ރާއްޖޭގައި ތަރައްޤީގެ މަޝްރޫޢުތައް ހިންގުމަށް އޯފިޑް ފަންޑުން 40 މިލިއަން ޑޮލަރުގެ ލޯނުގެ އެހީއެއް

އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމެންޓުން ރާއްޖެއަށް ދިން 40 މިލިއަން އެމެރިކާ ޑޮލަރުގެ ލޯނު އެހީން ރާއްޖޭގެ އެކި ސަރަހައްދުތަކުގައި ތަރައްޤީގެ އެކި މަޝްރޫއުތައް ކުރިއަށްގެންދިޔުމަށް ހަމަޖައްސައިފިއެވެ. ހައުސިން މިނިސްޓަރ ޑރ. މުޙައްމަދު މުއިއްޒާއި އެންވަޔަރަންމަންޓް މިނިސްޓަރ ޠާރިޤް އިބްރާހިމް ބައިވެރިވެވަޑައިގެންނެވި ނިއުސް ކޮންފަރެންސްގައި ވަނީ ރާއްޖެއަށް ލިބުނު ލޯނުގެ އެހީ ޚަރަދުކުރަން ސަރުކާރުން ނިންމާފައިވާގޮތް މީޑިއާއާއި ޙިއްސާކުރައްވާފައެވެ.

އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމެންޓް (އޯފިޑް) އަކީ ޒަމާނުއްސުރެ ރާއްޖެއަށް އެހީވަމުން އަންނަ އޭޖެންސީއެކެވެ. މިފަހަރު ރާއްޖެއަށް ދިން 40 މިލިޔަން އެމެރިކާ ޑޮލަރުގެ ލޯނު އެހީގެ ދަށުން ރާއްޖޭގެ އެކި ޞަރަޙައްދުތަކުގައި ތަރައްޤީގެ އެކި މަޝްރޫއުތައް ހިންގުމަށްވަނީ ހަމަޖެހިފައެވެ. މިގޮތުން ރަށްރަށުގެ ނަރުދަމާ ނިޒާމު ޤާއިމުކުރުމަށާއި، ގޮނޑުދޮށް ޙިމާޔަތް ކުރުމަށާއި، ބަނދަރު ހެދުމުގެ އިތުރުން، އެއަރޕޯޓް ތަރައްޤީކުރުމަށް ޚަރަދުކުރުމަށް ހަމަޖެހިފައިވެއެވެ.

މިނިސްޓްރީ އޮފް އެންވަޔަރަންޓް އެންޑް އެނަރޖީގެ މެންޑޭޓްގެ ދަށުން 8 ރަށެއްގައި ނަރުދަމާ ނިޒާމު ޤާއިމު ކުރުމަށް ވަނީ ހަމަޖެހިފައެވެ. މިގޮތުން ހދ.ނެއްލައިދުއާއި ނޭކުރެންދުއާއި މަކުނުދޫގައި ނަރުދަމާގެ ނިޒާމު ޤާއިމް ކުރުމަށް ވަނީ ހަމަޖެހިފައެވެ. މީގެ އިތުރުން ށ.ފޭދޫއާއި .ގދ. ބ އަތޮޅުގެ ބައެއް ރަށްތަކުގައިވެސް ނަރުދަމާގެ މަޝްރޫއުތައް ކުރިއަށްގެންދިޔުމަށް ހަމަޖެހިފައިވެއެވެ. މީގެ ތެރޭގައި ގދ.ވާދޫ، ފިއޮރި، ބ އަތޮޅުގެ ދަރަވަންދުއާއި ކެންދޫގައި ނަރުދަމާގެ ނިޒާމް ޤައިމުކުރުމަށް ހަމަޖެހިފައިވެއެވެ. މީގެ އިތުރުން ށ. މަރޮށްޓާއި އައްޑޫ ސިޓީ މީދޫގައި ގޮނޑުދޮށް ޙިމާޔަތްކުރުމުގެ މަޝްރޫޢުތައް ކުރިއަށް ގެންދިޔުމަށް ހަމަޖެހިފައިވެއެވެ.
އަދި ސަރުކާރުން ފ.ނިލަންދޫގައި އަޅަން ނިންމާފައިވާ އެއަރޕޯޓެއް ތަރައްޤީކުރުމަށް ހަމަޖެހިފައިވަނީވެސް އޯފިޑް ލޯނުގެ އެހީތެރިކަމާއެކުގައެވެ.

