ސަރުކާރުގެ އިދާރާތަކާއި މުއައްސަސާތަކުގައި މަތީ ފެންވަރުގައި މަސައްކަތްކުރާ މުވައްޒަފުންނަށް ޚާއްސަކޮށްގެން ސިވިލް ސަރިވިސުން ޚާއްޞަ ތަމްރީނު ޕްރޮގުރާމެއް ފަށައިފިއެވެ. މިއީ ސިވިލް ސާރވިސްގެ މަސައްކަތްތައް ހަރުދަނާ ކުރުމުގެ ގޮތުން އެމުއައްސަސާއިން ކުރިއަށްގެންދާ އެގްޒެކެޓިވް ޓްރެއިނިންގެ 3 ވަނަ ޕްރޮގުރާމެވެ.
"އެގްޒެކެޓިވް ޓްރެއިނިންގ ޕްރޮގްރާމް ފޮރ މޯލްޑިވްސް ސިވިލް ސަރވިސް" ނަމުގައި ބާއްވަމުން އަންނަ މި ޕްރޮގްރާމަކީ ރާއްޖެއާއި ޗައިނާއާ ދެމެދު ވެފައިވާ އެއްބަސްވުމެއްގެ ދަށުން، އިންސާނީ ވަޞީލަތް ތަރައްޤީކުރުމަށް ހިންގާ ޕްރޮގްރާމެކެވެ. އަންނަ ބުރާސްފަތި ދުވަހުގެ ނިޔަލަށް ކުރިއަށް ގެންދާ މި ތަމުރީނު ޕްރޮގްރާމަކީ "ޗައިނީސް އެކަޑެމީ އޮފް ގަވަރނެންސް" އާއި "ސިވިލް ސަރވިސް ޓްރެއިނިންގ އިންސްޓިޓިއުޓް" ގުޅިގެން ކުރިޔަށްގެންދާ ތަމްރީނު ޕްރޮގުރާމެކެވެ.
ސިވިލް ސަރވިސް ޓްރެއިނިންގ އިންސްޓިޓިއުޓުން ބުނީ މިފަހަރުގެ ޕްރޮގްރާމުގައި އަލިއަޅުވާލާނީ ހިއުމަން ރިސޯސަސް މެނޭޖްމަންޓާއި، ޕަރފޯމަންސް މެނޭޖްމަންޓް ފަދަ ދާއިރާތަކަށްކަމަށެވެ.
މި ޕްރޮގްރާމް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ސިވިލް ސަރވިސް ކޮމިޝަންގެ ރައީސް ޑރ.ޢަލީ ޝަމީމް ވިދާޅުވީ، ޒަމާނުއްސުރެ ޗައިނާއާއި ރާއްޖެއާ ދެމެދު އޮތް ޒަމާންވީ ގުޅުން ބަދަހިވެ ހަރުދަނާވަމުން އަންނަކަމަށެވެ. ޗައިނާ ސަރުކާރުގެ އެހީތެރިކަމާއެކު ރާއްޖޭގައި ކުރިއަށްދާ ތަރައްޤީގެ ބޮޑެތި މަޝްރޫޢުތައް ދެޤައުމުގެ ދޭދޭ ބަދަހި ގުޅުމުގެ ހެއްކަކަށް ފުދޭކަމަށް ޑރ .ޝަމީމް ވިދާޅުވިއެވެ. ސިވިލް ސަރވިސްގެ އިންސާނީ ވަޞީލަތްތައް ތަރައްޤީ ކުރުމަށް ޗައިނާ ސަރުކާރުންދޭ ފުރުޞަތުތައް ފާހަގަކުރައްވާ ޑރ. ޝަމީމް ވިދާޅުވީ، ޗައިނާއިން ލިބޭ ތަމްރީން ޕްރޮގްރާމުތަކާއި ކިޔެވުމަށް ލިބޭ ފުރުޞަތުތަކުގެ އިތުރުން ރާއްޖޭގައި ހުންނަ ޗައިނާގެ އެމްބަސީންވެސް ސިވިލް ސާރވިސްއަށް އެކި ދާއިރާތަކުން އެހީތެރިވަމުން އަންނަ ކަމަށެވެ.
