މިއަހަރު ޙައްޖު ކޯޕަރޭޝަންގެ ޙަވާލުގައި ޙައްޖަށްދާ މީހުންގެ ތެރެއިން 214 މީހަކު މިއަދު ފުރައިފިއެވެ.
މިއަދު ޙައްޖަށް ފުރި މީހުންނާ އިސްލާމިކް މިނިސްޓަރ ވަނީ ބައްދަލުކުރައްވާފައެވެ. ޕީއެސްއެމް ނިއުސްއާއި ވާހަކަ ދައްކަވަމުން މިނިސްޓަރ ޑރ އަހްމަދު ޒިޔާދު ވިދާޅުވީ ދިވެހިންނަށް ޚާއްސަކޮށްގެން ޖިއްދާ އެއަރޕޯޓްގައި އިމިގްރޭޝަން ކައުންޓަރެއް ބަހައްޓާފައިވާކަމަށެވެ. މީގެއިތުރުން މައްކާ އަދި މަދީނާގައި ދަތުރުފަތުރުކުރުމަށް ލުއިފަސޭހަ ވާނެކަން މިނިސްޓަރ ފާހަގަކުރެއްވިއެވެ.
ޙައްޖު ކޯޕަރޭޝަނުން ބުނީ މައްކާ އަދި މަދީނާގައި ހައްޖުވެރިން ތިބުމަށް ހަމަޖެހިފައިވަނީ ހަރަމް ފުޅާ ކައިރި ސަރަޙައްދެއްގައިކަމަށެވެ. ހައްޖު ކޯޕަރޭޝަންގެ އެންމެ ފަހު ފްލައިޓް ފުރަން ހަމަޖެހިފައިވަނީ އެގާރަވަނަ ދުވަހުއެވެ.
މިފަހަރު ސަޢުދީ އަރަބިއްޔާއިން ވަނީ 1000 ހައްޖު ކޯޓާ ރާއްޖެއަށް ދީފައެވެ. މީގެ ތެރެއިން ފުރަތަމަ ގްރޫޕް މިމަހުގެ ހަތްވަނަ ދުވަހު ފުރާފައިވާއިރު އެންމެ ފަހު ގުރޫޕް ފުރުމަށް ހަމަޖެހިފައިވަނީ މިމަހުގެ 23 ވަނަ ދުވަހުއެވެ.
ޙައްޖު ކޯޕަރޭޝަންގެ ޙަވާލުގައި މިއަހަރު ޙައްޖަށްދާން ހަމަޖެހިފައިވަނީ، 693 މީހުންނެވެ. ޙައްޖު ކޯޕަރޭޝަންގެ ޙަވާލުގައި ޙައްޖަށްދާ މީހުން ދެން ފުރަން ހަމަޖެހިފައިވަނީ މިމަހުގެ 10 ވަނަ ދުވަހާއި 11 ވަނަ ދުވަހުއެވެ.