ރާއްޖޭގެ މަސްވެރިކަން އިތުރަށް ކުރިއެރުވުމަށްޓަކައި މަހުގެ އުފެއްދުންތައް އެކްސްޕޯޓު ކުރުމަށް އިތުރު މާކެޓްތައް ހޯދުމުގެ މަސައްކަތް ކުރަމުންދާ ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެއެވެ.
މިނިސްޓަރު ޒަހާ ވިދާޅުވީ ރާއްޖޭގައި ބާނާ މަސް ދުނިޔޭގެ އެކި ޤައުމުތަކަށް ތައާރަފްކޮށް މާކެޓްކުރުމަށްޓަކައި އެކި ޤައުމުތަކާއިއެކު ކަމާއި ގުޅޭ މަޝްވަރާތައް ކުރަމުންދާ ކަމަށެވެ. އެގޮތުން ޗައިނާ، ރަޝިއާ އަދި އެމެރިކާގެ މާކެޓަށް މަހުގެ އުފެއްދުންތައް އެކްސްޕޯޓު ކުރުމަށް މަސައްކަތްކުރަމުންދާ ކަމަށް މިނިސްޓަރު ޒަހާ ވިދާޅުވިއެވެ.
"ވަރަށް ގިނަ ދުވަސްވެއްޖެ އިނގޭތޯ، ޗައިނާގެ މާކެޓަށް އެކްސްޕޯޓު ކުރަންވެގެން މަސައްކަތް ކުރާތާ، އަޅުގަނޑުމެންވެސް މިހާރު ޗައިނާ ސަރުކާރާއި އެކީގައި ވާހަކަދައްކަމުން މިދަނީ. އޭގެ އިތުރުން ރަޝިއާ އަދި އެމެރިކާ މާކެޓް ހޯދުމުގެ މަސައްކަތްވެސް ކުރަމުން މިދަނީ. ޤައުމުތަކުގެ ސަފީރުންވެސް އަޅުގަނޑުމެންނާއި އެކު މިކަމުގައި އެބަ މަސައްކަތް ކުރޭ.ފިޝަރީޒް މިނިސްޓަރު ޒަހާ ވަހީދު
މިނިސްޓަރ ޒަހާ ވިދާޅުވީ މަހުގެ އުފެއްދުންތައް ތަފާތު ޤައުމުތަކަށް އެކްސްޕޯޓުކުރުމަށް ހުންނަ މިންގަނޑުތައް ތަފާތު ކަމަށާއި، އެހެން ކަމުން އާ މަރކެޓުތައް ހޯދުމުގައި މިއީ ވަރަށްބޮޑަށް ބަލަން ޖެހޭ ކަމަށް މިނިސްޓަރ ވިދާޅުވިއެވެ.
ރާއްޖޭގައި މަސްވެރިކަންކުރާ ގޮތާއި މަހުގެ އުފެއްދުންތައް ދުނިޔޭގެ އެކި ހިސާބުތަކުގައި މާކެޓުކުރުމަށްޓަކައި ސަރުކާރާއި ގުޅިގެން އަމިއްލަ ކުންފުނިތަކުންވެސް ދަނީ މަސްވެރިކަމުގެ ސިނާއަތާއި ގުޅުންހުރި ފެއަރތަކުގައި ބައިވެރިވަމުންނެވެ.