ޓޫރިޒަމް ސިނާއަތަށް ކުރިމަތިވާ ގޮންޖެހުންތަކާއި ދެކޮޅަށް އެންމެން ގުޅިގެން މަސައްކަތްކުރުމަށް ޓޫރިޒަމް މިނިސްޓަރު މޫސާ ޒަމީރު ގޮވާލައިފިއެވެ.
މިނިސްޓަރު މޫސާ ޒަމީރު މިގޮތަށް ގޮވާލެއްވީ ދަރުބާރުގޭގައި މިއަދު ފެށި ޓްރެވަލް ޓްރޭޑް މޯލްޑިވްސް (ޓީޓީއެމް) ފެއާ ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
ދިވެހިރާއްޖޭގައި ފުރަތަމަ ފަހަރަށް ބާއްވާ ޓްރެވަލް ފެއާ ކަމަށްވާ، ޓްރެވަލް ޓްރޭޑް މޯލްޑިވްސް (ޓީޓީއެމް) ފެއާ ފައްޓަވައިދެއްވުމުގެ ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓަރު މޫސާ ޒަމީރު ވިދާޅުވީ، ރާއްޖޭގެ ޓޫރިޒަމް ސިނާއަތަށް ގެއްލުންދިނުމަށް އަމާޒްކޮށް ބައެއް ފަރާތްތަކުން އެކިއެކި ކެމްޕެއިންތައް ކުރަމުންދާކަމަށެވެ. މިފަދަ ކެމްޕެއިންތަކާދެކޮޅަށް މުޅި ޓޫރިޒަމް ސިނާއަތް ގުޅިގެން މަސައްކަތްކުރަންޖެހޭކަން ފާހަގަކުރައްވަމުން، ޓޫރިޒަމް މިނިސްޓަރު ވަނީ، ޓޫރިޒަމް ސިނާއަތަށް ކުރިމަތިވާ ގޮންޖެހުންތަކާއި ދެކޮޅަށް އެންމެން ގުޅިގެން މަސައްކަތް ކުރުމަށް ހުރިހާ ފަރާތްތަކަކަށް ގޮވާލައްވާފައެވެ.
ޓޫރިޒަމް ސިނާއަތް ތަރައްޤީކުރެއްވުމަށް ސަރުކާރުން ގިނަ މަސައްކަތްތަކެއް ދަނީ ކުރައްވަމުންނެވެ. މިގޮތުން ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމަށް ސަރުކާރުން ފަށްޓަވާފައިވާ ބިޔަ މަޝްރޫއުގެ މަސައްކަތް ނިމުނުން ރާއްޖެ އަންނަ ފަތުރުވެރިންގެ ޢަދަދު ވަރަށްބޮޑަށް އިތުރުވެގެންދާނޭކަމަށް މިނިސްޓަރު ޒަމީރު ވިދާޅުވިއެވެ. މިމޭރުމުން ވާހަކަފުޅު ދައްކަވަމުން މިނިސްޓަރު ޒަމީރު ވަނީ ރާއްޖޭގެ ޓޫރިޒަމް ކުރިއެރުވުމަށް އަމިއްލަ ފަރާތްތަކުން ކުރާމަސައްކަތްތައް ފާހަގަކުރައްވައި، ޓީޓީއެމް ފަދަ ފެއާތައް ބޭއްވުން މުހިއްމުކަން ފާހަގަކުރައްވާފައެވެ.
ޓީޓީއެމް ފެއާއާ ބެހޭގޮތުން ވާހަކަދައްކަމުން މި ފެއާ އިންތިޒާމްކުރާ މޯލްޑިވްސް ގެޓަވޭސްގެ ޑިރެކްޓަރ އޮފް ބިޒްނަސް ޑިވެލޮޕްމަންޓް ޑރ. ހުސައިން ސަނީ އުމަރު ވިދާޅުވީ، ޓީޓީއެމް ފެއާ ބޭއްވުމުގެ މައިގަނޑު މަޤްސަދަކީ ރާއްޖެ އަންނަ ފަތުރުވެރިންގެ ޢަދަދު އިތުރުކުރުންކަމަށެވެ. މިގޮތުން އަމާޒަކީ ކުރިއަށްއޮތް ހަތަރު އަހަރުދުވަހުގެ ތެރޭގައި ޓޫރިޒަމް ސިނާޢަތުގެ ޢާމްދަނީ ތިނެއް ޕޮއިންޓް ފަހެއް ބިލިއަން ރުފިޔާއަށް އިތުރުކުރުންކަމަށެވެ.
ދެދުވަހުގެ މުއްދަތަކަށް ކުރިއަށްދާ ޓީޓީއެމް ފެއާގައި ރާއްޖޭގެ ޓޫރިޒަމް ސިނާއަތުގައި ހަރަކާތްތެރިވާ ކުންފުނިތަކާއި، އެސިނާއަތާ ގުޅުންހުރި ކުންފުނިތަކުގެ އިތުރުން ރާއްޖެއިން ބޭރުގެ ޓްރެވަލް އިންޑަރސްޓްރީގައި ހަރަކާތްތެރިވާ ކުންފުނިތަކާއި، ބޭރުގެ ނޫސްވެރިން ބައިވެރިވާކަން ފާހަގަކޮށްލެވެއެވެ. ޓީޓީއެމް ފެއާގެ ތެރޭގައި ހިމެނިގެން ޓޫރިޒަމާއި ގުޅުންހުރި ގިނަ އިވެންޓްތަކެއް ކުރިއަށްގެންދިއުމަށް ހަމަޖެހިފައިވާކަމަށް މޯލްޑިވްސް ގެޓަވޭސްއިން ބުނެއެވެ.