މިއަހަރުގެ ފުރަތަމަ ކުއާޓަރގައި ބޭންކް އޮފް މޯލްޑިވްސްއަށް ސާފު ފައިދާގެ ގޮތުގައި 260 މިލިއަން ރުފިޔާ ލިބިއްޖެއެވެ.
މިއީ މިދިޔަ އަހަރުގެ ފުރަތަމަ ކުއާޓަރއާ އަޅާބަލާއިރު ތޭވީސް އިންސައްތައިގެ ކުރިއެރުމެކެވެ. ބޭންކް އޮފް މޯލްޑިވްސް، ބީއެމްއެލުން އާއްމުކޮށްފައިވާ އެކުންފުނީގެ މިއަހަރުގެ ފުރަތަމަ ކުއަރޓަރގެ މާލީ ހިސާބުތައް ދައްކާގޮތުން، ވިޔަފާރީގެ މައިގަނޑު ހުރިހާ ދާއިރާއަކުންވެސް އެ ބޭންކުންވަނީ ރަނގަޅު ފައިދާތަކެއް ހޯދާފައެވެ. އަދި ލޯނު ދޫކުރި ނިސްބަތްވަނީ ފާހަގަކޮށްލެވޭ މިންވަރަކަށް އިތުރުވެފައެވެ. ބޭންކުގެ ރައުސުލްމާލާއި ލިކުއިޑިޓީ ރޭޝިއޯ ވަނީ ޤާނޫނުން ލާޒިމްކުރާ ވަރަށް ވުރެ ރަނގަޅު މިންވަރެއްގައި ހިފަހެއްޓިފައެވެ.
މިއަހަރުގެ ފުރަތަމަ ކުއާޓަރގައި ބީއެމްއެލްއިންވަނީ އިންވެސްޓްމަންޓް ޕްރޮގްރާމްގެ ދަށުން 3 ބްރާންޗާއި 7 ސެލްފް ސާވިސް ބޭންކިންގ ސެންޓަރ އަލަށް ހުޅުވާފައެވެ. އަދި ތަފާތު 8 ޖަމްޢިއްޔާއަކަށް ފައިސާގެ އެހީތެރިކަން ފޯރުކޮށްދީ، މުޖުތަމަޢަށް ފައިދާހުރި ހަރަކާތްތައްވެސް އެބޭންކުން ވަނީ ހިންގާފައެވެ. ބީއެމްއެލް އިން މި އަހަރު ކުރިއަށްގެންދާ 300 މިލިއަން ރުފިޔާގެ އިންވެސްޓްމަންޓް ޕްރޮގްރާމްގެ ދަށުން 22 ރަށަކަށް އޭގެ ފައިދާ ލިބި މިމަރުހަލާގެ ތެރޭގައި އާ 150 ވަޒީފާ އުފެދޭނެ ކަމަށް ބީއެމްއެލުން ހާމަކުރެއެވެ.
ފުރަތަމަ ކުއާޓަރގެ ކާމިޔާބީއާމެދު ވާހަކަދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ އެންޑްރޫ ހީލީ ވިދާޅުވީ ކާމިޔާބުކަމާއެކު މިއަހަރު ފެށުނީތީ، ހިތްހަމަޖެހޭ ކަމަށާ، މިއީ ގިނަ މަސައްކަތްތަކެއް ކުރެވުނު ކުއާޓަރއެއްކަމަށެވެ. އަދި ބީއެމްއެލްގެ މުވައްޒަފުން ދަނީ ފާހަގަކޮށްލެވޭ ފަދަ ހީވާގި މަސައްކަތްތައް ކުރަމުންކަން އެންޑްރޫ ފާހަގަކުރެއްވިއެވެ.
ހުސްވި އަހަރު ޓެކްސްއަށް ކެނޑުމަށްފަހު ބީއެމްއެލްއަށް 1.02 ބިލިއަން ރުފިޔާގެ ރެކޯޑް ފައިދާއެއް ވަނީ ވެފައެވެ.