އަންހެނުންގެ ދުވަހާއި ގުޅިގެން ސަރުކާރު އޮފީސްތަކުގައި ޚާއްސަ ޙަރަކާތްތަކެއް ކުރިއަށް ގެންގޮސްފި
ބައިނަލްއަޤްވާމީ އަންހެނުންގެ ދުވަހާއި ގުޅިގެން ސަރުކާރު ކުންފުނިތަކުގައި މަސައްކަތް ކުރާ އަންހެން މުވައްޒަފުންނަށް އަމާޒުކޮށްގެން ޚާއްސަ ޙަރަކާތްތަކެއް ކުރިއަށް ގެންގޮސްފިއެވެ.
އަންހެނުންގެ ދުވަސް ފާހަގަކުރުމުގެ ގޮތުން މިއަދު ހެނދުނު ސްޓްލްކޯގައި ބޭއްވި ރަސްމިއްޔާތެއްގައި ވަނީ އެކުންފުނީގައި މަސައްކަތް ކުރާ ކޮންމެ މަންމައަކަށް ހަމަސް ދުވަހުގެ މެޓަރނިޓީ ލީވް ދިނުމަށް ނިންމާފައެވެ. އަދި ކޮންމެ ބައްޕައަކަށް އެއްމަސް ދުވަހުގެ ޕެޓަރނިޓީ ލީވް މުސާއަރާ އެކު ދިނުމަށް ވަނީ ނިންމާފައެވެ.
މިކަމާ ގުޅޭގޮތުން މަޢުލޫމާތުދެއްވަމުން އެ ކުންފުނީގެ ޖެނެރަލް މެނޭޖަރ އަބްދުﷲ ނާޒިރު ވިދާޅުވީ މިކަމުގެ ސަބަބުން ކުންފުނީގައި މަސައްކަތްކުރާ މުވައްޒަފުންގެ މަސައްކަތްތައް ހަރުދަނާވެ މަސައްކަތްތައްކުރުމަށް އިތުރު ހިތްވަރެއް ލިބިގެންދާނެކަމަށެވެ. ނާޒިރު ވިދާޅުވީ އެ ކުންފުނީގެ އާއްމު ނިޒާމްގެ ތެރެއިން މި ޗުއްޓީއަށް އެދުމުން ޗުއްޓީ ހަމަޖެހިގެންދާނެކަމަށެވެ.
"މިކަމުގެ ސަބަބުން އެކުންފުނީގައި މަސައްކަތްކުރާ މުވައްޒަފުންނަށް އާއިލާތައް ބިނާކުރުމަށް ފުރުޞަތުތައް ލިބިގެންދާނެ. މިހާރުވެސް މާބަނޑު އަންހެނުންނަށް ޚާއްސަ ލުއިފަސޭހަ ގޮތްތަކެއް ވަނީ ހަމަޖައްސާދީފަ. މިގޮތުން މަސައްކަތްތައް ހަވާލުކުރުމުގައިވެސް އެކިކަންކަމަށް ބަލަން." ނާޒިރު ވިދާޅުވިއެވެ.
ސްޓެލްކޯއިން ބުނީ މި އުސޫލް އަށް އަމަލުކުރަން ފެށުމާއެކު މިހާރު ވިހައިގެން އުޅޭ މަންމައިންނަށް މުސާރާއާއެކު މެޓަރނިޓީ ލީވް ހަމަޖެހިގެންދާނެ ކަމަށެވެ. އަންހެނުނުގެ ދުވަސް ފާހަގަކުރުމަށް ބޭއްވި މި ރަސްމިއްޔާތުގައި ސްޓެލްކޯއިން ވަނީ އެ ކުންފުނީގައި މަސައްކަތްކުރާ އަންހެނުން މުވައްޒަފުންގެ އަގުވަޒަންކުރުމުގެ ގޮތުން ޝަރަފުގެ މެޑަލްއެއް ދީފައެވެ.
ސްޓެލްކޯގެ އިތުރުން އައިޖީއެމްއެޗުގައިވެސް ވަނީ އަންހެނުންގެ ދުވަސް ފާހަގަކުރުމުގެ ގޮތުން ޚާއްސަ ޙަރަކާތްތަކެއް ކުރިއަށް ގެންގޮސްފައެވެ. އެގޮތުން އައިޖީއެމްއެޗުން ވަނީ
އެ ހޮސްޕިޓަލުގައި މަސައްކަތްކުރާ މުވައްޒަފުންގެ އަގުވަޒަންކޮށް ޚާއްސަ އެވޯޑެއް ދީފައެވެ. އެގޮތުން އެ ހޮސްޕިޓަލްގައި ގިނަ މުއްދަތަކަށް މަސައްކަތްކޮށްފައިވާ 10 ކަނބަލަކަށާއި އަމިއްލައަށް އިސްނަގައިގެން ޚިދުމަތްދޭ ފަރާތްތަކުގެ އަގުވަޒަން ކުރުމުގެ ގޮތުން 10 މުވައްޒަފަކަށް ވަނީ އެވޯޑް ދީފައެވެ. އަދި ހިންގުމުގެ ދާއިރާއިން 10 މުވައްޒަފަކަށް ވަނީ އެވޯޑް ދީފައެވެ.
ރާއްޖޭގެ އިތުރުން އަންހެނުންގެ ދުވަސް ފާހަގަކުރުމަށް އަވައްޓެރި ސްރީލަންކާގައި ދިރިއުޅޭ ދިވެހިންވެސް ވަނީ ޚާއްސަ ހަރަކާތްތަކެއް ކުރިއަށްގެންގޮސްފައެވެ. އެގޮތުން ލަންކާގައި ހުންނަ ދިވެހި އެންބަސީއާއި ލަންކާގައި ހުންނަ މޯލްޑިވްސް އެޑިއުކޭޝަނަލް ކަލްޗްރަލް ސެންޓަރ ގުޅިގެން "އަންހެނުން ބާރުވެރިކުރުވުން" ނަމުގައި ވަނީ ތަފާތު ހަރަކާތްތައް ކުރިއަށް ގެންގޮސްފައެވެ.
އޭގެތެރޭގައި ކުޅިވަރުގެ އެކި ހަރަކާތްތަކާއި ލަންކާގައި ދިރިއުޅޭ ދިވެހި އަންހެންވެރިންގެ މަސައްކަތްތައްވެސް ދައްކާލުން ވަނީ ކުރިއަށް ގެންގޮސްފައެވެ. މީގެއިތުރުން ޑޮކްޓަރަށް ދައްކާލާ ޗެކްއަޕް ހަދާލުމުގެ ފުރުޞަތުވެސް ވަނީ ހުޅުވާލާފައެވެ.