ފެނަކަ ކޯޕަރޭޝަންގެ ސްޓޭޝަން މެނޭޖަރުންނަށް ޚާއްސަކޮށްގެން އިންޖީނިއަރިންގ މެނޭޖްމަންޓްގެ ތަމްރީން ޕްރޮގްރާމެއް މިމަހު ފަހުކޮޅު ބާއްވާނެކަމަށް ފެނަކަ ކޯޕަރޭޝަނުން ބުނެފިއެވެ. މިކަން ޢިއުލާން ކުރީ މިއަދު ދިވެހިރާއްޖޭގެ އަޑުގެ ސެނަކޯ މާލަމްގައި އޮތް "އިވެންޓް މެނޭޖްމަންޓް" ތަމްރީން ޕްރޮގްރާމް ނިންމުމަށް ބޭއްވި ރަސްމިއްޔާތުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރ އަޙްމަދު ޝަރީފްއެވެ.
ތިންދުވަހުގެ މުއްދަތަށް ކުރިއަށްގެންދިޔަ "އިވެންޓް މެނޭޖްމަންޓް" ތަމްރީން ޕްރޮގްރާމަކީ ފެނަކަ ކޯޕަރޭޝަންގެ މުވައްޒަފުންނަށް އެންމެ ފަހުގެ ޒަމާނީ ވަސީލަތްތައް ބޭނުންކޮށްގެން އިވެންޓްތައް މެނޭޖް ކުރާނެ ގޮތްތައް ދަސްކޮށްދިނުމަށް ބޭއްވި ޕްރޮގްރާމެކެވެ.
"އިވެންޓް މެނޭޖްމަންޓް" ތަމްރީން ޕްރޮގްރާމް ނިންމުމަށް ބޭއްވި ރަސްމިއްޔާތުގައި އެ ކޯޕަރޭޝަންގެ މެނޭޖިން ޑިރެކްޓަރ އަޙްމަދު ޝަރީފް ވިދާޅުވީ މިފަދަ ޕްރޮގްރާމްތަކަކީ ފެނަކަފަދަ ބޮޑެތި ކުންފުނި ތަކަށް ޙާއްސަ ޕްރޮގްރާމެއްކަމަށެވެ. އަދި ކުންފުންޏަށް ދިމާވެފައިވާ އެންމެބޮޑު ގޮންޖެހުމަކީ ސްކިލްޑް ފުލް ލެބަރ ފޯރސްއެއް ނެތުންކަމަށް އޭނާ ވިދާޅުވިއެވެ.
"ސްޓާފުންގެ މެދުގައި ހިންގާ ހަރަކާތެއް ކަމުގައިވިޔަސް އަދި ސްޓާފުން ފެނަކަ ބްރާންޗެއްގައި ހިންގާ ހަރަކާތެއް ވިޔަސް، އަދި އެހެން ފަރާތުން ކުންފުނީގެ މުވައްޒަފުންނަށް ހިންގާ ހަރަކާތްތަކުގައި ބައިވެރިވާންޖެހޭނެ. މިފަދަ ޕްރޮގްރާމްތަކުންދޭ މަޢުލޫމާތަކީ ކުންފުނީގެ ތަރައްޤީއަށް ވަރަށް މުހިއްމު ދައުރެއް އަދާކުރާނެ މައުލޫމާތުތަކެއްކަމަށް ޤަބޫލްކުރަން" ޝަރީފް ވިދާޅުވިއެވެ.
މިރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން ފިނޭންސް މިނިސްޓްރީގެ ޑެޕިއުޓީ މިނިސްޓަރ ހުސެއިން ޝާމް އާދަމް ވިދާޅުވީ ފެނަކަ ކޯޕަރޭޝަންގެ މުވައްޒަފުނަށް ބޭނުންވާ ތަމްރީންތަކާއި މައުލޫމާތު އިތުރަށް ހަރުދަނާ ކުރުމަށް ކުރާ މަސައްކަތްތަކީ ޤައުމީ މަސެއްކަތެއްކަމަށެވެ. މި މަސައްކަތް ކާމިޔާބުކަމާއިއެކު ކުރިއަށްގެންދެވޭނީ މިފަދަ ތަމްރީން ޕްރޮގްރާމްތައް ކުރިއަށް ގެންގޮސްގެންކަން އޭނާ ފަހަގަކުރެއްވިއެވެ.
"ފެނަކާގެ މުވައްޒަފުން ވިސްނަންޖެހޭ އެ ކުންފުންޏަކީ ރާއްޖެގައި ޔުޓިލިޓީ ސަރވިސް ފޯރުކޯށްދޭ ކުންފުނިކަމަށް. ޤައުމުގެ 152 ރަށަށް މި ޚިދުމަތް ފޯރުކޮށްދޭ ކުންފުންޏެއް. އެހެންކަމުން މިފަދަ ތަމްރިން ޕްރޮގްރާމްތަކުން ލިބޭ ހުނަރު ބޭނުންކޮށްގެން އެންމެ ރަނގަޅު ޚިދުމަތެއް ދޭ ބަޔަކީ ފެންކަ ކޯޕަރޭޝަން ކަމަށް" ޝާމް ވިދާޅުވިއެވެ.
ބެންކޮކް ސްކޫލް އޮފް މެނޭޖްމަންޓާއި ފެނަކަ ކޯޕަރޭޝަން ގުޅިގެން ކުރިއަށްގެންދިޔަ މި ޕްރޮގްރާމްގައި އެ ކުންފުނީގެ އެކި ޑިޕާޓްމަންޓްތަކުން 20 މުވައްޒަފުން ބައިވެރިވިއެވެ. ފެނަކަ ކޯޕަރޭޝަނުން ބުނީ މި ތަމްރީން ޕްރޮގްރާމްގައި އިވެއްޓެއް ބާއްވަން ހަމަޖައްސާ ހިސާބުން ފެށިގެން ނިމެންދެން ކުރަންޖެހޭ ކަންތައްތަކުގެ މަޢުލުމާތާއި ކުއްލިއަކަށް ދިމާވާ އިވެންޓްތަކުގައި މަސައްކަތް ކުރާނެ ގޮތް ކިޔާދީފައިވާކަމަށެވެ.