ޗައިނާގެ އިޤްތިސާދަކީ މާކަނޑެއް ކަމަށާއި، ތޫފާންތަކުން މާކަނޑަށް ކުރާ އަސަރު ކުޑަވާ ފަދައިން، ޗައިނާގެ އިޤްތިޞާދަށްވެސް ދިމާވާ ދަތިތަކުން ކުރާ އަސަރު ކުޑަވާނެކަމަށް ޗައިނާގެ ރައީސް ޝީ ޖިންޕިންގ ވިދާޅުވެއްޖެއެވެ. ރައީސް ޝީ ޖިންޕިންގ މިހެން ވިދާޅުވީ، ބޭރު ޤައުމުތަކުން ޗައިނާއަށް އެތެރެކުރާ މުދާ އިތުރުކުރުމަށްޓަކައި ޗައިނާއިން ބާއްވާ 'ޗައިނާ އިންޓަރނޭޝަނަލް އިމްޕޯޓް އެކްސްޕޯ' ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ.
މި އަހަރުގެ ތެރޭގައި ޗައިނާގައި ބާއްވާނެ އެންމެ މުހިއްމު އެކްސްޕޯ އަދި ދުނިޔޭގައިވެސް ބާއްވާ އިމްޕޯޓަށް ޙާއްސަ ފުރަތަމަ އެކްސްޕޯ ކަމަށްވާ 'ޗައިނާ އިންޓަރނޭޝަނަލް އިމްޕޯޓް އެކްސްޕޯ'ގައި ދުނިޔޭގެ ސަތޭކައަށްވުރެ ގިނަ ޤައުމުން ބައިވެރިވެފައިވާއިރު، މި އެކްސްޕޯގައި ރާއްޖޭގެ ކުންފުނިތަކުންވެސް ވަނީ ބައިވެރިވެފައެވެ. 'ޗައިނާ އިންޓަރނޭޝަނަލް އިމްޕޯޓް އެކްސްޕޯ' ސީ.އައި.އައި.އީގައި ރާއްޖޭގެ ފަރާތުން ބައިވެރިވެފައިވާ ވަފްދުގައި އެންމެ އިސްކޮށް ހުންނެވީ، އިކޮނޮމިކް މިނިސްޓްރީގެ ޕަރމަނެންޓް ސެކްރެޓަރީ ޔޫސުފް ރިޒާއެވެ.
ޗައިނާގެ ޝަންގްހާއީގައި މި މަހުގެ ދިހަވަނަ ދުވަހުގެ ނިޔަލަށް ކުރިއަށްދާ މި އެކްސްޕޯގައި، ރާއްޖޭގައި އެންމެ ފުޅާ ދާއިރާއެއްގައި މަސްވެރިކަމުގެ ވިޔަފާރިކުރާ ކުންފުނިތައް ކަމަށްވާ އެންސިސް ފިޝަރީޒް އަދި މިފްކޯފަދަ ކުންފުނިތަކުން ވަނީ ބައިވެރިވެފައެވެ. ފެއަރ މިއަދު ރަސްމީކޮށް ހުޅުވާފައިވާ ނަމަވެސް ފެއަރގެ އެކްޒެބިޝަން ބައި ކުރިއަށްގެންދާނީ މާދަމާއެވެ.
ޗައިނާގެ އިޤްތިޞާދު ބޭރުގެ ޤައުމުތަކަށް މިހާރަށްވުރެ ބޮޑަށް ހުޅުވާލުމަށް އެ ޤައުމުން މަސައްކަތްކުރަމުންދާއިރު، މި އެކްސްޕޯއަކީ އެކަމުގައި މުޙިއްމު ދައުރެއް އަދާކުރާނެ އެކްސްޕޯއެއްގެ ގޮތުގައި ޗައިނާއިން ދެކެއެވެ.އެކްސްޕޯ ހުޅުވުމަށް ބޭއްވި ރަސްމިއްޔާތުގައި ބައިވެރިވެވަޑައިގެން ވާހަކަދައްކަވަމުން ޗައިނާގެ ރައީސް ޝީ ޖިންގޕިންގ ވަނީ، ޗައިނާގެ އިޤްތިޞާދަކީ މާކަނޑެއްގެ ގޮތުގައި ސިފަ ކުރައްވާފައެވެ.
އެ ގޮތުން މާކަނޑަށް ތޫފާންތައް އައި ނަމަވެސް، ލިބޭ ގެއްލުން ކުޑަވާނެ ކަމަށާއި ނަމަވެސް ކުޑަ ފެންގަނޑަކަށް އަންނަ ތޫފާނަކުން އެ ފެންގަނޑަށް ލިބޭ ގެއްލުމާއި ކުރާ އަސަރު ބޮޑުވާނެ ކަމަށް ރައީސް ޝީ ވިދާޅުވިއެވެ. އެހެންކަމުން ޗައިނާއަށް ކުރިމަތިވާ ދަތިތަކާއި އެކުވެސް ޗައިނާގެ އިޤްތިޞާދު ދާނީ ކުރިއަށް ކަމަށްވެސް ރައީސް ޝީ ވިދާޅުވިއެވެ.
ރައީސް ޝީ ޖިންގޕިންގ ވަނީ، ޤައުމުތަކުގެ މެދުގައި ހުރިހާ ތަފާތުތަކާއި އެކުވެސް ހުރިހާ ޤައުމުތަކަށްވެސް ފައިދާހުރި ގޮތަކަށް ވިޔަފާރިކުރުމަށް ޝީ ގޮވާލެއްވިއެވެ. ޗައިނާގެ އިޤްތިޞާދު މިހާބޮޑަށް ކުރިއަރާފައި މިވަނީވެސް، ޗައިނާގެ އިޤްތިޞާދު ދުނިޔެއަށް ހުޅުވާލުމުން ކަމަށާއި، ކުރިއަށް އޮތްތަނުގައިވެސް މިހާރަށް ވުރެ ބޮޑަށް އިޤްތިޞާދު ހުޅުވާލެވިދެންދާނެކަމަށް ރައީސް ޝީ ވިދާޅުވިއެވެ.
އަދި ޗައިނާއިން ބޭނުންވަނީ ޤައުމުތަކާ ގުޅިގެން މަސައްކަތްކުރުމަށް ކަމަށްވެސް ރައީސް ޝީ ވިދާޅުވިއެވެ. ޗައިނާގެ އިޤްތިސާދަކީ ދުނިޔޭގެ 2 ވަނަ އަށް އެންމެ ބޮޑު އިޤްތިޞާދެވެ. އެހެންނަމަވެސް ޗައިނާއިން އިމްޕޯޓުކުރާ މުދަލުގެ މިންވަރު، އެ ޤައުމުން އެކްސްޕޯޓުކުރާ މިންވަރަކަށް ވުރެ މަދެވެ. ޗައިނާގެ ވިޔަފާރިވެރިންނާއި ބައްދަލުކޮށް، ވިޔަފާރީގެ ގުޅުން ބަދަހިކުރުމަށް ސީއައިއައިއީ އެކްސްޕޯއަކީ މުހިއްމު އެކްސްޕޯއެކެވެ.