ހޮންގ ކޮންގއާއެކު އެކުލަވާލުމަށް މަސައްކަތްކުރާ މިނިވަން ވިޔަފާރީގެ އެއްބަސްވުމުގެ މަޝްވަރާތަކުގެ ދެވަނަ ބައްދަލުވުން، މިއަދު ރާއްޖޭގައި ފަށައިފިއެވެ.
މި ބައްދަލުވުން ކުރިއަށްދަނީ، ބަނޑޮސް އައިލެންޑް ރިސޯޓްގައެވެ. މި މަޝްވަރާތަކުގައި ދިވެހިރާއްޖޭގެ ފަރާތުން އެންމެ އިސް މަންދޫބެއްގެ ގޮތުގައި ބައިވެރިވެ ވަޑައިގަންނަވަނީ، އިކޮނޮމިކް މިނިސްޓަރ މުޙައްމަދު ސަޢީދު އެވެ. މިއަދު ފެށި މި ބައްދަލުވުން އަންނަ ބުރާސްފަތި ދުވަހުގެ ނިޔަލަށް ކުރިއަށްދާނެއެވެ. ހޮންގކޮންގ އާއިއެކު މިނިވަން ވިޔަފާރީގެ އެއްބަސްވުމުގެ ފުރަތަމަ މަޝްވަރާ ބައްދަލުވުންތައް ބާއްވާފައިވަނީ މިދިޔަ އަހަރުގެ ސެޕްޓެމްބަރު މަހުގެ ސައްބީހުން ތިރީހަށް ހޮންކޮންގގައެވެ.
މިއަދު ފެށި ބައްދަލުވުންތަކަށް ތައްޔާރުވުމުގެ ގޮތުން، ރާއްޖޭގެ ވިޔަފާރިވެރިންނާއި، ރާއްޖެއިން މަހުގެ ބާވަތްތައް އެކްސްޕޯރޓް ކުރާ ފަރާތްތަކާއެކު މިނިސްޓްރީ އިން ސިލްސިލާ ބައްދަލުވުންތަކެއް ވަނީ ބާއްވާފައެވެ. ހޮންގކޮންގ އަކީ މިހާރުވެސް ވަރަށް ބޮޑަށް ހުޅުވާލެވިފައިވާ އިޤްތިސާދަކަށް ވެފައި، ޚިދުމަތުގެ ދާއިރާގައި ބޮޑެތި ކުރިއެރުންތަކެއް ހޯދާފައިވުމާއި، ބޭންކިންގ އަދި ފައިނޭންސްގެ ދާއިރާއިން ދުނިޔޭގެ އެންމެ ފުންނާބުއުސް ބޭންކްތައް ހަރަކާތްތެރިވާ ޤައުމަކަށް ވާތީ، ބޭންކިންގ އަދި ފައިނޭންސިންގ ގެ ދާއިރާއިން، އިތުރު އިންވެސްޓްމަންޓްތައް ރާއްޖެއަށް ގެނައުމަށްވެސް މި ބައްދަލުވުމުގައި މަޝްވަރާ ކުރުމަށް ވަނީ ހަމަޖެހިފައެވެ.
ބައިނަލްއަޤްވާމީ ޤައުމުތަކާއިއެކު މިނިވަން ވިޔަފާރީގެ އެއްބަސްވުންތައް އެކުލަވާލުމަށް ސަރުކާރުން ކުރައްވަމުންގެންދަވާ މަސައްކަތްތަކުގައި އެންމެ ފުރަތަމަ މަޝްވަރާތައް ކުރިއަށް ގެންގޮސްފައިވަނީ ޗައިނާއާ އެކުގައެވެ. ޗައިނާއިން ކުރިއަށްގެންދިއަ ވާހަކަތަކުގައި ރާއްޖޭން ބޭރުކުރާ މަހާއި ސީފުޑްގެ ބާވަތްތަކުން އެއްވެސް ވަރަކަށް ޓެކްސް ނުނަގާ ގޮތަށް ވަނީ އެއްބަސްވެފައެވެ.
އިކޮނޮމިކް މިނިސްޓަރ މުޙައްމަދު ސައީދު ވިދާޅުވެފައިވަނީ، ޗައިނާ އާއި ދިވެހިރާއްޖެއާ ދެމެދު ވެވުމަށް ހަމަޖެހިފައިވާ ފްރީ ޓްރޭޑް އެއްބަސްވުމުގައި އަންނަ ޖޫންމަގެ ތެރޭގައި ސޮއިކުރެވިގެންދާނޭ ކަމަށެވެ. ޗައިނާގެ އިތުރުންވެސް ދިވެހިރާއްޖެއިން ދަނީ ދުނިޔޭގެ ބައެއް ބޮޑެތި ޤައުމުތަކާއެކު މިނިވަން ވިޔަފާރީގެ އެއްބަސްވުންތައް ޤާއިމްކުރެއްވުމަށް މަސައްކަތް ކުރައްވަމުންންނެވެ. މީގެތެރޭގައި އިނގިރޭސިވިލާތް، ޖަޕާން އެމެރިކާ ފާހަގަކޮށްލެވެއެވެ.