ދުބާއީގައި ބާއްވާ އިންޓަރ-ކޮންޓިނެންޓަލް ފުޓްބޯޅަ މުބާރާތުގައި ރާއްޖެއިން ބައިވެރިވުމުގެ ފުރުސަތު ލިބިފައިވާ ކަމަށް ޓޫރިޒަމް މިނިސްޓަރ އަލީ ވަޙީދު ވިދާޅުވެއްޖެއެވެ.
މިނިސްޓަރ ވިދާޅުވީ އަންނަ އަހަރުގެ މުބާރާތުގައި ރާއްޖޭގެ ތޭރަ އަހަރުން ދަށުގެ ޤައުމީ ފުޓްބޯޅަ ޓީމަށް ބައިވެރިވުމުގެ ފުރުސަތު ލިބިފައިވާ ކަމަށާއި މިއީ ރާއްޖޭގެ ޒުވާން ޖީލަށް ލިބިގެންދާ ވަރަށް ބޮޑު ފުރުސަތެއް ކަމަށެވެ.
އަޑު: " މި މުބާރާތުގައި ދުނިޔޭގެ އެކި ބައްރުތަކުން، ޗަޕާން، އިޖިޕްޓް، ފަދަ ހިސާބުތަކުން ކުޅުންތެރިން ބައިވެރިވޭ، ހިސާބުތައް ދައްކާގޮތުން މިކަހަލަ މުބާރާތެއްގެ ތެރެއިން އެ އަންނަ ޓީމްތަކުން އެއް ކުޅުން ތެރިއެއް، ނޫނީ ދެ ކުޅުންތެރިއެއް ސީނިއަރ ޓީމަށް ގޮސްފަހުރި ކުޅުންތެރިން، މިފަދަ ޓީމްތަކާއި އެކު ކުޅެން ލިބުމަކީ ރާއްޖޭގެ ކުޅުންތެރިންނަށް ލިބޭ ވަރަށް ބޮޑު ކާމިޔާބީއެއް،" ޓޫރިޒަމް މިނިސްޓަރ ވިދާޅުވިއެވެ.
މީގެ އިތުރުން މިނިސްޓަރ ވަޙީދު ވިދާޅުވީ، ދުބާއީއަށް ކުރެއްވި ދަތުރުގައި، ރާއްޖޭގައި ފުޓްބޯޅައިގެ ބޮޑު މުބާރާތެއް ބޭއްވުމުގެ ފުރުސަތު ލިބިފައިވާ ކަމަށެވެ. އެގޮތުން ތޭރަ އަހަރުން ދަށުގެ ޓީމްތައް ހިމަނައިގެން ބާއްވާ މިމުބާރާތާއި ގުޅޭ މަސައްކަތްތައް ސަރުކާރާއި ގުޅިގެން ކުރިއަށްގެންދާނެ ކަމަށެވެ. މިއީވެސް ރާއްޖޭގެ ފަތުރުވެރިކަން އިތުރަށް އިޝްތިހާރު ވެގެންދާނެ ކަމެއް ކަމަށް މިނިސްޓަރ ވިދާޅުވިއެވެ.
އަޑު: "އޮޕޮޗިއުނިޓީ މިހާރު ލިބިފައި އެބައޮތް ދިވެހިރާއްޖޭގައި ދިވެހިން ހޮސްޓުކުރުމުގެ ފުރުސަތު، ދިވެހިރާއްޖޭގައި އެ ފެސިލިޓީތައް ޤާއިމްކުރެވިއްޖެނަމަ ވަކި މުއްދަތެއްގެ ތެރޭގައި ދުނިޔޭގެ ބޮޑެތި ކުލަބުތަކުގެ ތޭރައަހަރުންދަށުގެ މި މުބާރާތް މޯލްޑިވިއަން އޯޕަންއެއްގެ ގޮތުގައި އިންޓަރނޭޝަނަލް މުބާރާތެއްގެ ގޮތުގައި ބޭއްވުމުގެ ވަނީ ލިބިފައި،" ޓޫރިޒަމް މިނިސްޓަރ ވިދާޅުވިއެވެ.
މިއަހަރުގެ ދުބާއީގެ އިންޓަރކޮންޓިނެންޓަލް އަންޑަރ 13 ފުޓުބޯޅަ މުބާރާތުގެ ޕްލެޓިނަމް ސްޕޮންސަރއެއްގެ ގޮތުން މުބާރާތުގެ އެއް ޕިޗަށް "ވިޒިޓް މޯލްޑިވްސް" ނަންދީ، މުބާރާތުގައި ބައިވެރިވާ އެއް ޓީމުގެ ޖާރޒީ ރާއްޖެއިން ވަނީ ސްޕޮންސަރކޮށްފައެވެ.
މުޅި ޕިޗާއި ޖަރޒީ ސްޕޮންސަރކުރުމާއި، މިމުބާރާތުގެ ތެރެއިން ރާއްޖެ އިޝްތިހާރުކުރަން ކުރާ އެހެނިހެން ކަންތައްތައް ކުރުމުގެ އަޤަކީ އެންމެ ފަންސަވީސް ހާސް ޑޮލަރުކަމަށްވެސް މިނިސްޓަރ ޢަލީ ވަޙީދު މީގެކުރިން ވަނީ ވިދާޅުވެފައެވެ.
ދުބާއީގެ އިންޓަރކޮންޓިނެންޓަލް އަންޑަރ 13 ފުޓުބޯޅަ މުބާރާތަކީ ސްޕެއިން އާއި ރިއާލް މެޑްރިޑްގެ ކުރީގެ ކެޕްޓަން، މިޝޭލް ސެލްގާޑޯ ފައުންޑިން މެންބަރައަކަށް ހުރެ ކުރިޔަށް ގެންދާ މުބާރާތެކެވެ. މިމުބާރާތުގައި ދުނިޔޭގެ ބޮޑެތި ކްލަބްތަކުގެ ތެރެއިން ސްޕެއިންގެ އެންމެ ވަރުގަދަ ދެ ކްލަބް ކަމަށްވާ، ބާސަލޯނާ އާއި ރިއާލް މެޑްރިޑްގެ އިތުރުން އިޓަލީގެ ޗެންޕިއަން ޔުވެންޓަސް އާއި އިނގިރޭސިވިލާތުގެ ޗެލްސީއާއި ޖަރުމަނުގެ ޗެންޕިއަން ބަޔާން މިއުނިކްގެ އިތުރުން އަރަބި ޤައުމުގެ ތަކުގެ 13 އަހަރުން ދަށުގެ ރަސްމީ ޓީމްތައް ބައިވެރިވެއެވެ.