ދިރާގަށް މޯބައިލް ޕޭމަންޓްގެ ޚިދުމަތް ދިނުމަށް ބޭނުންވާ މޯބައިލް ޕޭމަންޓް ސަރވިސް ލައިސަންސް އެމްއެމްއޭއިން ދީފިއެވެ.
ދިރާގަށް މޯބައިލް ޕޭމަންޓްގެ ޚިދުމަތް ދިނުމަށް ބޭނުންވާ ލައިސަންސް ރަސްމީކޮށް ހަވާލުކޮށްދެއްވީ، ދަރުބާރުގޭގައި މިހާރު ކުރިއަށްދާ މޯލްޑިވްސް ފައިނޭންޝަލް އެކްސްޕޯގައި ގަވަރުނަރު ޑރ.އަޒީމާ އާދަމްއެވެ. ދިރާގުގެ ފަރާތުން ލައިސަންސާ ހަވާލުވެވަޑައިގެންނެވީ، އެކުންފުނީގެ ސީއީއޯ އިސްމާއީލް ރަޝީދުއެވެ.
މޯބައިލް ޕޭމަންޓްގެ ޚިދުމަތް ދިނުމަށް ލައިސަންސް ދޫކުރުމާއި ބެހޭގޮތުން އެމްއެމްއޭއިން ބުނީ، ދިވެހިރާއްޖޭގެ ޤައުމީ ޕޭމަންޓް ސިސްޓަމް ހަރުދަނާ ގޮތެއްގައި ތަރައްޤީ ކުރައްވާ، ބޭންކިން ޚިދުމަތް ފަސޭހައިން ލިބެން ނެތް ފަރާތްތަކަށް ވެސް ރައްކާތެރި އަދި ހަލުވި ނިޒާމެއްގެ ދަށުން ފައިސާގެ މުޢާމަލާތްތައް ހިންގޭނެ ގޮތްތަކެއް ހަމަޖެއްސެވުމަކީ އެ އޮތޯރިޓީން އިސްކަންދޭ ކަމެއް ކަމަށެވެ.
އެގޮތުން ރާއްޖެއަކީ މޯބައިލް ފޯނު ނެޓްވޯކް ފުޅާވެފައިވާ ޤައުމަކަށްވާތީ، މޮބައިލް ފޯނު މެދުވެރިކޮށް ފައިސާ ދެއްކުމާއި ފޮނުވުމުގެ ޚިދުމަތް ދޭން ފެށުމަކީ ޢާއްމުންނަށް ފަސޭހަތަކެއް ވެގެންދާނެ ކަމެއް ކަމަށް އެ އޮތޯރިޓީން ފާހަގަކުރެއެވެ.
މީގެ އިތުރުން އެފަދަ ޕޭމަންޓް ޚިދުމަތްދޭ ފަރާތްތަކުގެ މެދުގައި އިތުރަށް ވާދަވެރިކަން އުފެދިގެންދާނެ ކަމެއްކަމަށް ޤަބޫލުކުރާ ކަމަށްވެސް އެއޮތޯރިޓީން ބުނެއެވެ. އެމްއެމްއޭއިން ވަނީ މީގެކުރިން އުރީދޫ މޯލްޑިވްސްއަށްވެސް މޮބައިލް ޕޭމަންޓް ސަރވިސް ލައިސަންސް ދީފައެވެ.