ދިވެހީންގެ ފަރާތުން ލިބުނު ފުރިހަމަ މެހެމާންދާރީ ދުނިޔޭގެ އެހެން އެއްވެސް ޤައުމަކުން މިހާތަނަށް ފެނިފައިނުވާކަމަށް، އެންމެ ކުރު މުއްދަތެއްގައި ދުނިޔޭގެ ހުރިހާ ޤައުމަކަށް ޒިޔާރަތްކުރި ކަސެންދުރަ ޑިޕެކޯލް ކެސީ ބުނެފިއެވެ.
ޕަބްލިކް ސަރވިސް މީޑިއާގެ ދައުވަތަކަށް ރާއްޖެއަށް ކުރި ދަތުރަށްފަހު ފުރަމުން ކެސީ ވަނީ ދިވެހިންގެ ހިތްހެޔޮކަމާއި މެހެމާންދާރީއަށް ތަޢުރީފްކޮށް ދިވެހިންނަށް ޝުކުރު އަދާކޮށްފައެވެ. އެންމެ ކުރު މުއްދަތެއްގައި ދުނިޔޭގެ ހުރިހާ ޤައުމަކަށް ދަތުރުކުރި އެމެރިކާގެ ކަސެންދުރަ ޑިކެޕޯލް (ކެސީ) ރާއްޖެ އައިސްފައިވަނީ ޕީއެސްއެމްގެ ދަޢުވަތަކަށް މިދިޔަ މަހުގެ އަށާވީސްވަނަ ދުވަހުއެވެ. ޕީއެސްއެމުން ކެސީ ރާއްޖެ ގެނައުމަށް ނިންމި މައިގަނޑު ސަބަބަކީ، ރާއްޖެ މުޅި ދުނިޔެއަށް އިޝްތިހާރުކުރުމެވެ.
އަށާރަ މަހާއި، ސައްބީސް ދުވަހުގެ ތެރޭގައި ދުނިޔޭގެ ހުރިހާ ޤައުމަކަށް ދަތުރުކުރި އެމެރިކާގެ ޒުވާން ޓްރެވަލާ ރާއްޖެ ގެނައުން ވެގެންދިޔައީ، ފަތުރުވެރިންގެ މަންޒިލެއްގެ ގޮތުގައި ރާއްޖެ އިޝްތިހާރުކުރުމަށް ލިބުނު ބާރަކަށެވެ. ޕީއެސްއެމްގެ ދައުވަތަކަށް ކެސީ ރާއްޖެއަށް މިކުރި ދަތުރަކީ އޭނާ ރާއްޖެއަށް ކުރި ދެވަނަ ދަތުރެވެ. މީގެ ކުރިން ކެސީ ރާއްޖެ އައިސްފައިވަނީ، ދުނިޔޭގެ ސަތޭކަ ނުވަދިހަ ހަ ޤައުމަކަށް ކުރި ޒިޔާރަތުގެ ތެރެއިންނެވެ.
img:http://s1.psmnews.mv/images/660x400/14912347255289.jpg|ކެސީގެ ލެކްޗަރގެ ތެރެއިން / ފޮޓޯ: ޕީއެސްއެމް
ޕީއެސްއެމްގެ ދައުވަތަށް ކެސީ ރާއްޖެއަށް ކުރި މި ޒިޔާރާތުގައި އޭނާ ރާއްޖޭގައި ހަ ދުވަސް މަޑުކޮށްފައިވެއެވެ. މި ދަތުރުގައި ކެސީ ވަނީ ދިވެހިންގެ އާއްމު ދިރިއުޅުން ތަޖުރިބާކޮށް، ރާއްޖޭގެ ޒުވާނުނާއެކު ވަގުތު ހޭދަކޮށްފައެވެ. ކެސީގެ މި ދަތުރުގައި އެންމެ ފާހަގަކޮށްލެވޭ އެއްކަމަކީ އެނާ ދުނިޔޭގެ ސަތޭކަ ނުވަދިހަ ހަ ޤައުމަކަށް ކުރި ދަތުރުގެ ތަޖުރިބާ ދިވެހި ޒުވާނުނަށް ހިއްސާކުރުމަށް ޕީއެސްއެމުން ދިން ފުރުސަތެވެ.
"އެނީތިންގް އިޒް ޕޮޒިބަލް" ނަމުގައި މޯލްޑިވްސް ނެޝަނަލް އޮޑިޓޯރިއަމްގައި ބޭއްވި މި ލެކްޗަރ އަޑުއަހާލުމަށް ގިނަ އަދަދެއްގެ ޒުވާނުންނާއި އާއްމުން ގޮސްފައިވެއެވެ. މި ލެކްޗަރގައި ކެސީ ވަނީ ދިވެހީންގެ މެހެމާންދާރީ އަދާކުރުމުގެ ފުރިހަމަކަމާއި ބެހޭގޮތުން ވާހަކަދައްކާފައެވެ.
ކެސީ ރާއްޖެއަށް ކުރި ދެވަނަ ދަތުރާއި ބެހޭގޮތުން ޕީއެސްއެމް ނިއުސްއަށް ދިން އިންޓަވިއުއެއްގައި އޭނާ ބުނީ، ފުރަތަމަ ދަތުރުގައި ދިވެހިރާއްޖެއާ ބެހޭގޮތުން ނުލިބޭ އެތައް މައުލޫމާތުތަކާއި ތަޖުރިބާތަކެއް ކުރެވުނުކަމަށެވެ. ކެސީ ވަނީ ރާއްޖޭގެ ފަތުރުވެރިކަމަށް ވަރަށް ބޮޑަށް ތައުރީފްކޮށްފައެވެ. އަދި ދިވެހިރާއްޖެއަކީ ކެސީ އެންމެ އަންނަން ބޭނުންވާ ޤައުމުކަމަށް އޭނާ ބުންޏެވެ. އެންމެ ކުރު މުއްދަތެއްގެ ތެރޭގައި ދުނިޔޭގެ ހުރިހާ ޤައުމަކަށް ދަތުރުކުރި ކެސީ ރާއްޖެ ގެނައުމަކީ މަންޒިލެއްގެ ގޮތުގައި ދިވެހިރާއްޖެ ދުނިޔެއަށް އިސްތިހާރުކުރުމަށް ލިބިގެންދާނޭ އިތުރު ބާރަކަށްވާނޭކަމަށް ޕީއެސްއެމްއިން ދެކެއެވެ. ރާއްޖެއަށް ކުރި މި ދަތުރުގައި ކެސީ ވަނީ ރާއްޖޭގެ ގުދުރަތީ ރީތިކަން ދައްކުވައިދޭ ފޮޓޯތައް ސޯޝަލް މީޑިއާގައި އާއްމުކޮށްފައެވެ. ކެސީގެ ފޮޓޯތަކަށް ކޮމެންޓްކުރި ބައެއް ފަރާތްތަކުން ރާއްޖެ އައުމުގެ ޝައުގުވެރިކަން ފާޅުކޮށްފައިވެއެވެ.
ކެސީގެ މި ދަތުރަށްފަހު އޭނާގެ ދަތުރާއި ބެހޭގޮތުން ޑޮކިއުމެންޓްރީ ޓްރެވަލް މީޑިއާތަކާއި ސޯޝަލް މީޑިއާ މެދުވެރިކޮށް އާއްމުންނާ ހަމައަށް ގެނެސްދޭނެއެވެ.