އެންވަޔަރަމަންޓް މިނިސްޓަރ ޠާރިޤް އިބްރާހިމް ވިދާޅުވީ، ވޭތުވެދިޔަ ހަތަރުއަހަރާއި ބައިގައި އެންވަޔަރަންމަންޓް މިނިސްޓްރީގެ މެންޑޭޓްގައި ވާ ކަންތައްތަކަށް އޯފިޑް ފަންޑުން ޚަރަދުކޮށްފައިވާކަމަށެވެ. މިގޮތުން ފުރަތަމަ ފިޔަވަހީގައި 20 މިލިޔަން އެމެރިކާ ޑޮލަރު ފެނާ ނަރުދަމާއަށް ޚަރަދުކޮށްފައިވާއިރު، ދެވަނަ ފިޔަވަހީގައި 50 މިލިޔަން އެމެރިކާ ޑޮލަރު ޚަރަދު ކޮށްފައިވާކަމަށެވެ. މިނިސްޓަރ ވިދާޅުވީ، މިހާރުވެސް ބައެއްރަށްތަކުގެ މަސައްކަތްތައް ޑިޒައިންކޮށްފައިވާކަމަށާއި، މިއަހަރުތެރޭގައި މި މަޝްރޫޢުތަކުގެ ޢަމަލީ މަސައްކަތް ފެށުމަށް ހަމަޖެހިފައިވާކަމަށެވެ.

އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމެންޓުގެ ލޯނުއެހީގެ ދަށުން ހައުސިން މިނިސްޓްރީގެ މެންޑޭޓްގެ ތެރެއިން 6 ރަށެއްގެ ބަނދަރު ހެދުމަށް ވަނީ ނިންމާފައެވެ. މިގޮތުން ގއ.ކޮލަމާފުށި، ގދ.ހޯޑެއްދޫ، އައްޑޫ ސިޓީ މަރަދޫފެދޫ ބަނދަރުގެ އިތުރުން، ބ. އަތޮޅުގެ ކުޑަރިކިލު، ކިހާދޫގެ އިތުރުން ދޮންފަނު ގެ ބަނދަރު ހިމެނެއެވެ. ހައުސިން މިނިސްޓަރ ވިދާޅުވީ، މީގެތެރެއިން ބައެއް ރަށްތަކަކީ އާބާދީ ކުޑަ ރަށްތަކެއް ނަމަވެސް ބަނދަރެއް ބޭނުން ވަރަށް ބޮޑު ރަށްތަކެއްކަމަށެވެ. އަދި ވޭތުވެދިޔަ ސަރުކާރުތަކާ ޚިލާފަށް އާބާދީ ކުޑަ ރަށްތަކުގައިވެސް ތަރައްޤީގެ މަޝްރޫޢުތައް މިސަރުކާރުން ކުރިއަށްގެންދާނެކަމުގެ ޔަޤީންކަން މިނިސްޓަރ ދެއްވިއެވެ. މި ރަށްތަކުގެ ބަނދަރުގެ ޢަމަލީ މަސައްކަތް މިއަހަރުތެރޭ ފަށާނެކަމަށްވެސް ހައުސިން މިނިސްޓަރ ޑރ. މުޙައްމަދު މުއިއްޒު ވިދާޅުވިއެވެ.

އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމެންޓްގެ ފަރާތުން ރާއްޖެއަށް ދިން 40 މިލިއަން ޑޮލަރުގެ ލޯނުއެހީން ގާތްގަނޑަކަށް 20 މިލިއަން ޑޮލަރު، ރަށްރަރުގެ ނަރުދަމާ ޤާއިމުކުރުމަށާއި، ގޮނޑުދޮށް ހިމާޔަތް ކުރުމަށް ޚަރަދު ކުރުމަށް ސަރުކާރުން ވަނީ ނިންމާފައެވެ. އަދި 13.5 މިލިޔަން ޑޮލަރު ރަށްތަކުގެ ބަނދަރު ހެދުމަށް ޚަރަދުކުރުމަށް ހަމަޖެހިފައިވާއިރު، 6.5 މިލިޔަން ޑޮލަރު ޚަރަދުކުރުމަށް ހަމަޖެހިފައިވަނީ ފ.ނިލަންދޫ އެއަރޕޯޓް އެޅުމަށެވެ.