވި ބައްދަލުކުރެއްވުމުގައެވެ. މިބައްދަލުކުރެއްވުމުގައިވަނީ މިކަމަށްޓަކައި ކުރަންޖެހޭ އެންމެހާ ކަންކަން ދެ ޤައުމުގެ ސިވިލް އޭވިއޭޝަން އޮތޯރިޓީ ގުޅިގެން، ވީ އެންމެ އަވަހަކަށް ފުރިހަމަ ކުރުމަށް ދެ ޤައުމުގެ މިނިސްޓަރުން އެއްބަސްވެވަޑައިގެންފައެވެ.
ދެ މިނިސްޓަރުންގެ ބައްދަލުކުރެއްވުމުގައި ދެއްކެވި ވާހަކަފުޅުގައި މިނިސްޓަރު މޫސާ ޒަމީރު ވަނީ މި ހުއްދަ ސްރީލަންކާ ސަރުކާރުން ދެއްވިކަމަށްޓަކައި، އެޤައުމުގެ ސަރުކާރަށާއި، މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން ނިމަލް ސިރިޕާލަ ޑިސިލްވާއަށް ޝުކުރު އަދާކުރައްވަފައެވެ. ސްރީލަންކާއާއި ރާއްޖެއާއި ދެމެދު ވައިގެ ގުޅުން އިތުރަށް ފުޅާކުރުމުގެ މުހިންމުކަމުގެ މައްޗަށް އަލިއަޅުވާލައްވައި ވާހަކަފުޅުދައްކަވަމުން މިނިސްޓަރު މޫސާ ޒަމީރު ވިދާޅުވެފައިވަނީ ދެ ޤައުމުގެ ދެމެދުގައި ފްލައިޓްތައް އިތުރުކުރުމަކީ ވަރަށް މުހިންމު ކަމެއްކަމަށެވެ. އަދި ކޮލަމްބޯ އެއަރޕޯޓަށް ސީދާ ދަތުރުތައް، ފެށުމަކީ ސްރީލަންކާއަށް ދަތުރުކުރާ ދިވެހިންނަށް ލިބުނު ވަރަށް ބޮޑު ފަސޭހައަކަށް ވާނެކަމަށް ވެސް މިނިސްޓަރު ވިދާޅުވިއެވެ. މީގެއިތުރުން މިކަމުގެ ސަބަބުން ދެ ޤައުމުގެ ގުޅުން އިތުރަށް ބަދަހިވާކަމަށް ޔަޤީންކުރައްވާކަމަށްވެސް ދެ ޤައުމުގެ މިނިސްޓަރުން ވިދާޅުވިއެވެ.
މިބައްދަލުކުރެއްވުމުގައި މަޝްވަރާކުރެއްވި ކަންތައްތަކުގެތެރޭގައި އޭވިއޭޝަން ދާއިރާއިން ދެޤައުމުގެ ދެމެދުގައި ފަންނީ އެހީތެރިކަން ބަދަލުކުރުންވެސް ހިމެނެއެވެ.