ކޮރަލް އެޖް ޕްރައިވެޓް ލިމިޓެޑުން ރ. އަތޮޅުގައި ތަރައްޤީކުރި ދިގަލި ރިސޯޓް ހުޅުވައިފިއެވެ.
ސައްތައިން ސައްތަ ދިވެހި ކުންފުންޏެއްކަމަށްވާ، ކޮރަލް އެޖްއިން ރ. އަތޮޅުގައި ތަރައްޤީކުރި ދިގަލި މޯލްޑިވްސުން ވަނީ ޖޫންމަހުގެ އެއްވަނަ ދުވަހު އެ ރިސޯޓަށް ޒިޔާރަތްކުރި ފުރަތަމަ ފަތުރުވެރިޔާއަށް މަރުޙަބާ ކިޔާފައެވެ.
މޫދަށް ޖައްސާ ބޯޓެއްގައި ވެލާނާ އިންޓަރނޭޝަނަލް އެއަރޕޯޓުން ފުރައިގެން ދިގައްޔަށް ފަތުރުވެރިޔާ ދިއުމަށް ހޭދަވަނީ ސާޅީސް ފަސް މިނެޓެވެ. ރ. އަތޮޅު މީދޫ ކައިރީގައި އޮންނަ ދިގަލި ރިސޯޓަކީ އަށާރަ ޕޮއިންޓް ފަހެއް ހެކްޓަރުގެ ބޮޑު ރަށެކެވެ. ދިގަލި ރިސޯޓަކީ ސަތޭކަ އަށްޑިހަ ކޮޓަރީގެ ރިސޯޓެކެވެ. މި ރިސޯޓްގައި ވިހި ބީޗް ބަނގަލޯ އަދި ފަސްދޮޅަސް ތިން ބީޗް ވިލާ ހިމެނެއެވެ.
މި ރިސޯޓްގައި ފަސް ރެސްޓޯރެންޓް ހުންނައިރު، މި ރެސްޓޯރެންޓްތަކުން އޭޝިއާ، ޔޫރަޕް އަދި ދިވެހި ރަހަތައް ތަޖުރިބާކޮށްލެވޭނެއެވެ. ދިގަލި ރިސޯޓަށް ޒިޔާރަތްކުރާ ފަތުރުވެރިންނަށް، ރާއްޖޭގައި ޔުނެސްކޯއިން ކަނޑައަޅާފައިވާ ބަޔޮސްފިއާ ރިޒާވް ސަރަޙައްދުގައިވާ ހަނިފަރު ބޭއަށް ޑައިވިންއަށް ގޮސް، އެތަނުގެ ކަނޑުއަޑީގެ ޤުދުރަތީ ރީތިކަން ބަލާލުމުގެ ފުރުޞަތު ލިބިގެންދާނޭކަމަށް ކޮރަލް އެޖް ޕްރައިވެޓް ލިމިޓެޑުން ބުނެއެވެ.
ކޮރަލް އެޖް ޕްރައިވެޓް ލިމިޓެޑުން ރ. އަތޮޅުގައި ތަރައްޤީކުރި ދިގަލި ރިސޯޓް ހުޅުވާފައިވާއިރު، މާރކެޓަށް އިތުރު ރިސޯޓްތައް ނެރުއްވުމަށް ސަރުކާރުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ. ސަރުކާރުގެ އަމާޒަކީ އަހަރަކު މަދުވެގެން ދިހަ ރިސޯޓް މާކެޓަށް ނެރުއްވުމެވެ. މިގޮތުން މިދިޔަ އަހަރުވެސް އެގާރަ ރިސޯޓް މާކެޓަށް ވަނީ ނެރުއްވާފައެވެ.