ރާއްޖޭގެ ވައިގެ ދަތުރުފަތުރުގެ ދާއިރާ ތަރައްޤީކުރެއްވުމަށް ސަރުކާރުން ގެންގުޅުއްވާ ސިޔާސަތުގެ ދަށުން، 57.5 މިލިއަން ޑޮލަރު ހޭދަކުރައްވައިގެން، ރާއްޖޭގެ 5 ރަށެއްގައި އެއަރޕޯޓް ހެދުމަށް މެލޭޝިއާގެ ކުންފުންޏަކާ މިއަދު ހަވާލުކުރައްވައިފިއެވެ.
އެއަރޕޯޓު ހަދަން މެލޭޝިއާގެ ގްރީޕޮން އެނަރޖީއާ ހަވާލުކުރެއްވި 5 ރަށަކީ، ހދ.ކުޅުދުއްފުށި، ފ.ނިލަންދޫ، ގދ.މާވަރުލު، އެއަތޮޅު ފަރެސްމާތޮޑާގެ އިތުރުން ށ.ފުނަދޫ އެވެ.
ޓޫރިޒަމް މިނިސްޓްރީން ވަނީ މި ފަސް ރަށުގައި އެއަރޕޯޓް ތަރައްޤީކުރެއްވުމުގެ އެއްބަސްވުމުގައި ގްރީޕޮން އެނަރޖީއާއެކު ސޮއިކުރައްވާފައެވެ. ޓޫރިޒަމް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ، މިނިސްޓަރ އޮފް ޓޫރިޒަމް މޫސާ ޒަމީރެވެ. މެލޭޝިއާގެ ގްރީޕޮން އެނަރޖީގެ ފަރާތުން ސޮއިކުރްވީ އެކުންފުނީގެ ޗީފް ކޯޕަރޭޓް އޮފިސަރ ޑިރްކް ކުއިޓެންއެވެ.
އެއްބަސްވުމުގައި ސޮއިކުރެއްވުމަށްފަހު ޓޫރިޒަމް މިނިސްޓަރު މޫސާ ޒަމީރު ވިދާޅުވީ، ރާއްޖޭގެ ޓްރާންސްޕޯޓް ނެޓްވަރކް ހަރުދަނާކުރެއްވުމަކީ ރައީސް ޔާމީނުގެ ސަރުކާރުން ވަރަށް ޚާއްޞަ އިސްކަމެއްދެއްވާ ކަމެއްކަމެއްކަމަށެވެ. އަދި ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު އާއިއެކު އަތޮޅުތަކުގެ ސަރަޙައްދީ އެއަރޕޯޓްތައް ތަރައްޤީކޮށް ނިންމެވުމުގެ މުހިއްމުކަން ބޮޑުކަން މިނިސްޓަރު ޒަމީރު ފާހަގަކުރެއްވިއެވެ.
img:http://s1.psmnews.mv/images/660x400/14888659439636.jpg|މިއަދުގެ ރަސްމިޔަތުގައި މިނިސްޓަރު މޫސާ ޒަމީރު ވާހަކަފުޅުދައްކަވަނީ
ސަރަޙައްދީ އެއަރޕޯޓްތައް ޤާއިމްކުމުގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ ދަތުރުފަތުރަށް ފަސޭހަކަމެއް ލިބޭނެއެވެ. މިއީ ރާއްޖޭގެ ޓޫރިޒަމް ފުޅާވުމަށް ލިބޭ ވަރަށްބޮޑު ބާރެއްކަމަށް މިނިސްޓަރ ޒަމީރު ވިދާޅުވިއެވެ. މިނިސްޓރަ ޒަމީރު ވިދާޅުވީ، އަލަށް ހަދާ 5 އެއަރޕޯޓްގެ ތެރެއިން ހދ.ކުޅުދުއްފުށީ އެއަރޕޯޓަކީ ސަރުކާރުގެ މެނިފެސްޓޯގައި ހިމެނޭ ވަރަށް މުހިއްމު މަޝްރޫޢުއެއްކަމަށެވެ. މިނިސްޓަރ ވިދާޅުވީ 5 އެއަރޕޯޓްގެ ތެރެއިން އެންމެބޮޑު ގޮންޖެހުމެއް ކުރިމަތިވާނެ އެއަރޕޯޓަކީ ވެސް ކުޅުދުއްފުށީ އެއަރޕޯޓްކަމަށެވެ. މި އެއަރޕޯޓް ހެދުމަށް ހަމަޖެހިފައިވަނީ ކުޅުދުއްފުށީ، ކުޅި ހިއްކައިގެންނެވެ. ގޮންޖެހުންތައް ހުރިނަމަވެސް ކަނޑައެޅިފައިވާ ތާރީހަށް އެ އެއަރޕޯޓްގެ މަސައްކަތްވެސް ނިންމަވާނޭކަމަށް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ، މީގެ ތެރެއިން މާވަރުލް އެއަރޕޯޓްގެ މަސައްކަތް ނިންމަވައި މިއަހަރުގެ ތެރޭގައި ހުޅުވޭނެކަމަށެވެ.
މިއަދުގެ ރަސްމިއްޔާތުގައި ވާހަކަފުޅުދައްކަވަމުން މެލޭޝިއާގެ ގްރީޕޮން އެނަރޖީގެ ޗީފް ކޯޕަރޭޓް އޮފިސަރ ޑިރްކް ކުއިޓެން ވިދާޅުވީ، އަދުގެ ސަރުކާރުން ރާއްޖޭގެ ޢުމުރާނީ ތަރައްޤީއަށްޓަކައި ކުރައްވަމުންގެންދަވާ މަސައްކަތްތަކަކީ ފާހަގަކޮށްލެވޭ މަސައްކަތްތަކެއް ކަމަށެވެ. އެކުންފުނީގެ އަމާޒަކީ ސަރުކާރުން ކަނޑައަޅުއްވާފައިވާ ތާވަލާ އެއްގޮތަށް މަސައްކަތްތައް ކުރިއަށްގެންގޮސް އެއަރޕޯޓްތައް ނިންމުންކަމަށް އޭނާ ވިދާޅުވިއެވެ.
ކުޅުދުއްފުށީ އެއަރޕޯޓްގެ މަސައްކަތް ކުޅި ހިއްކައިގެން ތަރައްޤީކުރާއިރު، ށ.ފުނަދޫ، ފ.ނިލަންދޫ، ގދ.ފަރެސްމާތޮޑާގެ އެއަރޕޯޓް ހަދަނީ ބިން ހިއްކައިގެންނެވެ. ސަރުކާރުގެ އަމާޒަކީ އަންނަ އަހަރުގެ އޮކްޓޯބަރ މަހުގެ ނިޔަލަށް ފަސް އެއަރޕޯޓްގެ މަސައްކަތްވެސް ނިންމުމެވެ.