ފުޅީގައި ބަންދުކުރި ފެނަކީ އެއަށް ބޮޑު ޑިމާންޑެއް އޮންނަ އެއްޗެކެވެ. ކޮންމެ ދުވަހަކު އެތައް ފުޅިއެއް ކުނީގެ ގޮތުގައި އުކާލުމަށް ގެއިން ބޭރުކުރާއިރު، ޕްލާސްޓިކަކީ ތިމާވެއްޓަށް އޭގެ ގެއްލުން ބޮޑު އެއްޗެކެވެ. އަދި ރާއްޖެއަކީ ކަނޑުގެ ސަރަހައްދު ބޮޑު ޤައުމަކަށްވާއިރު، ކަނޑަށް އުކާލެވޭ ޕްލާސްޓިކް ފުޅިތަކުގެ ސަބަބުން ކަނޑުގެ ދިރުމަށް އޭގެ ނޭދެވޭ އަސަރުކުރެއެވެ.
މިފަދަ ގެއްލުންތައް ކުޑަކުރުމަށް މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޑެޓް، އެމްޑަބްލިއުއެސްސީގެ ދަށުން ހިންގާ އައިލެންޑް ބެވެރެޖަސް މޯލްޑިވްސްއިން ވަނީ ހުސްފުޅި އެއްކުރުމަށް ޚާއްސަ ކަލެކްޝަން ޕޮއިންޓެއް ޤާއިމްކުރުމަށް ނިންމާފައެވެ.
ޕީއެސްއެމް ނިއުސްއާ ވާހަކަދައްކަވަމުން އެމްޑަބްލިއުއެސްސީގެ މެނޭޖިންގ ޑިރެކްޓަރ އިބްރާހީމް ފަޒުލް ވިދާޅުވީ މި ކަލެކްޝަން ޕޮއިންޓް ޤާއިމްކުރުމަށް ނިންމާފައިވަނީ އައިޖީއެމްއެޗް ގޯތިތެރޭގައި ކަމަށެވެ. އަދި ކަލެކްޝަން ޕޮއިންޓާއި ފުޅި ހަވާލުކުރާ ފަރާތްތަކަށް ކޮންމެ ފުޅިއަކަށް އަގެއް ދިނުމަށް ނިންމާފައިވާކަމަށް ފަޒުލް ވިދާޅުވިއެވެ.
ފަޒުލް ވިދާޅުވީ ރާއްޖޭގައި ފުޅި ރިސައިކްލިން ކުރާ ފެސިލިޓީއެއް ޤައިމްކުރުމަށް ރާވާފައިވާ ކަމަށެވެ. އެގޮތުން އެއާ ގުޅޭ މަޝްވަރާތައް ވޭސްޓް މެނޭޖްމަންޓް ކޯރޕަރޭޝަނާއެކު ކުރިއަށްދާކަމަށް ވިދާޅުވިއެވެ.
ޕްލާސްޓިކް ފުޅިތައް ތައްޔާރުކުރުމުގައި ބޭނުންކުރާ ޕްލާސްޓިކްގެ މިންވަރު މަދުކޮށްގެން ޕްލާސްޓިކްގެ ސަބަބުން ތިމާވެއްޓަށް ލިބޭ ގެއްލުންތައް ކުޑަކުރުމަށްވެސް އެމްޑަބްލިއުއެސްސީއިން ދަނީ މަސައްކަތްކުރަމުންނެވެ. ފަޒުލް ވިދާޅުވީ ފުޅި ލުއިކުރުމާއި ގުޅޭގޮތުން ބޭރުގެ ކަމާއި ގުޅުން ހުރި ކުންފުނިތަކާއެކު މަސައްކަތްތައް ކުރިއަށްދާ ކަމަށެވެ.
ކުނީގެ ގޮތުގައި އުފެދޭ ޕްލާސްޓިކް ކޮތަޅާއި ފުޅި ފަދަ ތަކެތީގެ ސަބަބުން ރާއްޖޭގެ ނާޒުކު ތިމާވެއްޓަށް ބޮޑެތި ގެއްލުންތައް ލިބެމުންދެއެވެ. ކުނީގެ ގޮތުގައި އުފެދޭ ޕްލާސްޓިކް ފާނާވުމަށް 100 އަށްވުރެ ގިނަ އަހަރުހޭދަވާ ކަމަށް ތަޖުރިބާކާރުން ބުނެއެވެ.