ރިޓަޔަމަންޓް ޕެންޝަން ސްކީމްގެ ޤަވާއިދާ އެއްގޮތަށް ޢަމަލުކުރަމުންނުދާ ކުންފުނިތަކުގެ ޢަދަދު އިތުރުވަމުން އަންނަކަމަށް މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ތަފާސްހިސާބުތަކުން ދައްކައިފިއެވެ.
ޕެންޝަން އޮފީހުގެ ތަފާސްހިސާބުތަކުން ދައްކާގޮތުގައި މިދިޔަ މަހުގެ ނިޔަލަށް ރިޓަޔަމަންޓް ޕެންޝަން ސްކީމްގެ ޤަވައިދާ އެއްގޮތަށް ޢަމަލުނުކޮށްގެން 561 ކުންފުންޏެއްގެ ނަންވަނީ ޢާއްމުކުރައްވާފައެވެ.
މި ލިސްޓްގައި ހިމެނެނީ ވަޒީފާ އަދާކުރާ މީހުން ރަޖިސްޓްރީ ނުކުރާ ފަރާތްތަކާ، ރަޖިސްޓްރީ ކޮށްފައި މުވައްޒަފުން ޕެންޝަން ސްކީމްގައި ބައިވެރި ނުކުރާ ފަރާތްތަކުގެ އިތުރަށް ކުންފުނި ރަޖިސްޓްރީކޮށް މުވައްޒަފުންވެސް ބައިވެރިކޮށް މަހުންމަހަށް ފައިސާ ޖަމާނުކުރާ ފަރާތްތަކެވެ. ޕެންޝަން އޮފީހުން ގެންދަވަނީ ރިޓަޔަމެންޓް ޕެންޝަން ސްކީމްގެ ޤަވައިދާ އެއްގޮތަށް ޢަމަލުކުރަމުންނުދާ ފަރާތްތަކުގެ މައްސަލަ ކޯޓަށްވެސް ހުށަހަޅުއްވަމުންނެވެ.
ރިޓަޔަމަންޓް ޕެންޝަން ސްކީމްގެ ފަންޑަކީ މިވަގުތު ދިވެހިރާއްޖޭގައި އޮތް އެންމެބޮޑު އިންވެސްޓްމަންޓް ފަންޑެވެ. މި ފަންޑްގައިވާ ފައިސާގެ ޢަދަދު 6 ބިލިއަން ރުފިޔާއަށް އަރާއިރު، ޖުމްލަގޮތެއްގައި ކޮންމެ މަހަކު 78މިލިއަން ރުފިޔާ ފަންޑަށް ޖަމާވަމުން އަންނަކަމަށް މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން މައުލޫމާތު ދެއްވައެވެ.