ޑައިވް މެގަޒިން އިން ހޮވާ ދުނިޔޭގެ އެންމެ ރަނގަޅު ފީނުމުގެ މަންޒިލްތަކުގެ ތެރޭގައި ރާއްޖެ ހިމެނިއްޖެއެވެ.
ޑައިވް މެގަޒިންގެ ޓްރެވެލް އެވޯޑްސް 2017 ގެ ތެރެއިން ހޮވާ ދުނިޔޭގެ އެންމެ ރަނގަޅު ފީނުމުގެ މަންޒިލްތަކުގެ ތެރޭގައި ރާއްޖެ ހިމެނުނީ ލިސްޓުގެ ފަސް ވަނައިގައެވެ.
މި ލިސްޓުގައި 500އަށްވުރެ ގިނަ މަންޒިލް ހިމެނޭއިރު ރާއްޖެއަށް ލިބިފައިވަނީ 9،399 ވޯޓެވެ. ބާވީސް ހާހަށްވުރެ ގިނަ ވޯޓާއެކު މި ލިސްޓުގެ 1 ވަނައަށް ހޮވިފައިވަނީ އިންޑޮނޭޝިޔާއެވެ.
ޑައިވް މެގަޒިންގެ ޓްރެވެލް އެވޯޑްސް 2017 ގެ ގިނަ އެވޯޑްތަކެއް ރާއްޖޭގެ ރިސޯޓުތަކަށާއި ލިވަބޯޑްތަކަށް ލިބިފައިވެއެވެ. އެގޮތުން ދުނިޔޭގެ އެންމެ ރަނގަޅު ޑައިވް ރިސޯޓްގެ މަޤާމު ރާއްޖޭގެ ރިސޯޓަކަށް ލިބުނުއިރު، ރާއްޖޭގެ ބައެއް ލިވަބޯޑްތައްވަނީ ދުނިޔޭގެ އެންމެ ރަނގަޅު 10 ލިބަވޯޑްގެ ލިސްޓުގައި ހިމެނިފައެވެ.
ޑައިވް މެގަޒިންއަކީ ދުނިޔޭގެ ފެންވަރުގައި ފާހަގަކޮށްލެވޭ މެގަޒިންއެކެވެ. ޑައިވް މެގަޒިންގެ ޓްރެވެލް އެވޯޑްސް 2017 ގެ ވަނަ ތަކަށް ހޮވުނު ފަރާތްތައް އިޢުލާންކޮށްފައިވަނީ މިމަހުގެ ތެރޭގައި ލަންޑަންގައި ބޭއްވި ޑަބްލިއުޓީއެމް ފެއަރގައެވެ.