މިއަދު ދިވެހިރާއްޖެއަކީ އިޤްތިޞާދީގޮތުން ވަރުގަދަ ޤައުމެއްކަމަށާއި ބޭރުގެ ދަރަނި އަދާކުރުމުގެ ލަޔާގަތާއި ޤާބިލިއްޔަތުކަން ދިވެހި ޤައުމުގައި އެބަހުރިހަމަށް ރާއްޖޭގެ ކުރީގެ ރައީސުލްޖުމްހޫރިއްޔާ ޑރ.މުޙައްމަދު ވަޙީދު ޙަސަން ވިދާޅުވެއްޖެއެވެ.
ރަޝިއާގެ މަޝްހޫރު ޓީވީޗެނަލް "ރަޝިޔާ ޓުޑޭ"ގެ އިނގިރޭސި ޗެނަލްގެ "ގޮއިން އަންޑަރ ގްރައުންޑް" ޕްރޮގްރާމުގައި ވާހަކަފުޅުދައްކަވަމުން ޑރ.ވަޙީދު ވަނީ އިޤްތިޞާދީގޮތުން ރާއްޖެއާ ގުޅުންބޮޑު ޤައުމުތަކާމެދު އިދިކޮޅު ފަރާތްތަކުން އުފައްދަމުންދާ ބައެއް ސުވާލުތަކަށް ޖަވާބުދެއްވާފައެވެ. އެގޮތުން ޗައިނާއިން ރާއްޖޭގެ ތަރައްޤީގެ މަޝްރޫޢުތަކަށް ނަގާފައިވާ ލޯނުތަކާބެހޭގޮތުން އުފައްދާ ސުވާލުތަކަށް ޖަވާބުދެއްވަމުން ޑރ.ވަޙީދު ވިދާޅުވީ ޗައިނާއިން ނަގާފައިވާ ލޯނުތައް ނުދެއްކިގެން ޗައިނާއިން ރާއްޖޭގެ މައްޗަށް ނުފޫޒުފޯރުވައި ރާއްޖެގެ އިސްތިޤުލާލަށް ގެއްލުންވާފަދަ ޙާލަތެއް މެދުވެރިވެދާނެކަމަށް ޤަބޫލުފުޅު ނުކުރައްވާކަމަށެވެ. އަދި އެފަދަ ޙާލަތެއް ނާނެންނާނެ ކަމަށާ، އެއަށްވުރެ ރާއްޖޭގެ އިޤްތިޞާދީ، ޚާރިޖީ ސިޔާސަތުތައް ވަރުގަދަކަމަށްވެސް ޑރ.ވަޙީދު ވިދާޅުވިއެވެ.
ރާއްޖޭގެ ތަރައްޤީގެ މަޝްރޫޢުތަކާއި ރައްޔިތުންގެ އަސާސީ ޚިދުމަތްތަކާ ގުޅުންހުރި މަޝްރޫޢުތައް ހިންގުމަށް ބޭރުން ލޯނު ނެގުމަކީ ރާއްޖެފަދަ ކުދި ޤައުމުތަކުން ކުރަންޖެހިފައިވާ ކަމެއްކަން ފާހަގަކުރައްވައި ޑރ.ވަޙީދު ވިދާޅުވީ މިފަދަ އެހީތެރިކަން ކުދިޤައުމުތަކަށް ފޯރުކޮށްދެނީ ޗައިނާފަދަ ޤައުމުތަކުންކަމަށާ، ޗައިނާއިން ލޯނުނަގަން ޖެހޭ ސަބަބަކީ މިއީކަމަށެވެ.
ދުނިޔޭގެ އިޤްތިޞާދީ ބޮޑު ބާރު ޗައިނާއާއި ރާއްޖޭގެ ގުޅުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ ވެރިކަމުގައި ވަރަށްބޮޑަށް ބަދަހިވެގެން ދިއުމާއެކު، ރާއްޖެއާ ޒަމާންވީ ގާތްގުޅުމެއް އޮންނަ އިންޑިއާ އާއި ރާއްޖޭގެ ގުޅުމަށް ހީނަރުކަން އައިސްފައިވާކަމަށް ދެކެވޭ ވަހަކަތަކާބެހޭގޮތުންވެސް ޑރ.ވަޙީދު ވަނީ ވާހަކަފުޅުދައްކަވާފައެވެ.
އެމަނިކުފާނު ވިދާޅުވީ ރާއްޖެ އޮތީ ދުނިޔޭގެ ބޮޑެތި ބައެއް ބާރުތަކުގެ މެދުގައިކަމަށާ، ދޭދޭ ބޮޑެތި ޤައުމުތަކުގެ މެދުގައި އުފެދިފައިވާ މައްސަލަތައް ޙައްލުކުރުމަށް އެންމެ މުހިންމީ މަޝްވަރާކުރުންކަމަށެވެ.
ރާއްޖޭގެ ތަރައްޤީގެ މަޝްރޫޢުތައް ހިންގުމަށް ރައީސް ޔާމީންގެ ވެރިކަމުގައި ޗައިނާއިން ނެގި ލޯނުތަކާ ބެހޭގޮތުން އިދިކޮޅު ފަރާތްތަކުން ކިޔަމުންދާ ފާޑުކިއުންތަކަށް އިޝާރާތްކުރައްވައި ޑރ.ވަޙީދު ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައިވެސް ޗައިނާއިން ލޯނުނަގާފައިވާކަން ފާހަގަކުރައްވާފައެވެ.