މެރިކަލްޗަރ އެންޓަރޕްރައިޒް ޑިވެލޮޕްމަންޓް ޕްރޮޖެކްޓްގެ ދަށުން ލ.އަތޮޅުގައި ކުރިއަށްދާ ހުއިފިލަނޑާ އާލާ ކުރުމުގެ މަޝްރޫޢުއަށް ބަދަލުތަކެއް ގެންނަން ޖެހޭކަމަށް މިނިސްޓަރ އޮފް ފިޝަރީޒް، ރިސޯސަސް އެންޑް އެގްރިކަލްޗަރ އިން ބުނެފިއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މިނިސްޓަރު ޒަހާ ވިދާޅުވީ ލ އަތޮޅުގައި ކުރިއަށްގެންދާ ހުއިފިލަނޑާ އާލާ ކުުމުގެ އެ މަޝްރޫޢުގައި މިހާރު ބޭނުންކުރަމުންދާ މޮޑެލްގެ ބަދަލުގައި ތަފާތު އެހެން މޮޑެލްއަކަށް އެ މަޝްރޫއު ބަދަލު ކުރުމަށް ރާވާފައިވާކަމަށެވެ. މިނިސްޓަރު ޒަހާ ވިދާޅުވީ ހުއިފި ލަނޑާ އާލާ ކުރުމުގެ އެ މަޝްރޫއު ފެށިއިރު، ފައިދާ ވާނެ ކަމަށް ލަފާކުރި އަދަދަށް ފައިދާނުވެ، އެކަންކުރުމުގެ ޝައުގުވެރިކަންވެސް ގެއްލިފައިވާކަމަށެވެ.
"މި މަޝްރޫއަށް ބަލާއިރު، ލ.އަތޮޅުގެ ބޭފުޅުން އެކަންކުރުމަށް ބައިލައްކަ ރުފިޔާގެ ލޯނު ނަގާފައި އެބަހުރި. މަޝްރޫޢު ފަށާފައިވަނީ 9 މަސްދުވަހުގެ ތެރޭގައި ގާތް ގަނޑަކަށް 140،000 ރުފިޔާ ފައިދާވާނޭކަމަށް ބަލައި. މިހާރު މިކަންކުރުމުގެ ޝައުގުވެރިކަންވެސް ގެއްލިއްޖެމިނިސްޓްރީ އޮފް ފިޝަރީޒް، ރިސޯސަސް އެންޑް އެގްރިކަލްޗަރ ޒަހާ ވަހީދު
މިނިސްޓަރު ޒަހާ ވިދާޅުވީ ލޯނު ނަގައިގެން ހުއިފިލަނޑާ މަޝްރޫޢު ފަށާފައިވާ މީހުންގެ ތެރެއިން އެ މަސައްކަތް ހުއްޓާލަން ބޭނުންވާ މީހުނަށް އެފުރުސަތު ދޭނޭކަމަަށެވެ. މިގޮތުން ނަގާފައިވާ ލޯނަށް ލުޔެއްދީ، އެފަރާތްތަކަށް ދޫކޮށްފައިވާ ތަކެތި އަބުރާ ސަރުކާރަށް ނެގުމަށް ނިންމާފައިވާކަމަށްވެސް މިނިސްޓަރު ވިދާޅުވިއެވެ. މީގެ އިތުރުން މި މަޝްރޫޢު ކުރިއަށްގެންދާ ފަރާތްތަކަށް ބޭނުންވާ އެހީތެރިކަން މިނިސްޓްރީން ދެމުންގެންދާނޭކަމަށް މިނިސްޓަރު ޒަހާ ވިދާޅުވިއެވެ.
މެރިކަލްޗަރ އެންޓަރޕްރައިޒް ޑިވެލޮޕްމަންޓް ޕްރޮޖެކްޓް"ގެ ދަށުން ހުއިފިލަނޑާ އާލާ ކުރުމުގެ މަޝްރޫއު ކުރިއަށްދަނީ ލ.މާބައިދޫ، ދަނބިދޫ، ކަލައިދޫ އަދި ލ.އިސްދޫގައެވެ. މި މަސައްކަތް ކުރުމަށް ލޯނުގެ ގޮތުގައި ދޫކޮށްފައިވަނީ ނަގުދު ފައިސާގެ ބަދަލުގައި ލޯނުގެ އަގަށްވާ މައިގަނޑު ތަކެއްޗެވެ. އެއީ މަސައްކަތް ފަށައިގަތުމަށް، ކޮށިއެޅުމަށް ބޭނުންވާ ތަކެއްޗާއި ކުދި ހުއިފިލަނޑާއެވެ. ލޯނު އަދާކުރުމަށް ހަމަޖެހިފައިވަނީ ނަގުދު ފައިސާއިންކަމަށް އޭރު ފިޝަރީޒް މިނިސްޓްރީން ބުނެފައިވެއެވެ.