މިދިޔަ އަހަރުގެ ފަހު ކުއާޓަރުގައި މާލެ ސަރަޙައްދާއި އަތޮޅުތެރެއިން ޖީއެސްޓީ ނުދައްކާ ފަރާތްތަކުގެ ނަންތައް މީރާއިން ޢާއްމުކުރައްވައިފިއެވެ.
ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީން ވިދާޅުވީ، މާލެ ސަރަޙައްދުގައި ވިޔަފާރިކުރާ ފަރާތްތަކުގެ ތެރެއިން މިދިޔަ އަހަރުގެ ފަހު ތިން މަހުގެ ޖީ.އެސް.ޓީ ބަޔާން ހުށަނާޅާ ފަރާތްތަކާއި ޖީ.އެސް.ޓީ ނުދައްކާ ފަރާތްތަކުގެ މަޢުލޫމާތު ދިވެހި ސަރުކާރުގެ ގެޒެޓުގައި ޝާއިޢުކުރައްވާފައިވާކަމަށެވެ.
މި ލިސްޓުގައި ޓޫރިޒަމް ދާއިރާގައި ވިޔަފާރިކުރާ 13 ފަރާތަކާއި އެ ނޫން ދާއިރާތަކުގައި ވިޔަފާރިކުރާ 69 ފަރާތަކާއެކު ޖުމްލަ 82 ފަރާތެއްގެ ނަން ހިމެނެއެވެ.
އަތޮޅުތެރޭގައި ވިޔަފާރިކުރާ ފަރާތްތަކުގެ ތެރެއިން މިދިޔަ އަހަރުގެ ފަހު ތިން މަހުގެ ޖީ.އެސް.ޓީ ބަޔާން ހުށަނާޅައިގެން ޖުމްލަ 63 ފަރާތެއްގެ ނަން މީރާއިން ޢާއްމުކުރައްވާފައިވެއެވެ. މީގެތެރޭގައި ހިމެނެނީ، ޓޫރިޒަމް ދާއިރާގައި ވިޔަފާރިކުރާ 10 ފަރާތަކާއި އެ ނޫން ދާއިރާތަކުގައި ވިޔަފާރިކުރާ 53 ފަރާތެކެވެ. ޖީ.އެސް.ޓީ ނުދައްކާ ފަރާތްތަކުގެ މަޢުލޫމާތު ހާމަކުރުމުގެ ކުރިން އެ ފަރާތްތަކަށް އެކި ފަހަރު މަތިން ފޯނުން ގުޅައި، ޓެކްސް ނުދައްކާ ފަރާތްތަކަށް ޤާނޫނުގައި ކަނޑައަޅައިފައިވާ އަދަބުތައް ކިޔައިދެވިފައިވާނެ ކަމަށް މީރާއިން ވިދާޅުވިއެވެ.