"އެގްޒެކެޓިވް ޓްރެއިނިންގ ޕްރޮގްރާމް ފޮރ މޯލްޑިވްސް ސިވިލް ސަރވިސް" ޕްރޮގުރާމު ފެށުމުގެ ރަސްމިއްޔާތުގައި ވާހަކަދައްކަވަމުން ރާއްޖޭގައި ހުންނަ ޗައިނާގެ އެމްބަސީގެ ޕޮލިޓިކަލް ކައުންސިލަރ ޔޭންގް ޔިން ވެސް ވަނީ ޗައިނާއިން ރާއްޖޭގައި ކުރިއަށްގެންދާ މަޝްރޫއުތަކަށް އަލިއަޅުވާލައްވާ ވާހަކަދައްކަވާފައެވެ.
އޭނާ ވިދާޅުވީ ޗައިނާ މޯލްޑިވްސް ފްރެންޑްޝިޕް ބްރިޖްގެ މަސައްކަތް ނިންމާ އޮގަސްޓްމަހުގެ ފަހުކޮޅު ރަސްމީކޮށް އާއްމުންނަށް ހުޅުވާލާނެކަމަށެވެ. މީގެ އިތުރުން ވޭލާނާ އިންޓަރނޭޝަނަލް އެއަރޕޯޓްގެ އައު ރަންވޭގައި ޝެޑިއުލް ޓެސްޓް ފްލައިޓް އަންނަ ސެޕްޓެމްބަރ މަހު ޖައްސާނެކަން ފާހަގަކުރެއްވިއެވެ. އަދި ހުޅުމާލެ ދެވަނަ ފޭސްގައި އަޅަމުންދާ 7000 ފްލެޓްގެ 16 އިމާރާތުގެ ތެރެއިން 8 އިމާރާތުގެ މަސައްކަތް މިއަހަރު ނިޔަލަށް ނިންމުމުގެ ޢަމާޒުގައި މަސައްކަތް ކުރަމުންދާކަމަށް ޔޭންގް ޔިން ވިދާޅުވިއެވެ.
މިފަހަރުގެ އެގްޒެކެޓިވް ޓްރެއިނިންގ ޕްރޮގުރާމް ކުރިއަށްގެންދިޔުމަށް ހަމަޖެހިފައިވަނީ ތިން ބަޔަކަށް ބަހާލައިގެންނެވެ. މިގޮތުން "ޓްރެއިނިން ޕްރޮގްރާމް އޮން އެކްސަލަރޭޓިން ޕާރފޯމަންސް މެނޭޖްމަންޓް ސިސްޓަމް އިން ސިވިލް ސަރވިސް"، "ވޯރކްޝްޕް އޮން އެންހޭންސިންގ ހިއުމަން ކެޕިޓަލް" އަދި "ލެކްޗަރ އޮން ސްޓްރެޓެޖިކް ލީޑަރޝިޕް ބިލްޓް އެންޑް ރޯޑް އިނީޝިއޭޓިވް" ހިމެނެއެވެ. މި ޕްރޮގްރާމްގައި 220 އަށްވުރެ ގިނަ މުވައްޒަފުން ބައިވެރިވެއެވެ.
ސިވިލް ސަރވިސް މުވައްޒަފުންގެ މަސައްކަތުގެ ފެންވަރު ރަނގަޅު ކުރުމަށް ސީ.އޭ.ޖީން ހިންގާ ޕްރޮގްރާމްތަކުގެ ތެރެއިން ވޭތުވެ ދިޔަ ދެ ޕްރޮގުރާމުގައި 200 އަށްވުރެ ގިނަ މުވައްޒަފުން ވަނީ ތަމްރީންކޮށްފައެވެ.