އިންޑިއާގެ މުމްބާއީގައި ކުރިއަށްދާ ގްލޯބަލް އޭވިއޭޝަން ސަމިޓުގައި މިނިސްޓަރ އޮފް ޓްރާންސްޕޯޓު އެންޑް ސިވިލް އޭވިއޭޝަން އައިޝަތު ނަހުލާ ބައިވެރިވެވަޑައިގަންނަވައިފިއެވެ.
ދެ ދުވަހުގެ މުއްދަތަކަށް ކުރިއަށްގެންދާ މި ސަމިޓަކީ އޭވިއޭޝަންގެ ސިނާއަތް ކުރިއަރުވައި، އެ ސިނާއަތަށް ހުރި ގޮންޖެހުންތައް ހައްލުކުރުމާއި ގުޅޭގޮތުން މަޝްވަރާ ކުރުމަށް ކުރިއަށްގެންދާ ސަމިޓެކެވެ.
ދުނިޔޭގެ އެކި ޤައުމުތަކުގެ މިނިސްޓަރު ފެންވަރުގެ ބޭފުޅުން މި ސަމިޓުގައި ބައިވެރިވާއިރު، އެވިއޭޝަން ސިނާއަތުގައި ހަރަކާތްތެރިވާ ހާހެއްހާ މީހުން މި ސަމިޓުގައި ބައިވެރިވާކަމަށް ސަމިޓު އިންތިޒާމް ކުރާ ފަރާތުން މައުލޫމާތުދެއެވެ.
މި ސަމިޓަކީ އިންޑިއާގެ ޔޫނިއަން މިނިސްޓްރީ އޮފް ސިވިލް އޭވިއޭޝަން، އެއަރޕޯޓު އޮތޯރިޓީ އަދި ފެޑަރޭޝަން އޮފް އިންޑިއަން ޗެމްބަރ އޮފް ކޮމަރސް އެންޑް އިންޑަސްޓްރީސް ގުޅިގެން ބާއްވާ ސަމިޓެކެވެ.