ރާއްޖެއާއި ޖަޕާނާ ދެޤައުމުގެ ދެމެދު ސިޔާސީ ގުޅުން ޤާއިމުކުރިތާ 50 އަހަރު ފުރުން ފާހަގަކުރުމަށްޓަކައި ޖަޕާނުގެ ސަޤާފީ ބެރު ޖެހުމުގެ ހަރަކާތާއެކު ޚާއްސަ ޝޯއެއް ބޭއްވުމަށް ނިންމައިފިއެވެ.
ރާއްޖޭގައިހުންނަ ޖަޕާން އެމްބަސީއާއި ޕަބްލިކް ސަރވިސް މީޑިއާ ގުޅިގެން ބާއްވާ މި ޝޯވް ބޭއްވުމަށް ހަމަޖެހިފައިވަނީ މިއަދު ހަވީރު ޖުމުހޫރީ މައިދާނުގައެވެ. އަދި މާދަމާ މި ޝޯވް ޓީވީއެމް ސްޓޫޑިއޯގައިވެސް ބޭއްވުމަށް ވަނީ ހަމަޖެހިފައެވެ. މި ޝޯވްގައި ޖަޕާންގެ ސަގާފީ ބެރު ހުށަހަޅައިދޭނީ އެޤައުމުގެ މަޝްހޫރު ބެރު ގުރޫޕެއް ކަމަށް ސައި ގުރޫޕުންނެވެ. ރާއްޖޭގެ ފަރާތުން މި ޝޯވްގައި ބެރު ޖަހާނީ ރާއްޖޭގެ މަޝްހޫރު ބޮޑު ބެރު ގުރޫޕެއް ކަމަށްވާ ހަބޭސް ބޮޑު ބެރުގުރޫޕުންނެވެ.
ޖަޕާނުގެ ސަގާފީ ބެރު ޖަހާ ގުރޫޕްތަކުގެ ތެރޭގައި ފާހަގަކޮށްލެވޭ ޤުރޫޕެއް ކަމަށްވާ "ސައި" ގެ ފަސް މެމްބަރުން ވަނީ ޝޯ ދިނުމަށް ރާއްޖެ އައިސްފައެވެ. ޖަޕާން އެމްބަސީއާއި ގުޅިގެން ޕަބްލިކް ސަރވިސް މީޑިއާ، ޕީއެސްއެމުން ބާއްވާ މި ޝޯވްގައި ބައިވެރިވުމަށް ރާއްޖެ އައިސްފައިވާ "ސައި" ގްރޫޕުގެ މެމްބަރުންނާއި ޕީއެސްއެމްގެ އިސްވެރިންވަނީ ބައްދަލުކޮށްފައެވެ.
img:http://s2.psmnews.mv/images/660x400/15081422046772.jpg|ޖަޕާނުގެ ސަގާފީ ބެރުޖަހާ ގްރޫޕްގެ މެމްބަރުން ޕީއެސްއެމްގެ އިސްވެރިންނާއެކު / ފޮޓޯ: ޕީއެސްއެމް
މި ބައްދަލުކުރެއްވުމުގައި ޕީއެސްއެމްގެ މެނޭޖިންގ ޑިރެކްޓަރ އިބްރާހީމް ޚަލީލް ވަނީ "ސައި"ގްރޫޕުގެ މެމްބަރުންނަށް މަރުޙަބާ ވިދާޅުވެފައެވެ. އަދި މި ޝޯވް މެދުވެރިކޮށް ދިވެހިންނަށް ޖަޕާނުގެ ސަގާފަތުގެ ކޮންމެވެސް މިންވަރެއް ފެނިގެންދާނެކަމަށް އުއްމީދުކުރައްވާ ކަމަށް އޭނާވިދާޅުވިއެވެ.
މި ޝޯވްއާ ގުޅޭގޮތުން މަޢުލޫމާތުދެއްވަމުން ޕީއެސްއެމްގެ ޑިރެކްޓަރ އީ ކޮމާރސް އެންޑް މަރކެޓިންގް، އިބްރާހީމް ނަޞްރީން ވިދާޅުވީ ރާއްޖޭގައި ޖަހާ ބޮޑު ބެރާ ޖަޕާންގައި ޖަހާ ބެރުގައި ބޮޑު ތަފާތެއް ހުރި ކަމަށެވެ. އަދި މި ޝޯވް ބަލާލަން ވީހާވެސް ގިނަ ބަޔަކު ދާނެކަމަށް އުއްމީދު ކުރައްވާކަމަށްވެސް ނަޞްރީން ވިދާޅުވިއެވެ.
img:http://s2.psmnews.mv/images/660x400/15081419460709.jpg|ޕީއެސްއެމްގެ ޑިރެކްޓަރ އީ ކޮމާރސް އެންޑް މަރކެޓިންގް، އިބްރާހީމް ނަޞްރީން -
ޖުމްލަ ނަވާރަ މެމްބަރުން "ސައި" ގުރޫޕުގައި ހިމެނޭއިރު، އޭގެ ތެރެއިން ފަސް މެމްބަރުން ރާއްޖޭގައި ބާއްވާ ޝޯގައި ބައިވެރިވާނެއެވެ. ބެރު ޖެހުމުގެ ވަރަށް ތަފާތު ހަރަކާތެއް ފެނިގެންދާނެ ކަމަށް ސައި ގުރޫޕުން ބުނެއެވެ.
ޖަޕާނުގެ ސަގާފީ ބެރު ނުވަތަ އެޤައުމުގައި ކިޔާގޮތުން ނަމަ، " ވަޑައިކޯ" އަކީ މިއުޒިކް ކުޅުމަށް ޖަޕާނުގައި ބޭނުންކުރާ އެންމެ ދުވަސްވީ އިންސްޓްރުމަންޓެވެ. އެގޮތުން ވަޑައިކޯ ބޭނުން ކޮށްގެން މިއުޒިކް ކުޅޭތާ މިހާރު ދެހާހަށް ވުރެ ގިނަ އަހަރު ވަނީ ވެފައެވެ.
ޖަޕާނުގައި ވަޑައިކޯއަށް އޮންނަ މަޤްބޫލް ކަމާއި އެކު ވަޑައިކޯ ގުރޫޕުތަކުގެ ޢަދަދުވެސް އެތަށް ގުނައަކަށް ވަނީ އިތުރުވެފައެވެ. އެގޮތުން އެޤައުމުގައި ހަރަކާތްތެރިވާ ވަޑައިކޯ ގުރޫޕުތަކުގެ ޢަދަދު އެއްހާހަށް އަރައެވެ.