މިއަހަރުގެ ފުރަތަމަ ކުއާޓަރު ނިމުނުއިރު، މަސްވެރިކަމުގެ ސިނާއަތަށް ބޮޑު ކުރިއެރުމެއް ލިބިފައިވާކަމަށް، މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ހާމަކޮށްފިއެވެ. މިއަހަރުގެ އޭޕްރީލްމަހު ރާއްޖޭގެ ދެކުނަށް އާދަޔާ ޚިލާފަށް މަސްވެރިކަން ރަނގަޅުވެ، މަސްގަންނަ ކުންފުނިތަކުންވަނީ ރިކޯޑް ޢަދަދަކަށް މަސްގަނެފައެވެ.
އެމްއެމްއޭއިން ނެރެފައިވާ ކުއާޓަރލީ އިކޮނޮމިކް ބްލެޓިންގ ރިޕޯޓްގައިވާގޮތުން، ދެހާސް ސޯޅަވަނަ އަހަރުގެ ފުރަތަމަ ކުއާޓަރއާއި އަޅާބަލާއިރު، މިއަހަރުގެ ފުރަތަމަ ކުއާޓަރގައި މަސްވެރިކަމުގެ ދާއިރާއަށް ބޮޑު ކުރިއެރުމެއް ވަނީ ލިބިފައެވެ. މިގޮތުން މިއަހަރުގެ ފުރަތަމަ ކުއާޓަރުގައި ރާއްޖޭގެ ކުންފުނިތަކުން މަސްގަތް މިންވަރު %16 އިތުރުވެފައިވާކަމަށާއި، މި މުއްދަތުގެ ތެރޭގައި ކުންފުނިތަކުން ގަތް މަހުގެ ޢަދަދު އުޅެނީ ތޭރަހާސް މެޓްރިކް ޓަނަށްވުރެ މަތީގައިކަން މިރިޕޯޓްގައި ފާހަގަކޮށްފައިވެއެވެ.
img:http://s3.psmnews.mv/images/660x400/6022.jpg|ފެލިވަރު މަސް ފެކްޓަރީ / ފައިލް ފޮޓޯ: ޕީ.އެސް.އެމް
މި ރިޕޯޓްގައިވާގޮތުން މިއަހަރުގެ ފުރަތަމަ ކުއާޓަރގައި ރާއްޖެއިން މަސް އެކްސްޕޯޓްކުރި ޢަދަދުވެސް ވަނީ މިދިޔަ އަހަރުގެ މި މުއްދަތާ އަޅާބަލާއިރު، ފަންސާސް އެކެއް އިންސައްތަ އިތުރުވެފައެވެ. މީގެ މައިގަނޑު ސަބަބަކީ ގަނޑުކުރި ކަޅުބިލަމަހާއި ކަންނެލި އެކްސްޕޯޓްކުރި ޢަދަދު އިތުރުވުމެވެ.
މިއަހަރުގެ ފުރަތަމަ ކުއާޓަރުގައި މަސްވެރިކަމުގެ ދާއިރާއަށް ބޮޑު ކުރިއެރުމެއް ލިބިފައިވައިރު، މިއަހަރުގެ އޭޕްރީލްމަހު ރާއްޖޭގެ ދެކުނަށް އާދަޔާ ޚިލާފަށް މަސްވެރިކަން ރަނގަޅުވެ، މަސްގަންނަ ކުންފުނިތަކުންވަނީ ރިކޯޑް އަދަދަކަށް މަސްގަނެފައެވެ. އެމްއެމްއޭއިން އާންމުކޮށްފައިވާ ތަފާސްހިސާބުތަކުން ދައްކާގޮތުން އޭޕްރީލްމަހު މަސްގަންނަ ކުންފުނިތަކުން ދެހާސް ނުވަސަތޭކަ އެކާވީސް ޕޮއިންޓް ހައެއް މެޓްރިކް ޓަނުގެ މަސްގަނެފައިވެއެވެ. img:http://s4.psmnews.mv/images/660x400/7734.jpg|މަސްވެރިންތަކެއް މަސް ބޭނުމުގައި - ފައިލް ފޮޓޯ: ޕީއެސްއެމް
ގިނައިން މަސްބާނާ ދުވަސްވަރު، އެއްވެސް ކޮންޓްރޯލެއްނެތި މަސް ގަތުމަށް ފިޝަރީޒް މިނިސްޓްރީން ގެންދަނީ، މަސްގަންނަ ކުންފުނިތަކާއެކު މަޝްވަރާކުރަމުންނެވެ. މިގޮތުން މިފަދަ ދުވަސްވަރަކާ ދިމާކޮށް ރާއްޖެއިން ބޭރަށް މަސްގެންދިއުމަށް ބޭނުންވާ ބޯޓުފަހަރުގެ ޢަދަދު އިތުރުކޮށް، ކުންފުނިތަކަށް މަސްގަނެ ރައްކާކުރެވޭނެ މިންވަރު އިތުރުކުރުމަށްވެސް ދަނީ މަސައްކަތްކުރަމުންނެވެ. ރާއްޖޭގައި އެންމެ ފުޅާކޮށް މަސްގަނެ، މަސް ބޭރުކުރާ ރަށްރަށުގެ ތެރޭގައި ހިމެނެނީ، މިފްކޯގެ ދަށުން ހިނގަމުން އަންނަ ގއ. ކޫއްޑޫއާއި، ޅ.ފެލިވަރާއި ހޮރައިޒަން ފިޝަރީޒްގެ ލ.މާންދޫގައެވެ.
މީގެއިތުރުން ތ. އަތޮޅު ފުނައްޑޫގައިވެސް މަސްގަނެ، މަސް ބޭރުކުރަން މިހާރު ވަނީ ފަށާފައެވެ.