މާލޭ ރަސްފަންނުގައި މޫދަށް އެރޭ ސަރަޙައްދު މި ހަފްތާ ނިމުމުގެ ކުރިން ހުޅުވާލާނެކަމަށް ސިޓީ ކައުންސިލުން ވިދާޅުވެއްޖެއެވެ. މާލޭ ރަސްފަންނުގައި މޫދަށް އެރޭ ސަރަޙައްދު ބަންދުކޮށްފައިވަނީ އެ ސަރަޙައްދުގައި ނަޖިސް ފެތުރިފައިވާތީ މިދިޔަ މަހުގެ 29 ވަނަ ދުވަހުއެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން ސިޓީ ކައުންސިލްގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ ރަސްފަންނުގެ މޫދަށް އެރޭ ސަރަހައްދުން ނަޖިސް ފެތުރުމުގެ ސަބަބުން އެޗްޕީއޭއިން ފުރަތަމަ ޓެސްޓް ހެދިއުރު ނުރައްކާތެރިކަމެއް ނެތްކަމަށެވެ. އެހެންނަމަވެސް މޫދައް އެރޭ ސަރަހައްދަކީ ގިނަ އަދަދެއްގެ ރައްޔިތުން އެތަނަށް ގޮސް އުޅޭ ތަނެއްކަމުން ރައްޔިތުންގެ ރައްކާތެރިކަމަށްޓަކައި ދެވަނަ ޓެސްޓެއް ހެދުމަށް އެޗްޕީއެއަށް ހަވާލުކޮށްފައިވާކަމަށް ޝަމާއު ވިދާޅުވިއެވެ.
"ޑަބްލިއު އެޗްއޯގެ މިންގަނޑުން ބަލާނަމަ އެ ސަރަޙައްދަކީ މުދަށް އެރުމަށް ރައްކާތެރި ސަރަޙައްދެއް. އެހެންނަމަވެސް އެކަން އިތުރަށް ޔަޤީންކުރުމަށްޓަކައި ދެވަނަ ޓެސްތެއް ހެދުމަށް އެޗްޕީއޭއާ ހަވާލުކޮށްފައިވަނީ. މި ސަރަޙައްދަށް މޫދަށް އެރުމުގައި ނުރައްކަލެއް އާއްމުރައްޔިތުންނަކަށް ނެތް. ރަސްފަންނުގެ މޫދަށް އެރޭ ސަރަހައްދު އޮތީ ބޭނުންކުރެވޭ ހާލަތެއްގައިކަމަށް."ޝަމާއު ވިދާޅުވިއެވެ.
ރަސްފަންނުގައި މޫދަށް އެރޭ ސަރަހައްދަކީ ގިނަ އަދަދެއްގެ އާންމުން ބޭނުންކުރާ ތަނެއްކަމުން އެތަން ދެން ހުޅުވާލާނީ އެތަނަކީ މޫދަށް އެރެން ރައްކާތެރިތަނެއްކަން ކަށަވަރު ކުރުމަށް ފަހުގައި ކަމަށް ސިޓީ ކައުންސިލުން ވިދާޅުވެއެވެ.