އެމިރޭޓްސް އެއަރލައިންގެ ދަތުރުތައް ރާއްޖެއަށް ފެށިތާ 30 އަހަރުފުރުން ފާހަގަކުރުމަށް ވެލާނާ އިންޓަރނޭޝަނަލް އެއަރޕޯޓުގައި ޚާއްޞަ ޙަރަކާތްތަކެއް ކުރިޔަށް ގެންގޮސްފިއެވެ.
އެމިރޭޓްސްއިން ރާއްޖެއަށް ދަތުރުތައް ފެށިތާ 30 އަހަރު ފުރުން ފާހަގަކޮށް މިއަދު ހެނދުނު 07:33 ގައި ވެލާނާ އިންޓަރނޭޝަނަލް އެއަރޕޯޓަށް ޖެއްސި އެމިރޭޓްސްގެ ފްލައިޓަށް ވަނީ ހޫނު މަރުހަބާއެއް ކިޔާފައެވެ. އަދި ދުވަހާއި ގުޅޭ ކޭކެއްވެސް ވަނީ ފަޅާފައެވެ.
އެމިރޭޓްސްއިން ރާއްޖެއަށް ފުރަތަމަ ދަތުރުތައް ފަށާފައިވަނީ ހަފްތާއަކު 2 ދަތުރު، އެހެން ނަމަވެސް މިހާރު އެމިރޭޓްސްއިން އަންނަނީ ދުވާލަކު 4 ދަތުރު ރާއްޖެއަށް ކުރަމުންނެވެ.
އެމިރޭޓްސް ރާއްޖެއަށް ކުރާ ދަތުރުތަކަށް 30 އަހަރު ފުރުން ފާހަގަކޮށް، ވެލާނާ އިންޓަރނޭޝަނަލް އެއަރޕޯޓުގެ ވީއައިޕީ ލައުންޖުގައި ބޭއްވި ހަފްލާގައި ވާހަކަދައްކަވަމުން، މޯލްޑިވްސް އެއަރޕޯޓްސް ކޮމްޕެނީގެ މެނޭޖިންގ ޑިރެކްޓަރ އާދިލް މޫސާ ވިދާޅުވީ، އެމިރޭޓްސްއަކީ ރާއްޖޭގެ ފަތުރުވެރިކަމާއި އިޤްތިސާދީ ކުރިއެރުމުގެ ބައިވެރިވެރިއެއް ކަމަށެވެ. އަދި ވެލާނާ އިންޓަރނޭޝަނަލް އެއަރޕޯޓު ތަރައްޤީވެގެންދާއިރު، އެމިރޭޓްސްފަދަ އެއަރލައިންތަކާއެކު ވެލާނާ އިންޓަރނޭޝަނަލް އެއަރޕޯޓަށް އިތުރު ކުރިއެރުން ލިބޭނެކަމަށް އާދިލް ވިދާޅުވިއެވެ.
މި ހަފްލާގައި އެމިރޭޓްސް އެއަރލައިންގެ ޑިސްޓްރިކް މެނޭޖަރ ޑެރެލް ސޯޓްސްޒާ ވިދާޅުވީ ރާއްޖޭގެ ފަތުރުވެރިކަން އިޝްތިހާރުކުރުމަށް އެއެއލައިންނުން މަސައްކަތްކުރާ ކަމަށެވެ. އަދި ރާއްޖޭގެ މަހުގެ އުފެއްދުންތައް ދުނިޔޭގެ އެކި ހިސާބުތަކަށް އުފުލައިދިނުމުގައިވެސް އެހީތެރިވެދޭ ކަމަށް އޭނާ ވިދާޅުވިއެވެ.
ޔުނައިޓަޑު އަރަބް އެމިރޭޓްސްގެ އެއަރލައިންނެއް ކަމަށްވާ އެމިރޭޓްސްއިން އަންނަނީ ރާއްޖެއާއި ދުބާއީއާ ދެމެދު އަދި ރާއްޖެއާއި ސްރީލަންކާއާއި ދެމެދު ދަތުރުތައް ކުރަމުންނެވެ. އަދި މި ދަތުރުތަކުން ދުނިޔޭގެ 150 ވުރެ ގިނަ ޤައުމަކާއި ރާއްޖެއާ ގުޅުވައިދެއެވެ.