ޗައިނާއާ ރާއްޖޭގެ ގުޅުމަށް 45 އަހަރުން ފުރުން ފާހަގަކުރުމުގެ ގޮތުން ދެޤައުމުގެ ސަޤާފަތް ދައްކުވައިދޭ ޚާއްޞަ ޙަރަކާތެއް ޗައިނާގައި ބާއްވައިފިއެވެ.
ޗައިނާގެ ވެރިރަށް ބެއިޖިންގައި ބޭއްވި މި ހަރަކާތުގައި ދިވެހި ސަޤާފަތް ދައްކުވައިދިނުމަށްޓަކައި ދިވެހި ލަވަތައް ވަނީ ހުށަހަޅާދީފައެވެ. މި ޙަފްލާގައި ދިވެހި ލަވަތައް ހުށަހަޅާދީފައިވަނީ މޯލްޑިވިއަން އައިޑަލްގެ ސީޒަން ތިނެއްގެ 2 ވަނަ ހާސިލުކޮށްފައިވާ އައިމިނަތު ސައިނާ މުޙައްމަދު ރަޝީދެވެ. މި ޙަފްލާގައި ވަނީ ޗައިނާގެ މަޝްހޫރު ބައެއް ލަވަކިޔުންތެރިން އެޤައުމުގެ ލަވަތައްވެސް ހުށަހަޅާދީފައެވެ.
ޗައިނާގައި ހުންނަ ރާއްޖޭގެ އެމްބަސީގެ ފަރާތުން ބޭއްވި މިޙަރަކާތާ ގުޅޭގޮތުން ޕީއެސްއެމް ނިއުސްއާ ވާހަކަދައްކަމުން ޗައިނާގައި ހުންނަވާ ދިވެހި ސަފީރު ޑރ. މުޙައްްމަދު ފައިސަލް ވިދާޅުވީ، މި އިވެންޓުގެ މައިގަނޑު އަމާޒަކީ ޗައިނާއާ ރާއްޖެއާ ދެމެދު އޮތް ސަޤާފީ ގުޅުން ބަދަހި ކުރުން ކަމަށެވެ.
"މިއިވެންޓަކީ ޗައިނާއާ ރާއްޖެއާ ދެމެދު ޑިޕްލޮމެޓިކް ގުޅުން ޤާއިމްކުރިތާ 45 އަހަރު ފުރުމާ ގުޅިގެން ހުސްވި އަހަރުގެ އޮކްޓޫބަރުމަހުން ފެށިގެން ކުރިއަށްގެންދާ ހަރަކާތްތަކުގެ ތެރެއިން ހަރަކާތެއް، އަބަދުވެސް ރާއްޖެއަށް ޗައިނާއާ ދެމެދު އޮންނަ އިޤްތިސާދީ ގުޅުމުގެ ވާހަކަ ދައްކާ އެހެންވެ މިފަހަރު މި ބޭއްވި ހަރަކާތުގެ ފޯކަސް އަކީ ދެ ޤައުމުގެ ދެމެދު އޮންނަ ކަލްޗަރަލް ރިލޭޝަންޝިޕް ވަރުގަދަ ކުރުން" ފައިސަލް ވިދާޅުވިއެވެ.
އެހެން ޤައުމުތަކުގެ ސަފީރުންނާއި ޗައިނާގެ ފޮރިން މިނިސްޓްރީގެ އޮފިޝަލުންނާއި، ރާއްޖޭގެ އެމްބަސީއާއެކު މަސައްކަތްކުރާ ޗައިނާގެ ބައެއް އޮގަނައިޒޭޝަންތަކުގެ ބޭފުޅުންގެ އިތުރުން ޗައިނާގެ މީޑިއާތައް މި އިވެންޓްގައި ބައިވެރިވިކަން ސަފީރު ފައިސަލް ފާހަގަކުރެއްވިއެވެ.
ދިވެހިރާއްޖެ އާއި ޗައިނާ ސިޔާސީ ގުޅުން ގާއިމް ކުރީ 14 އޮކްޓޯބަރ 1972 ގައެވެ.